Mulamba Iyonaula Ifintu—Finshi Baibo Yalandapo?

Mwi sonde lyonse, abantu abengi balecula pa mulandu na mulamba iyonaula ifintu. Belengeni amalyashi yakonkapo mumfwe:

“Ukutendeka pa Cibelushi ukufika pali Citatu, mu musumba uukalamba uwa China mwaliloka imfula iyacipesha mano iishatala ailokapo nalimo mu myaka 140 iyapita..”—E fyalandile ba AP News, pa 2 August, 2023.
“Pali Cine, icimwela beta ukuti Typhoon Khanun calilengele kwaba imfula ikalamba sana e lyo ne cimwela icikalamba kukapinda ka ku kulyo aka Japan. Uyu wali e muku walenga bubili ifya musango uyu fyacitike, kabili abantu babili balifwile. . . . Nalimo ici cimwela cikalenga ku central Taiwan kukabe imfula iikalamba sana.”—E fyalandile ba Deutsche Welle, pa 3 August, 2023.
“Pa mpela ya mulungu, mu Nova Scotia mu Canada mwali mulamba iingi nga nshi pa mulandu ne mfula iikalamba iyalokele ku lulamba lwa bemba ya Atlantic. Kabili mu Canada tamwatala amulokapo imfula yafula ifi mu myaka 50 iyapita.”—E fyalandile ba BBC News, pa 24 July, 2023.

Finshi Baibo yalanda pali ifi ifilecitika?

Icishibilo ca “nshiku sha kulekelesha”

Baibo ilanda ukuti tuleikala “mu nshiku sha kulekelesha .” (2 Timote 3:1) Yesu alisobele ukuti mu nshiku shesu tukalamona “ifya kutiinya,” nelyo ifintu ifingalenga twaba no mwenso. (Luka 21:11) Ukwaluka kwa miceele e kwalilenga maka maka ukuti ifintu fya kutiinya ifingi kabili ifikalamba filecitika ukwabula ukwenekela.

Ifingalenga twaba ne subilo

Baibo itweba ukuti, ifintu ifya kutiinya ifilecitika pali ino nshita kuti fyalenga twaba ne subilo. Cinshi twalandile fi? Yesu atile: “Ilyo mwamona ifi filecitika, mwishibe ukuti ubufumu bwa kwa Lesa buli mupepi.”—Luka 21:31; Mateo 24:3.

Ifintu ifilecitika pali ino nshita filelanga fye apabuuta ukuti nomba line Ubufumu bwa kwa Lesa buli no kupwisha amafya yabako pa mulandu ne fya bumbwa, ukubikako fye na mafya imfula ileta.—Yobo 36:27, 28; Amalumbo 107:29.

Nga mulefwaya ukwishibilapo na fimbi pa fyo Ubufumu bwa kwa Lesa bukawamya isonde, belengeni icipande citila “Nani Uukapususha Isonde?”