Mashina ya Bani Ayalembwa mwi “Buuku lya Mweo”?

Icasuko ca mu Baibolo

Mwi “buuku lya mweo,” ilitwa no kuti “ibuuku lya kwibukisha,” mwalembwa amashina ya bantu abo Lesa akapeela umweo wa muyayaya. (Ukusokolola 3:5; 20:12; Malaki 3:16) Lesa e wishiba amashina ya abo bantu pantu baliba ne cishinka kuli ena kabili balamumfwila.​—Yohane 3:16; 1 Yohane 5:3.

Lesa alebukisha ababomfi bakwe aba cishinka ukufuma “pa kutendeka kwa calo,” ciba kwati alalemba amashina yabo mwi buuku. (Ukusokolola 17:8) Abele, umwaume uwali ne citetekelo, e o nalimo Lesa abalilepo ukulemba mwi buuku lya mweo. (AbaHebere 11:4) Ici tacilolele mu kuti Lesa nga alemba amashina yabo mwi buuku lya mweo ninshi abalabanako, lelo ici cilangililo ca kuti Yehova ni Lesa uwatemwa abantu bakwe, ‘alishiba abakwe.’​—2 Timote 2:19; 1 Yohane 4:8.

Bushe amashina kuti yafuutwa mwi buuku lya mweo?

Ee. Lesa aebele bacintomfwa ba mu Israele ati: “Uubembukile ine, e o ndefuuta mwi buuku lyandi.” (Ukufuma 32:33) Lelo nga twatwalilila ukuba aba cishinka kuli Lesa, amashina yesu yakatwalilila ukuba mwi “buuku lya mweo.”​—Ukusokolola 20:12.