Bushe Isonde Likonaulwa?

Icasuko ca mu Baibolo

Awe, isonde talyakatale alyonaulwa, nelyo ukocewa nangu ukufumishiwapo. Baibolo isambilisha ukuti Lesa apangile isonde ukuti lileikalwamo umuyayaya.

• “Abalungama e bakekala mu calo, kabili bakekalamo umuyayaya.”—Amalumbo 37:29.

• “Mwashimpile [Lesa] isonde pa cifulo ca liko icapampamikwa; talyakatelentenshiwe umuyayaya, umuyayaya.”—Amalumbo 104:5.

• “Isonde lyaikalilila fye umuyayaya.”—Lukala Milandu 1:4.

• “Kapanga we sonde kabili Kalenga wa liko, . . . ushalipangiile apa fye, lelo uwalipangiile ukuti lileikalwamo.”—Esaya 45:18.

Bushe abantu bakonaula isonde?

Lesa takaleke abantu bakonaule isonde ku fiko, ku nkondo, nelyo ukubomfya ifintu fimbi. Lelo “akonaula abaleonaula isonde.” (Ukusokolola 11:18) Nomba akabonaula shani?

Lesa akafumyapo amabuteko ya bantu, ayafilwa ukucingilila abantu kabili akapyanikapo Ubufumu bwa ku muulu. (Daniele 2:44; Mateo 6:9, 10) Yesu Kristu Umwana wa kwa Lesa e ukalateka muli ubu Ubufumu. (Esaya 9:6, 7) Ilyo Yesu ali pano isonde, alicitile ifyalangile ukuti alikwata amaka pa fyabumbwa. (Marko 4:35-41) Apo Yesu ni Mfumu ya Bufumu bwa kwa Lesa, akakwata amaka pe sonde na pa fyabumbwa. Akawamya ifintu pano isonde kabili akalenga ifintu fikabe nga fintu fyali mwi bala lya Edeni.—Mateo 19:28; Luka 23:43.

Bushe Baibolo isambilisha ukuti isonde likapya ku mulilo?

Awe te fyo isambilisha. Amashiwi ayaba pali 2 Petro 3:7 e yalenga abantu balemona kwati isonde likapya, patila: “Imyulu ne sonde ifya nomba fyasungilwa umulilo.” Natulande pa fishinka fibili ifyalatwafwa ukwishiba umwalola aya mashiwi:

1. Amashiwi ya kuti “imyulu,” “isonde,” no “mulilo” ayo Baibolo yabomfya tayalosha fye ku cintu cimo. Ku ca kumwenako, pa Ukutendeka 11:1 patila: “Isonde fye lyonse balelanda fye ululimi lumo lwine.” Pali ili lembo ishiwi lya kuti “isonde” lilosha ku bantu.

2. Amashiwi yaba mupepi na 2 Petro 3:7 yalalenga twaishiba umwalola imyulu, isonde, no mulilo. Icikomo 5 na 6 cilanda pe Lyeshi ilyaliko mu nshiku sha kwa Noa. Pali ilya nshita, isonde lyalyonaike, lelo talyafuminepo. Lelo Ilyeshi lyafumishepo fye abantu nelyo “isonde.” (Ukutendeka 6:11) Ilyeshi lyalyonawile ne “myulu” e kutila abantu abaleteka abantu. Kanshi bantu babipa abaonawilwe te sonde twikalamo. Noa no lupwa lwakwe balipuswike ilyo isonde pali ilya nshita lyaonawilwe kabili pa numa ya Lyeshi baikele pano isonde.—Ukutendeka 8:15-18.

Nga filya Ilyeshi lyaipeye abantu e fyo no “mulilo” uwalandwapo pali 2 Petro 3:7 ukonaula abantu ababipa, tawakonaule isonde twikalamo. Lesa alitulaya “imyulu ipya ne sonde lipya” “umukaba ubulungami.” (2 Petro 3:13) “Isonde lipya,” nelyo abantu bakalatekwa ne “imyulu ipya” e kutila Ubufumu bwa kwa Lesa. Ilyo ubu Ubufumu bukalateka, isonde likaba paradaise.—Ukusokolola 21:1-4.