Bushe Lesa Aba Fye Mpanga Yonse?
Icasuko ca mu Baibolo
Lesa alamona fyonse kabili kuti acita ifili fyonse ukuli konse uko alefwaya. (Amapinda 15:3; AbaHebere 4:13) Na lyo line, Baibolo taisambilisha ukuti Lesa aba fye mpanga yonse nelyo mu fintu fyonse. Lelo isambilisha ukuti e ko aba no kuti alikwata icifulo uko ekala.
Ifyo Lesa aba: Lesa mupashi. (Yohane 4:24) Abantu te kuti bamumone. (Yohane 1:18) Ifimonwa ifingi ifilanda pali Lesa ifyaba mu Baibolo filanga ukuti Lesa alikwata uko ekala. Baibolo tailanda ukutila aba fye mpanga yonse.—Esaya 6:1, 2; Ukusokolola 4:2, 3, 8.
Uko Lesa ekala: Lesa ekala ku muulu. Baibolo itila Lesa alikwata ‘uko ekala, ku muulu.’ (1 Ishamfumu 8:30) Na kabili Baibolo yalilandapo inshita imo ilyo bamalaika baile “ku kwiminina pa ntanshi ya kwa Yehova,”a icilelangilila ukuti Lesa alikwata icifulo uko ekala.—Yobo 1:6.
Lesa nga taba fye mpanga yonse, bushe kuti atusakamana?
Ee. Lesa alibika amano ku muntu umo umo. Nangu ca kuti ekala ku muulu alamona abantu abekala pano isonde abacita ifyo afwaya kabili alabafwa. (1 Ishamfumu 8:39; 2 Imilandu 16:9) Moneni ifyo Yehova acita pa kwafwa abantu aba ne cishinka kuli ena:
Ilyo mulepepa: Yehova alakutika amapepo lilya line fye mwatendeka ukupepa.—2 Imilandu 18:31.
Ilyo muli no bulanda: “Yehova ali mupepi ku baba ne mitima ya bulanda; kabili apususha abasakamikwa imitima.”—Amalumbo 34:18.
Ilyo mulefwaya uwa kumutungulula: Yehova ‘akamucenjesha no kumusambilisha’ ukubomfya Icebo cakwe, Baibolo.—Amalumbo 32:8.
Bushe cishinka Lesa aba mpanga yonse?
Ubufi: Lesa aba fye mu fintu fyonse.
Icishinka: Lesa tekala pe sonde nelyo mu cintu icili conse. (1 Ishamfumu 8:27) Ca cine ukuti intanda na fyonse ifyo Lesa apanga ‘filabila ubukata bwa kwa Lesa.’ (Amalumbo 19:1) Na lyo line, Lesa tekala mu fyo abumba filya fine uulenga ifikope ashingekala mu fyo alenga. Lelo nga twamona icikope kuti twaishibapo fimo pa walengele icikope. E fyo caba na kuli Lesa, ifyo abumba filalenga twaishiba “imibele yakwe” pamo nga amaka, amano, no kutemwa.—Abena Roma 1:20.
Ubufi: Pa kuti Lesa aleishiba ifintu fyonse kabili pa kuti akwate amaka pa fintu fyonse alingile ukuba mpanga yonse.
Icishinka: Lesa abomfya umupashi wakwe nelyo amaka ayabomfya pa kucita ifintu. Lesa abomfya umupashi wa mushilo pa kwishiba ifintu na pa kucita ifintu pa nshita iili yonse kabili ukuli konse ukwabula umwine ukuyako.—Amalumbo 139:7.
Ubufi: Baibolo pa Amalumbo 139:8 isambilisha ukuti Lesa aba fye mpanga yonse pantu patila: “Nga nanina naya ku muulu, e ko mwaba; kabili nga nayanshika ubusanshi bwandi ku Nshiishi, moneni na ko e ko mwaba.”
Icishinka: Ili lembo talilanda pa cifulo uko Lesa aba. Lelo litusambilisha fye ukuti takuli ku cifulo uko twingaba uko Lesa engafilwa ukutwafwa.
a Baibolo itila ishina lya kwa Lesa ni Yehova.