“Ndabombela Yehova Apapela Amaka Yandi”

Ba Irma, abekala ku Germany bali ne myaka mupepi na 90. Pa mulandu wa kuti baliponene ububi sana imiku ibili kabili balibalepwilepo imiku iingi ku cipatala, balafilwa ukubila imbila nsuma ku ng’anda ne ng’anda nga fintu balebomba kale. Pali ino nshita ba Irma nga balefwaya ukulanshanya na balupwa wabo e lyo na bantu fye bambi abo baishiba, balalemba amakalata. Abantu balitemwa amakalata ba Irma balemba aya kukoselesha e lyo na ya kusansamusha abafwililwe, ica kutila balabatumina amafoni no kubepusha ilyo bakabalembela amakalata na yambi. Balabatumina na makalata ya kubatasha, umo babalomba ukulemba amakalata na yambi. Ba Irma batile: “Fyonse ifi filenga ndeba ne nsansa kabili filalenga ndetwalilila ukubila imbila nsuma.”

Ba Irma balatuma amakalata ku bakoloci banabo. Batile: “Kwali banakulu bantu bamo abantumine foni kabili abatile kalata yandi yalibakoseleshe ilyo abena mwabo bafwile. Basungila ilya kalata muli Baibolo yabo kabili balitemwa ukuibelenga icungulo bushiku. Umwanakashi na umbi uo abena mwakwe bafwile nomba line, alandile ati kalata yalimukoseleshe sana ukucila amashiwi ya bashimapepo ba kwi calici apepa. Alikwete amepusho ayengi kabili alefwaya ukuti tukamonane.”

Umwanakashi umo uushili Nte uwaishibana na ba Irma, alikuukile ku cifulo cimbi kabili aebele ba Irma ukuti balemulembela amakalata. Ba Irma batile: “Ulya mwanakashi alisungile amakalata yandi yonse, ilyo afwile umwana wakwe alintumine foni. Anjebele ati alibelengele amakalata yandi yonse ayo nalebeele banyina kabili atile alefwaya nkalemulembelako pa fyaba mu Baibolo.”

Ba Irma balitemwa ukubila imbila nsuma muli iyi nshila. Batile: “Mpaapaata Yehova ukuti alempeela amaka pa kuti nkatwalilile ukumubombela. Nangu ca kuti ndafilwa ukuya mu kubila imbila nsuma ku ng’anda ne ng’anda, ndabombela Yehova apapela amaka yandi.”