Cinshi Abantu Baafililwa Ukuleta Umutende Pa Calo?

Icasuko ca mu Baibolo

Abantu balifilwa ukuleta umutende pa calo kabili tabakabale abauleta. Ifyalenga ni fi:

• Umuntu “takwata amaka ya kutungulula intampulo shakwe.” (Yeremia 10:23) Abantunse tabapangilwe na maka nelyo insambu sha kuiteka abene, e ico te kuti balete umuntende uwingabako ku ciyayaya.

• “Mwitetekela intungulushi, bantunse fye abashingamupususha. Nga bafwa babwelela ku lukungu, na mapange yabo yonse yalaloba muli ubo bwine ubushiku bafwa.” (Amalumbo 146:3, 4, Good News Translation) Bakateka kumo na balya abafwaya sana ukucita ifisuma, te kuti bapwishe amafya ayalenga kuleba inkondo.

• “Mu nshiku sha kulekelesha mukesaba inshita ishayafya nga nshi. Pantu abantu bakaba . . . abankalwe, abashatemwa ubusuma, abafutuka abanabo, bamunshebwa, aba cilumba.” (2 Timote 3:1-4) Tuli mu “nshiku sha sha kulekelesha” isha cino calo cabipa, umo imibele ya bantu ilenga cayafya ukuleta umutende.

• “Cabipila imwe mwe sonde na bemba, pantu Satana Kaseebanya naikila pali imwe, ali ne cipyu icikalamba, pa kwishiba ukuti ali fye ne nshita inono.” (Ukusokolola 12:12) Satana Kaseebanya, umulwani wa kwa Lesa balimupoosa pano calo kabili alatunka abantu ukukwata imibele yabipa iyo akwatako. Ilyo Satana acili ‘aleteka pano calo,’ muli cino calo te kuti mube umutende.—Yohane 12:31.

• “[Ubufumu bwa kwa Lesa] “bukashonaula no kupwisha aya mabufumu yonse, kabili bwena bukeminina umuyayaya.” (Daniele 2:44) Bufumu bwa kwa Lesa fye e bukaletela abantu umutende bafwaisha, uushakapwe.—Amalumbo 145:16.