Bushe Iciswango Icakashika Icalandwapo mu Ukusokolola Icipandwa 17, ni Cinshi?
Icasuko ca mu Baibolo
Iciswango ico balandapo mu Ukusokolola icipandwa 17, cimininako akabungwe akafwaya ukwikatanya ifyalo, kabili akemininako ifyalo fyonse mwi sonde. Pa kubala, baleketa ati League of Nations e lyo pali ino nshita baketa ati United Nations.
Ifitwafwa ukwishiba ici iciswango
Amabuteko. Iciswango icakashika cakwata “imitwe 7” ishimininako “impili 7” ne “imfumu 7” nelyo amabuteko. (Ukusokolola 17:9, 10) Muli Baibolo, impili ne fiswango fimininako amabuteko.—Yeremia 51:24, 25; Daniele 2:44, 45; 7:17, 23.
Ukupalana ne ciswango cimininako amabuteko ya calo conse. Ici iciswango icakashika calipalana sana ne ciswango ico balandapo mu Ukusokolola icipandwa 13 icimininako amabuteko ya calo conse. Ifi ifiswango fyonse fibili, fyakwata imitwe 7, insengo 10, kabili fyonse fyalilembwapo amashina ya miponto. (Ukusokolola 13:1; 17:3) Apo fyalipalana sana, ninshi ici icisangwo ica kashika na co cimininako amabuteko ya calo conse.—Ukusokolola 13:15.
Amabuteko ukucipeela amaka. Iciswango ca kashika “catuntuka” nelyo ukufumya amaka ku mabufumu yambi.—Ukusokolola 17:11, 17.
Ukubombela pamo ne filonganino fya mapepo. Babiloni Mukalamba, e kutila ifilonganino fya mapepo fyonse ifya bufi, aikala pa ciswango cakashika, ukulangilila fye ukuti ifilonganino fya mapepo filabombela pamo ne ci iciswango.—Ukusokolola 17:3-5.
Ukusaalula Lesa. Ici iciswango cakwata “amashina ya miponto umubili onse.”—Ukusokolola 17:3.
Ukuleka ukubomba pa nshita imo. Iciswango ca kashika cali no kuba mu “cilindi cabula impela pa nshita imo”a nelyo ukuleka ukubomba, lelo pa numa cali no kutendeka ukubomba na kabili.—Ukusokolola 17:8.
Ukufikilishiwa kwa busesemo bwa mu Baibolo
Natulande pa fyo akabungwe ka United Nations na kabungwe kabalilepo aka League of Nations, kafikilishe ubusesemo bwa mu Baibolo ubulanda pa ciswango icakashika.
Amabuteko. Akabungwe ka United Nations kalatungilila amabuteko pa kulenga “ifyalo fyonse ifyaba muli aka kabungwe ukukwata maka yamo yene.”b
Ukupalana ne ciswango cimininako amabuteko ya calo conse. Mu 2011, icalo calenga 193 calingiile mu kabungwe ka United Nation. Kanshi, aka akabungwe e kemininako ifyalo ifingi.
Amabuteko ukucipeela amaka. Ifyalo ifyaba muli aka akabungwe, e fikapeela amaka yonse ayo kakwata.
Ukubombela pamo ne filonganino fya mapepo. Ifilonganino fya mapepo fyalitungilila sana akabungwe ka League of Nations na ka United Nations.c
Ukusaalula Lesa. Akabungwe ka United Nations kapangilwe ukuti “kaleleta umutende.”d Nangu twingamona kwati balicitile fye bwino, ukucita ifi kusaalula Lesa pantu alanda ukuti Ubufumu bwakwe e bwingaleta fye umutende.—Amalumbo 46:9; Daniele 2:44.
Ukuleka ukubomba pa nshita imo. Akabungwe ka League of Nations, bakapangile ilyo fye Inkondo ya Kubalilapo iya Calo yapwile pa kuti umutende ukatwalilile ukubako. Na lyo line, ilyo Inkondo ya Calo iya Bubili yatendeke mu 1939, kalilekele ukubomba. Mu 1945 ilyo Inkondo ya Calo iya Bubili yapwile, balipangile akabungwe ka United Nations. Ifyo aka akabungwe kabomba, ifyo kafwaya ukucita ne fyo kapangwa, fyalipalana sana na kabungwe ka League of Nations.
a Icitabo ca Vine’s Expository Dictionary of Old and New Testament Words cilanda ukuti, ishiwi lya ciGriki ilyo bapilibula mu maBaibolo ayengi pamo nga Baibolo ya King James Version ukuti “icilindi cabula impela,” lipilibula ukukanalacita ifili fyonse nelyo icifulo uko umuntu ashingacita icili conse.
b Belengeni Article 2 mu lupapulo lwa Charter of the United Nations.
c Ku ca kumwenako, mu 1918, akabungwe akemininako amacalici ya ba Protestanti ayengi mu America kalandile ukuti akabungwe ka League of Nations “kemininako ubufumu bwa kwa Lesa pa calo.” Mu 1965, abaleimininako ifilonganino fya baBuddha, ba Katolika, ba Eastern Orthodoxy, abaHindu, abaShilamu, abaYuda, na ba Protestanti balikumene ku San Francisco ku kutungilila no kupepelako akabungwe ka United Nations. Na kabili mu 1979, Papa John Paul II alandile ukuti akabungwe ka UN “e kakatwalilila ukuba pa ntanshi mu kuleta umutende no mulinganya pa calo.”
d Belengeni Article 1 mu lupapulo lwa Charter of the United Nations.