Mulandu Nshi Kwabelele Icimusango ca Kwipaya AbaYuda mu Nkondo ya Calo Iya Bubili? Cinshi Lesa Ashaleseshe Cilya Cimusango?
Abengi abepusha aya mepusho balibepaile balupwa lwabo ne fibusa, kabili ico bepushisha te kufwaya fye ifyasuko, lelo bafwaya ukubasansamusha. Bamo batila icimusango ca kwipaya abaYuda ilyo kwali nkondo ya calo iya bubili calilangile sana ifyo abantu babipa imitima, ica kuti calikoseele abantu ukusumina muli Lesa.
Ifishili fya cine ifyo abantu balanda pali Lesa na pa cimusango ca kwipaya abaYuda mu nkondo ya calo iya bubili
Ubufi: Calilubana ukwipusha umulandu Lesa asuminishishe icimusango ca kwipaya abaYuda.
Icine: Abantu abali sana ne citetekelo nabo balipushapo ico Lesa asuminishisha ifyabipa ukulacitika. Ku ca kumwenako, kasesema Habakuki aipwishe Lesa ukuti: “Cinshi ico munengela ukumona icabipa, na imwe mulolesha fye pa bucushi? Kabili cinshi ico ukupokolola ifipe no bunkalwe fyabela pa ntanshi yandi, kabili cinshi ukuumana kwaimina, kabili cinshi ifikansa ficitilwa?” (Habakuki 1:3) Lesa takalipiile Habakuki, lelo alilengele amepusho aipwishe yalembwe mu Baibolo pa kuti bonse tuleyabelenga.
Ubufi: Lesa tabikako amano ku fyo abantunse bacula.
Icine: Lesa alipata ububifi no kucula ukwisako pa mulandu wa fyabipa ifyo abantu bacita. (Amapinda 6:16-19) Mu nshiku sha kwa Noa, Lesa “aumfwile ubulanda mu mutima wakwe” pa mulandu wa bunkalwe ubwasalangene pano isonde ponse. (Ukutendeka 6:5, 6) Ukwabula no kutwishika Lesa alyumfwile sana ububi ilyo kwali icimusango ca kwipaya abaYuda mu nkondo ya calo iya bubili.—Malaki 3:6.
Ubufi: Ukwipaya abaYuda mu nkondo ya calo iya bubili ni nshila iyo Lesa alekandilamo abaYuda.
Icine: Mu nshiku sha Bena Kristu ba kubalilapo, Lesa alisuminishe abena Roma ukonaula umusumba wa Yerusalemu. (Mateo 23:37–24:2) Nomba ukufuma ilya nshita, takwaba umutundu uo Lesa apaatulapo pa kuti aleucitila ifisuma nelyo pa kuti aukande. Lesa amona ukuti “Umuyuda tapusana namwina-fyaalo.”—Abena Roma 10:12, Bible wa Mushilo.
Ubufi: Nga ca kuti Lesa uwaba no kutemwa kabili uwa maka yonse e ko aba, nga alicilikile icimusango ca kwipaya abaYuda.
Icine: Nangu ca kuti Lesa te ulenga abantu balecula, inshita shimo alasuminisha ukucula.—Yakobo 1:13; 5:11.
Cinshi Lesa asuminishishe icimusango ca kwipaya abaYuda?
Umulandu umo wine uo Lesa asuminishisha abantunse bonse ukucula e o asuminishishe ne cimusango ca kwipaya abaYuda: pa kuti apwishe imilandu iyatendeke kale sana. Baibolo yalilanda ukwabula no kupita mu mbali ukuti Satana Kaseebanya e uteka icalo pali ino nshita, te Lesa. (Luka 4:1, 2, 6; Yohane 12:31) Kwaliba ifishinka fibili ifya mu Baibolo ifingatwafwa ukulondolola ico Lesa asuminishishe icimusango ca kwipaya abaYuda.
Abumbile abantu no buntungwa bwa kuisalilapo ifya kucita. Lesa alyebele abantu bakubalilapo Adamu na Efa, ifyo ale-enekela bena ukucita, nomba tabapatikishe ukumumfwila. Basalilepo ukulaisalila abene icisuma ne cibi, kabili ifyo basalilepo e lyo na fimbi ifyo abantu basalapo ukucita ukufuma na kale, fyalilenga abantunse ukulacula. (Ukutendeka 2:17; 3:6; Abena Roma 5:12) Ifi fine e fyo ne citabo ca Statement of Principles of Conservative Judaism cilanda, citila: “Ukukanabomfya bwino ubuntungwa batupeela ubwa kuisalila ifya kucita e kulenga sana abantu ukucula pano isonde.” Mu cifulo ca kuti Lesa atupoke ubuntungwa bwa kuisalila ifya kucita ubo atupeele, alipeela abantunse inshita ya kuti basambilile ukulabomfya bwino ubuntungwa abapeela.
Lesa kuti abuusha bonse abafwile ilyo kwali icimusango ca kwipaya abaYuda, kabili akababusha. Lesa alilaya ukubuusha amamilion ya bantu abafwa, ukubikako fye na bafwile ilyo kwali icimusango ca kwipaya abaYuda. Akafumyapo no kukalipwa ukucusha abapuswike ilyo kwali icimusango ca kwipaya abaYuda, e lyo ne fyabipa ifyo bebukisha. (Esaya 65:17; Imilimo 24:15) Ukutemwa uko Lesa atemwa abantunse kukalenga akafikilishe ifi alaya.—Yohane 3:16.
Abengi abo baipeye ilyo kwali ukwipaya abaYuda e lyo na bapuswike bali ne citetekelo muli Lesa kabili balishibe ico babela pano calo. Balishibe ne co Lesa alekela ifyabipa ukulacitika ne fyo afwaya ukuwamya ifintu.