Bushe Ulubembu Ulushingelelwa E Cinshi?
Icasuko ca mu Baibolo
Ulubembu ulushingelelwa lubembu ulo muntu engacita ninshi ali namapange ayengalenga Lesa e mwelela. Bushe umuntu kuti akwata shani amapange ya musango uyu?
Lesa abelela uluse abantu abalapila no kutendeka ukukonka amafunde yakwe e lyo no kucetekela muli Yesu Kristu. (Imilimo 3:19, 20) Na lyo line, umuntu kuti atemwa ukucita imembu ica kuti talefwaya no kuleka. Baibolo ilondolola umuntu wa musango uyo ukuti alaba no “mutima uwabipa” kabili alatalama “pa mulandu wa kubeleleka kwa lubembu.” (AbaHebere 3:12, 13) Aba kwati cipe ce bumba ico bapisha mu mulilo ico mushingapangamo cimbi, kabili umutima wa uyo muntu te kuti uleke ukufwaya ukukalifya Lesa. (Esaya 45:9) Tapali nangu cimo icingalenga Lesa ukwelela uyo muntu, kanshi alaba no lubembu ulushingelelwa.—AbaHebere 10:26, 27.
Bashimapepo ba baYuda bamo abaliko mu nshiku sha kwa Yesu balicitile ulubembu ulushingelelwa. Balishibe ukuti umupashi wa mushilo uwa kwa Lesa e walelenga Yesu alecita ifipesha amano, lelo balelanda ukuti alefumya amaka kuli Satana Kaseebanya.—Marko 3:22, 28-30.
Ifya ku mwenako fya membu isho Lesa eleela
Ukupontela Lesa mu kukanaishiba. Umutumwa Paulo ali uwa miponto, lelo alilekele kabili atile: “Nabelelwe uluse, pantu nshaishibe ifyo nalecita kabili nacitiile mu kubula icitetekelo.”—1 Timote 1:13.
Ubucende. Baibolo yalilanda pa bantu bamo abacitilepo ubucende, lelo abayalwike kabili na Lesa alibabelele uluse.—1 Abena Korinti 6:9-11.
“Bushe nalipanga ulubembu ulushingelelwa?”
Nga ca kuti mulomfwa ububi pa fyo mwalecita kabili mulafwaisha ukwaluka, ninshi tamwacita ulubembu ulushingelelwa. Lesa kuti atubelela uluse nangu twabwekeshapo ukucita ulubembu lumo lwine, kulila fye tulefwaisha ukwaluka.—Amapinda 24:16.
Abantu bamo bamona kwati balipanga ulubembu ulushingelelwa pa mulandu wa kuti balomfwa sana ububi pa fyo bacitile. Na lyo line, Baibolo ilanda ukuti te lyonse twingacetekela ifyo tumfwa. (Yeremia 17:9) Lesa tatusuminisha ukulapingula abantu bambi e lyo no kulaipingula fwe bene. (Abena Roma 14:4, 12) Lesa kuti atwelela nangu ca kutila umutima kuti watwalilila ukulatupeela imilandu.—1 Yohane 3:19, 20.
Bushe Yuda Iskariote alicitile ulubembu ulushingelelwa?
Ee. Ubufunushi bwalengele alaiba indalama isho bali no kulabomfya ku mulimo wa mushilo. Na kabili alecita kwati alibikile amano ku bapiina e lyo ninshi ico alefwaya kukwata indalama ishingi isha kuti ebe. (Yohane 12:4-8) Pa nshita imo umutima wa kwa Yuda walefwaya fye ukucita ifyabipa ica kuti alishitishe na Yesu pa ndalama sha sifere 30. Yesu alishibe ukutila Yuda te kuti alapile pa fyo acitile, kabili amwebele ukuti “uli no konaulwa.” (Yohane 17:12) Ici calolele mu kuti ilyo Yuda afwile ali no konaulwa umuyayaya kabili taali no kubuushiwa.—Marko 14:21.
Yuda talapiile pa fyo acitile. Tayebelele kuli Lesa, lelo ayebelele kuli bashimapepo balya bene ashitisheko Yesu.—Mateo 27:3-5; 2 Abena Korinti 7:10