Mulandu Nshi Nte sha kwa Yehova Bakaanina Ukwitila Ifikuulwa Bapepelamo Ati Amaceici?

Ishiwi lya ciGriki ilyo bapilibula limo ukuti “iceici,” lilosha ku lukuta, e kuti abantu abalongene ku kupepa, talilosha ku cikuulwa ca kupepelamo.

Moneni ici ica kumwenako: Ilyo umutumwa Paulo alembeele Abena Roma amakalata, alitumine umutende kuli Akula na Priska abaupene, kabili atile: “Posheni iceici ilikumanina mu ng’anda yabo.” (Abena Roma 16:5, Contemporary English Version) Muli aya mashiwi, Paulo taleposha icikuulwa. Lelo aleposha abantu abali mu cilonganino icalekumanina mu ng’anda ilya ine.a

Kanshi ifwe twasalapo ukulaita ifikuulwa tupepelamo ukuti “Ing’anda ya Bufumu” ukucila ukuti iceici.

Cinshi Twitila ukuti “Ing’anda ya Bufumu iya Nte sha kwa Yehova”?

Ili shina lyalilinga pa milandu iyakonkapo:

• Pantu icikuulwa ni ng’anda, nelyo icifulo apo tulonganina.

• Tulalonganinapo ku kupepa Yehova, Lesa uo Baibolo ilandapo, na ku kupeela ubunte, nelyo bukambone pali ena.—Amalumbo 83:18; Esaya 43:12.

• Na kabili epo tusambilila pa Bufumu bwa kwa Lesa, ubo Yesu alelandapo sana.—Mateo 6:9, 10; 24:14; Luka 4:43.

Mukwai tulemwita ukuti mukese pa Ng’anda ya Bufumu iyabela mupepi no ko mwikala, pa kuti mukeseimwena ifyo Inte sha kwa Yehova balongana.