Ifyo Bapangile Amavidio ya pa Ukulongana kwa Citungu Ukwa mu 2020 Ukuleti ‘Mulesekelela Lyonse’!

Amavidio ya pa kulongana kwa citungu yalatufika pa mutima kabili yalalenga twaumfwikisha ifyo Baibolo isambilisha. Pa Ukulongana kwa Citungu ukwa mu 2020 ukuleti ‘Mulesekelela Lyonse’! pali amavidio 114. Pali aya amavidio, pali na mavidio 43 aya malyashi ayo aba mwi Bumba Litungulula na bakafwa wabo balandile. Bushe mwalishiba ifyo bamunyinefwe na bankashi babombeshe pa kupanga aya amavidio e lyo ne ndalama shapooselwepo pa kubomba uyu umulimo?

Bamunyinefwe na bankashi mupepi na 900 mwi sonde lyonse bali-ipeeleshe ukubombako umulimo wa kupanga amavidio ya pa kulongana kwa citungu. Mu myaka ibili iyo babombele uyu mulimo bapooselepo ama-awala yali mupepi na 100,000. Pali aya ama-awala pali na ma-awala 70,000 ayo bapoosele pa kupanga vidio ya mamineti 76 iya cangalo ca mu Baibolo icitila Nehemia: “Ukusekelela Muli Yehova E Bucingo Bwenu.”

Kwena twalibomfeshe indalama ishingi pa kuti tusakamane abaitemenwe ukubombako uyu mulimo, e lyo no kubapekanishisha ifyo balekabila pamo nga ifya kubomfya pa kukopa, umwakukopela amavidio, ne fintu fimbi ifyo balekabila pa kupanga amavidio.

Ba Jared Gossman ababombela ku dipartimenti ya Audio/Video Services batile: “Aba muli Komiti ya Kusambilisha iye Bumba Litungulula bafwaya mu mavidio mwaba abantu aba mu fyalo ifyalekanalekana e lyo ne fifulo ifyapusanapusana. Ico bacitila ifi ni co bafwaya ukutulanga ukuti tuli ba bwananyina mwi sonde lyonse. Pa kuti mu mavidio muleba abantu aba mu fyalo ifyalekanalekana ne fifulo ifyapusanapusana, amabumba 24 aya bakupanga amavidio yalipangilwe mu fyalo 11. Twalekabila indalama ishingi no kupekanya bwino ifintu pa kuti aya amabumba ya bakukopa amavidio yabombele pamo.”

Pa kupanga amavidio yesu ayengi, tulakabila ifya kubomfya ifyaibela pa kukopa na pa kupanga umwakukopela amavidio. Ku ca kumwenako, ilyo twalekopa vidio itila Nehemia: “Ukusekelela Muli Yehova E Bucingo Bwenu,” twalipangile umwakukopela iyi vidio mu cikuulwa ca kukopelamo amavidio ica ku Mt. Ebo mupepi na ku Patterson, mu musumba wa New York, ku America. Pa kuti tubomfye bwino indalama isho abantu basangula ku mulimo wa kwa Yehova, pa kupanga iyi vidio babomfeshe imbao isha-anguka pa kuti bapange ifibumba ifyalemoneka nga filya ifibumba fya musumba wa Yerusalemu fyalemoneka. Cimo calelepa amamita 6. Pa kuti bafipange filemoneka nge fibumba, babomfeshe imbao e lyo babikako ifyalelenga ishi imbao shalamoneka kwati cibumba bakuulila na matafwali. Ifi ifyalemoneka nge fibumba balefibomfya ku kupanga umwakukopela umwalekanalekana, kabili ici calengele bebomfya ifingi. Na lyo line, pa kupanga fye iyi vidio imo iya cangalo ca mu Baibolo twalekabila indalama mupepi na madola ya ku America 100,000 (K2,050,000).a

Ukwabula no kutwishika, ukwishiba ifi twalondolola pa fyo cali pa kupanga amavidio ya pa kulongana kwa citungu ukwa uno mwaka kwalenga twalatasha sana pali uku ukulongana. Tatuletwishika ukuti ifyo bamunyinefwe na bankashi baipeeleshe pa kupanga amavidio ya pa kulongana kwa citungu nafilenga Yehova alumbanishiwa mwi sonde lyonse. Tulemutasha nga nshi pa fyo musangwilako ku mulimo wa mwi sonde lyonse ukubomfya donate.jw.org ne nshila shimbi.