Ifyo Balenga pa Cibumba mu Egupti Balifilandapo mu Baibolo

Ici icibumba apo balenga fimo icalepa amamita 8 caba mupepi no mwinshi we tempele lya kale ilya mu Egupti ilya kwa lesa Amun mu Karnak. Abasambilila sana balanda ukuti ifyo balenga pali ici cibumba filangilila ifyo Farao Shishak acimfishe ifyalo fyali lwa ku kapinda ka ku kuso aka Egupti, ukubikako fye ne citungu ca Yuda no bufumu bwa bena Israele ubwa ku kapinda ka ku kuso.

Pali ici cibumba balengapo Amun alepeela Shishaki nelyo Sheshonki abafungwa abacilile pali 150 ninshi nababakaka.a Cila mufungwa emininako umusumba nelyo abantu abo acimfishe. Amashina ya misumba bayalemba pa mubili wa cila mufungwa. Amashina ayengi ayo balemba pali ici icibumba yacili yalamoneka kabili yamo ababelenga Baibolo baliyeshiba bwino sana. Pali aya mashina paba na Bete-sheani, Gibeone, Megido na Shunemu.

Ifyo basanshile abaYuda balifilandapo mu Baibolo. (1 Ishamfumu 14:25, 26) Na kuba Baibolo yalilondolola fyonse ifyo Shishaki acitile. Baibolo itila: “Mu mwaka walenga isano uwa kuteka kwa Mfumu Rehoboamu, Shishaki imfumu ya ku Egupti aishile ku kulwisha Yerusalemu, . . . na maceleta 1,200 na bale-endela pali bakabalwe 60,000; kabili abantu abo ali na bo abafumine ku Egupti bali imintapendwa. . . . Apokele imisumba ya malinga iya bena Yuda kabili asukile aisa na ku Yerusalemu.”—2 Imilandu 12:2-4.

Ifyo balenga pa cibumba ca mu Karnak te filanga fye ifyo Shishaki acimfishe imisumba ya bena Israele, lelo kwaliba ifya kale na fimbi ifilanda pa fyo acimfishe. Pa cipaapaatu ce libwe ica kale sana ico basangile apali umusumba wa Megido uo balandapo mu Baibolo na po paliba ishina lya kuti “Sheshonki.”

Ifi Baibolo yalanda ifya cine pa fyo Shishaki acimfishe imisumba ya mu Yuda filanga ukuti abalembele Baibolo bali ne cishinka. Balilondolwele ukwabula ukushamo nangu cimo ifyo abantu babo bacimfishe e lyo ne fyo babacimfishe. Bambi abalembele amalyashi ya kale tabali ne cishinka nge fi abalembele Baibolo bali.