Bushe Ifyo Baibolo Yalanda Pali Yesu fya Cine?

Icasuko ca mu Baibolo

Luka, umo pali kalemba ba Baibolo alandile pa fyo alembele pali Yesu ati: “Nalikonka fyonse bwino bwino ukufuma pa kutendeka.”—Luka 1:3.

Bamo batila ifyo amabuuku ya Mbila Nsuma ayo Mateo, Marko, Luka na Yohane abali pano calo pamo na Yesu balembele, fyalyalwilwe mu myaka ya ba 300 C.E.

Lelo ku kutendeka kwa myaka ya ba 1900, mu Egypt mwalisangilwe iciputusha ce buuku lya Mbila Nsuma iyo Yohane alembele icacindama sana. Ici iciputusha nomba citwa ati Papyrus Ryland 457 (P⁵²) kabili bacisungila mu John Rylands Library, ku Manchester, mu England. Muli ici ciputusha mwaba amashiwi ya pali Yohane 18:31-33, 37, 38 ayasangwa mu maBaibolo ya nomba.

Ici e ciputusha ca kale sana pa fimfungwa fya Amalembo ya ciGriki aya Bena Kristu. Abasambilila abengi basumina ukuti calembelwe nalimo muli ba 125 C.E, pa numa fye ya myaka 25 ukutula apo Amalembo ya kubalilapo yalembelwe. Amashiwi yaba muli ici iciputusha yamoyene na yaba mu fimfungwa fyasangilwe pa numa.