Bushe Abena Kristu Kuti Balwako Inkondo?—Finshi Baibolo Yalandapo?

Nga fintu cili pali ino nshita ilyo kuli inkondo ku Ukraine, intungulushi shamapepo shiletungilila sana inkondo. Moneni ifyo bashimapepo ba mu fyalo fyonse fibili baletungilila inkondo:

• “Tuletasha sana no kucindika abashilika besu abalecingilila icalo cabo ica Ukraine ku balebalwisha . . . Tulemutontonkanyapo lyonse, tulemupepelako kabili tulemutungilila.”—E fyalandile shimapepo Metropolitan Epiphanius I of Kyiv, ifyo balembele muli The Jerusalem Post, iya March 16, 2022.

• “Umukalamba we calici lya ba Orthodox iya mu Russia alipekenye ukulongana pa Mulungu uko aitile abashilika, no kubakoselesha ukuti bacingilile icalo cabo ‘pantu bena Russia fye e bengacicingilila’ pali iyi nshita balelwa inkondo ku Ukraine.”—Reuters, April 3, 2022.

Bushe Abena Kristu balingile ukulwako inkondo? Finshi Baibolo yalandapo?

Ifyo Baibolo ilanda

Baibolo itila bonse abakonka Yesu Kristu tabalwako inkondo.

• “Bwesesha ulupanga umo lwikala, pantu bonse ababomfya ulupanga bakafwa ku lupanga.”—Mateo 26:52.

  Bushe umuntu nga aletungilila inkondo nelyo nga alelwako ninshi alekonka ifyo Yesu alandile?

• “Ndemupeela ifunde ilipya, ilya kuti muletemwana; ifyo namutemenwe, e fyo na imwe muletemwana. Nga muletemwana, e lyo bonse bakeshiba ukuti muli basambi bandi.”—Yohane 13:34, 35.

  Bushe umuntu uutungilila inkondo ninshi alelanga ukuti aliba no kutemwa uko Yesu alandile ukuti e kwali no kulenga abantu baishiba abasambi bakwe?

Nga mulefwaya ukwishibilapo na fimbi, belengeni icipande citila “Bushe Abena Kristu Balingile Ukulwa Inkondo?”

Ifyo Abena Kristu balingile ukumona inkondo muno nshiku

Bushe kuti twaenekela Abena Kristu ukukanatungililako nelyo ukulwako inkondo? Ee. Baibolo yasobele ukuti muli shino nshiku isho ita ukuti “inshiku sha kulekelesha,” mukaba abantu aba mu nko shonse ‘abashakasambilile inkondo na kabili’ nga fintu Yesu alesambilisha.—Esaya 2:2, 4.

• Pa kuti mwishibilepo na fimbi, belengeni icipande ca mu Ulupungu lwa kwa Kalinda icitila “Bushe Lesa Amona Shani Ukulwa Inkondo?”

Nomba line Yehova,a “Lesa wa mutende,” akabomfya ubufumu bwa ku muulu pa kulubula abantu “ukufuma ku ba mutitikisha na ku ba bunkalwe.”—Abena Filipi 4:9; Amalumbo 72:14.

• Pa kuti mwishibe ifyo akacita, tambeni vidio itila Bushe Ubufumu bwa kwa Lesa ni Cinshi?