Ukulingana na Baibolo

Bushe Lesa Aba Fye Apali Ponse?

LESA bamulondolola bwino bwino ukuti wa maka yonse kabili aishiba fyonse. Lelo, pa kufwaisha ukulondolola ubukulu bwa kwa Lesa, bamo balilundako amashiwi na yambi aya kuti uwaba fye apali ponse. Basumina ukuti Lesa aba fye mpanga yonse.

Nangu ca kuti ubu bulondoloshi butatu tabusangwa mu Baibolo, ubwa kubalilapo bubili bulatungililwa na masambilisho ya mu Malembo. (Ukutendeka 17:1; AbaHebere 4:13; Ukusokolola 11:17) Ca cine Lesa wa maka yonse kabili alishiba fyonse pantu takwaba nangu cimo icingafisama kuli wene. Lelo bushe aba fye mpanga yonse? Bushe Lesa asangwa fye apali ponse, nelyo bushe alikwata ubwikalo bwa cine cine uko ekala?

Bushe Lesa Aba Kwi?

Mu Baibolo, amashiwi ya kuti “mu muulu” yalosha ku cifulo “capampamikwa ica kwa Lesa.” (1 Ishamfumu 8:39, 43, 49, NW; 2 Imilandu 6:33, 39) Lelo, ilyashi limo ilya mu Baibolo lilondolola ubukulu bwa kwa Yehova Lesa na ya mashiwi: “Bushe cine cine Lesa engekala ku bantu pano nshi? Moneni, imyulu no muulu wa myulu te kuti imukumane.”—2 Imilandu 6:18.

Baibolo itila: “Lesa Mupashi.” (Yohane 4:24) Kanshi, ekala ukwikala imipashi ukushimoneka. Ilyo Baibolo ilando kuti “mu muulu” e bwikalo bwa kwa Lesa, ilosha ku kusumbuka kwa cifulo ekalako icapusanako ne cifulo ico ifwe twikalamo. Icacindamisha ca kuti, Baibolo isambilisha ukuti icifulo uko Lesa ekala, tacimoneka, lelo ici cifulo e ko caba kabili cifulo ica cine cine—Yobo 2:1-2.

Lesa E Ko Aba Icine Cine

Yesu alandile pa bwikalo bwa kwa Yehova ilyo alandile ku basambi bwakwe ukuti: “Mu ng’anda ya kwa Tata mwaba apa kwikala apengi. . . . Ndeya ku kumupekanishisha apa kwikala.” (Yohane 14:2) Ni kwi Yesu aile? Asukile ‘aingila, umwashila mu muulu mwine, nomba ku kumoneka ku cinso ca kwa Lesa pa mulandu wesu.’ (AbaHebere 9:24) Ili lembo litusambilisha ifintu fibili ifyacindama pali Yehova Lesa. Ica kubalilapo, Lesa alikwata icifulo ca cine cine uko ekala, kabili ica bubili, e ko aba icine cine, te maka fye ayashingalondololwa ayaba apali ponse.

E mulandu wine Yesu asambilishishe abakonshi bakwe ukupepa ukuti: “Shifwe wa mu muulu” e kuti ukupepa ku wabako icine cine, Yehova, uwakwata ubwikalo, ku cifulo ca ku mupashi icalondololwa mu Baibolo ukuti “mu muulu.” (Mateo 6:9; 12:50) Uku kufunda takwapusene ne nshila abantu ba kwa Yehova balesambilishiwa ukupepa pa myaka ukucila pali 1,500. Ifyalembwa ifyakokwesha ifyapuutwamo na Lesa fyakwata ili pepo: “Lengeleni mu ca kwikalamo cenu ca mushilo, mu muulu, no kupaala abantu benu.”—Amalango 26:15.

Umupashi wa Mushilo uwa kwa Lesa Uufika fye Konse

Nangu ca kuti Baibolo lyonse ilosha kuli Lesa ukuti alikwata ubwikalo bwa cine cine, ilingi line ilanda pa mupashi wakwe uwa mushilo ukuti wena waba fye apali ponse. Kemba wa malumbo Davidi aimbile ukuti: ‘Bushe ndeya kwi mfumeko ku mupashi wenu? kabili ndefulumukila kwi mfumeko ku cinso cenu?’ (Amalumbo 139:7) Bamo balafilwa ukumfwikisha amalembo nge li kabili basondwelela ukuti Lesa aba fye mpanga yonse. Lelo, nga twabelenga icipandwa conse na malembo yambi, cilamonekesha fye ukuti umupashi wa mushilo uwa kwa Yehova waba maka ayabomba, kabili kuti watumwa ukufuma ku cifulo uko Yehova ekala ukuya ku cifulo icili conse mu bubumbo bonse.

Ukupala ukuboko kwa kwa wishi ukwingafika pa nshi ku kusansamusha no kutungilila abana bakwe, ukuboko kwa kwa Yehova nelyo umupashi wa mushilo kuti wafika ku ncende ili yonse iyaba mu bwikalo bwa mipashi nelyo mu bubumbo bonse ku kupwishishisha ubufwayo bwakwe. Kanshi, kemba wa malumbo kuti asosa ukuti: “Nga nabuula amapindo ya macaca, nayaikala ku lutwe lwa bemba, no ko kwine ukuboko kwenu kuti kwantungulula, no kwa kulyo kwenu kuti kwanjikatilila.”—Amalumbo 139:9, 10.

Kuti Mwaba Cibusa wa kwa Lesa

Mu kuicefya kabili mu kutemwa Yehova Lesa alasuminisha ukulondolola ubwikalo bwakwe no mwine wine mu mashiwi ayo abantunse bengomfwikisha pa lwa cifulo uko ekala no musango abelamo. Muli iyi nshila ne nshila shimbi, ciba kwati “akontamina pa nshi ku kulolesha pa myulu na pe sonde.” (Amalumbo 113:6, New International Version) Lelo, abantunse te kuti bomfwikishe imibele ya kwa Lesa icine cine.

Yehova alipuulama icine cine, aliba uwakulisha, kabili uwa kupapusha, ica kuti kuti caba icayafya ukumulondolola bwino bwino mu mashiwi abantunse bengomfwikisha. Nangu ca kuti Amalembo yalalanda pa bwikalo bwa kwa Lesa mu kulungatika, abantunse bena te kuti bomfwikishe ubukulu bwa ico cifulo umupwilapo.—Amalumbo 139:6.

Lelo, cilasansamusha ukwishiba imibele imo iya kwa Yehova iya cine. Cilasansamusha ukwishibo kuti Lesa taaba maka ayashingalondololwa kabili taaba fye maka ayacilo buntunse ayaba mu fintu fyonse mu bubumbo. Lelo, e ko aba icine cine, alikwata no ko ekala kabili aba ne mibele pamo ngo kutemwa no kunakilila. Ukwishiba kwa musango yo kulenga abantunse bonse ukuba na mashuko ya kuba no bumi bwa muyayaya, no kuba na bucibusa na Mulopwe Wa maka yonse uwa kubumbwa konse.—Yakobo 4:8.