Amaofeshi ya Bakapilibula Ayalenga Abantu Abengi nga Nshi Ukunonkelamo

Pa mabumba ya bakapilibula ayo twakwata, amabumba ayengi tababombela pa maofeshi ya musambo, babombela pa maofeshi ya bakapilibula ayo beta no kuti ama RTO. Busuma nshi bwaba mu kubombela pa ma RTO? Finshi bakapilibula bakabila pa kuti balebomba bwino imilimo yabo ilyo balebombela pa RTO? Kabili bushe icifulo uko bakapilibula balebombela cikuma shani ifyo bapilibula?

Ukubombela pa maofeshi ya bakapilibula kulalenga bakapilibula baleikala ku ncende uko abantu abengi balanda ululimi bapilibula. Ba Karin abapilibula iciLow German batile: “Ukutula apo twaishila ku musumba wa Cuauhtémoc, ku Chihuahua, mu Mexico, tulanda fye iciLow German na bakapilibula banensu, ilyo tulebila imbila nsuma, na lintu tuleshita ifintu. Twikala ukwikala abantu abalanda ululimi lwesu. Tulomfwa insoselo isho tushaumfwilepo pa nshita ntali, kabili tuleshiba bwangu amashiwi ayo abantu baleka ukubomfya.”

Ba James ababomba ne bumba lya bapilibula iciFrafra ku Ghana, balandile ukuti inshita shimo balafuluka ukubishanya no lupwa lwa pa Bethel pa maofeshi ya musambo. Lelo batile: “Nalitemwa ukubombela pa RTO. Ndaba ne nsansa icine cine nga ndebila imbila nsuma mu lulimi lwa cikaya e lyo no kumona ifyo abantu batemwa ukumfwa imbila nsuma.”

Bushe bamunyinefwe bacita shani pa kusala ukwa kukuulila amaofeshi ya bakapilibula? Ba Joseph ababombela mu Dipartimenti Ilolekesha pa Makuule mwi Sonde Lyonse ku Warwick, ku New York, U.S.A. batile: “Ubwafya bumo tukwata bwa kuti ku ncende shimo takuba amalaiti nelyo amenshi nelyo Intaneti iikabilwa pa kutuma ifyebo fya kupilibula. Kanshi tulatontonkanya pa ncende ishapusanapusana uko balanda sana ululimi bapilibula.”

Kwena inshila iya-anguka kabili iishakosa umutengo iya kupangilamo RTO, kuipangila pa Cikuulwa ca Kulonganinamo Ukulongana Kukalamba, pa Ng’anda ya Bufumu, nelyo pa ng’anda ya bamishonari, apo bakapilibula bengalaya fye ukufuma ku mayanda. Nga ca kuti takuli icikuulwa nangu cimo pali ifi twalandapo, bamunyinefwe kuti babasuminisha ukushita icikuulwa ca kwikalamo bakapilibula e lyo na maofeshi ya kubombelamo. Nga ca kuti ifyo ibumba lya bakapilibula lilekabila fya-aluka, kuti ca-anguka ukushitisha ifi fikuulwa kabili indalama kuti bashibomfya uko shilekabilwa sana.

Balabapeela Ifikabilwa pa Kutwalilila Ukubomba

Mu mwaka wa mulimo uwa 2020, indalama twabomfeshe ku ma RTO shali K285 milioni. Ababombela mu ma RTO balakabila amakompyuta, amaprogramu ya pa kompyuta, ifya kubomfya pa kukopa amashiwi, Intaneti, e lyo ne fintu fimbi pamo nga amenshi na malaiti. Pa kushita kompyuta iya kwa kapilibula umo e lyo no kubikapo fyonse ifikabilwa pa kuti ilebomba, cikabilwa indalama nalimo K16,500. Pali kompyuta imo na imo balashitilapo amaprogramu, kabili balabikapo na programu beta ukuti Watchtower Translation System, iyo bakapilibula babomfya pa kubomba umulimo wabo e lyo na pa kusanga ifyebo fimo ifibafwa ukubomba bwino.

Bakapilibula balapokelela ne fibombelo fya kubomfya pa kukopa amashiwi, ifyo babomfya ukukopelako amashiwi mulya mwine mu maofeshi babombela. Ifi fibombelo fyalibombele bwino sana ilyo icikuko ca COVID-19 catendeke, pantu bakapilibula abengi balisendele ifi fibombelo ku mayanda no kutwalilila ukupilibula impapulo sha kulemba e lyo na mavidio ukubomfya ifi fibombelo.

Aba bwananyina abafwilishako imilimo pa RTO balapituluka mu mpapulo bakapilibula bapilibwile kabili balabombako no mulimo wa kusakamana no kuwamya ifikuulwa fya pa RTO. Ba Cirstin ababombela pa RTO apo bapilibula iciAfrikaans mu musumba wa Cape Town mu South Africa, balandile abati: “Bakasabankanya abengi na bapainiya ba nshita yonse balikwata ishuko lya kubombako imilimo imo pano.”

Aba bwananyina abaya mu kwafwilishako imilimo pa RTO balaipakisha icine cine. Nkashi umo uwafwilishako imilimo pa maofeshi ya bakapilibula alandile ukuti ukuya mu kubombako pa RTO kulakoselesha nga nshi. Bamunyinefwe na bankashi bamo abekala mupepi na maofeshi ya bakapilibula balabakopa amashiwi no kuyabika mu mavidio na mu fya kukutikako. Ba Juana abapilibula iciTotonac mu musumba wa Veracruz, ku Mexico, batile: “Apo nomba twaba mupepi na matauni umo abantu balanda ululimi lwesu, cilanguka ukusanga bamunyinefwe na bankashi abakubomfya mu mavidio na mu fya kukutikako.”

Nomba bushe ukukwata amaofeshi yabakapilibula kulalenga ifyo bapilibula ukuwaminako? Abantu abengi nga nshi ababelenga impapulo shesu baasuka ukuti ee. Ba Cédric ababomba ne bumba lya bakapilibula ilya ciKongo mu Democratic Republic of Congo, batile: “Bamunyinefwe na bankashi bamo baleita iciKongo twalepilibula ukuti ‘iciKongo ca mu mpapulo sha Watch Tower,’ pantu calipusene ne ciKongo abantu abengi balanda. Nomba ino nshita balanda ukuti impapulo shesu bashipilibula mu ciKongo ca muno nshiku, ico abantu balanda cila bushiku.”

Ifi fine e fyo na ba Andile ababomba ne bumba lya bakapilibula ilya ciXhosa mu South Africa nabo baumfwile abantu balelanda. Batile: “Abantu abengi batweba ati balimona ukuti twalyalula ifyo tupilibula impapulo.” Balandile no kuti: “Nangu fye bana abatemenwe ukubelenga Ulupungu lwa kwa Kalinda mu ciNgeleshi nomba babelenga mu ciXhosa. Balitemwa sana ifyo Baibolo ya Amalembo ya Calo Cipya iya mu ciXhosa yapilibulwa bwino.”

Imisangulo ya kuitemenwa iya mwi sonde lyonse, ukubikako fye ne yo musangula ukubomfya donate.jw.org, e yo tubomfya pa kukuula no kuwamya amaofeshi ya bakapilibula, e lyo no kusakamana ababombelapo.