Mulepanga Ifibusa pa Kuti Mwilatalalilwa—Ifyo Baibo Ingamwafwa

Mu mwaka wa 2023 abasambilila sana pa fya bumi basangile ukuti ukutalalilwa bwafya ubukalamba sana ubo balingile ukwishiba ifya kubupwisha. Bushe kwaliba ifyo bengacita pa kuti abantu belatalalilwa?

• Ba Dr. Vivek Murthy ababomba incito ya kulepula abantu mu U.S balandile ukuti, “Nga tuletalalilwa nelyo tatuleba pamo ne fibusa, kuti twalwala kabili te kuti tuleba ne nsansa.” Balandile no kuti: “Kwaliba ifyo twingacitapo.” Finshi ifyo fine? Batile: “Kuti tulecitako ifintu ifinono cila bushiku ifingalenga tuleba sana ifibusa na bantu bambi.”a

Ukukanalaba pamo na bantu bambi te kulenga fye tuletalalilwa. Bamo kuti batalalilwa nangu bali pa bantu abengi. Te mulandu ne fingalenga twalatalilwa, Baibo kuti yatwafwa. Mu Baibo mwaliba ifingatwafwa pa kuti tatuletalalilwa ne fyo twingacita pa kuti tuleba sana ifibusa na banensu.

Amashinte ya mu Baibo ayengamwafwa

Mulelanshanya bwino. Ici cilepilibula ukuti tamulingile ukulalondolwela fye abanenu ifyo muleumfwa nelyo amafya mulekwata, lelo mufwile no kulakutikako kuli bena. Nga mulelanga abanenu ukuti mwalibabikako amano, mukaba sana ifibusa na bena.

• Ishinte lye funde: “Tamubika fye amano ku fyo mulefwaya fye mwe bene, lelo mulabika amano na ku fyo bambi bafwaya.”—Abena Filipi 2:4.

Mulekwata ifibusa ifyalekanalekana. Muleitemenwa ukukwata ifibusa abakalamba pali imwe, abaice pali imwe nelyo abo mwapusana nabo inkulilo nelyo umutundu.

• Ishinte lye funde: ‘Mulekusha ukutemwa kwenu.’—2 Abena Korinti 6:13.

Nga mulefwaya ukwishibilapo na fimbi pa fyo mwingacita pa kuti mukwate ifibusa ifisuma, belengeni icipande citila “Satisfying Our Hunger for Friendship.”