Inshila Shimo Isho Tubomfya Ishishingalenga Isonde Lyaonaika e lyo ne fyo Aba bwananyina Banonkelamo

Abantu balyonaula sana isonde, lelo fwe Nte sha kwa Yehova twalishiba ukuti Yehova ali no kuwamya isonde. (Ukusokolola 11:18) Nangu ca kuti twalishiba ukuti Yehova ali no kuwamya isonde, tatucita ifili fyonse ifingalenga isonde lyaonaika. Ku ca kumwenako, tulabomfya inshila ishishingalenga isonde ukonaika pa fifulo fyesu ifya kupepelapo.

Ico tubomfesha ishi nshila mulandu wa kuti, tufwaya ukucefyako nelyo ukukanacita ifintu ifingalenga isonde lyaonaika. Ni nshila nshi shimo isho tubomfya ishi shingalenga isonde lyaonaika? Kabili bushe ishi nshila shilenga shani Tulebomfya bwino imisangulo iyo bamunyinefwe basangula?

Inshila Tubomfya mu Fikuulwa fya Kulonganinamo Ukulongana Kukalamba pa Kuti Tamulekaba Sana

Icikuulwa ca Kulonganinapo Ukulongana Kukalamba ica Matola icaba ku Mozambique bacikuulile mu nshila iya-anguka. Babikilepo fye amalata ukwabula ukukuula ifibumba. Uyu mutenge walelenga mu cikuulwa mulekaba sana. Munyinefwe umo alandile ukuti: “Kwalekaba sana ica kuti twalepiba sana! Pa numa fye ya kulongana, bamunyinefwe baleangufyanya ukufumina panse pa kuti bapupweko umwela.” Finshi twacitile pa kwafwa bamunyinefwe ukukwata icifulo ca kulonganinamo icisuma?

Twasalilepo ukubika amafani ayo tubika pa mutenge wa cikuulwa ayashibomfya amalaiti, lelo ayashinguluka no mwela. Kabili twalibikile ne fyali no kulenga mu cikuulwa mwilakaba sana kabili muleba umwela uusuma. Aya amafani tayakabila amalaiti lelo yashinguluka fye no mwela kabili yalafumya umwela uwakaba mu cikuulwa. Tukabila fye amadola nalimo 50 pa kushita fani imo.a

Iyi nshila yalilenga mu cikuulwa ca kulonganinapo ukulongana kukalamba muleba umwela uusuma. Ne ci cilenga mwilaba umutonshi kabili mwilaba sana umwela wa carbon dioxide, lelo muleba umwela uusuma uwa oxygen. Ifi twalandapo filalenga abalelongana balekutikisha kabili balelongana mu nshila iisuma. Munyinefwe uo tulandilepo atile: “Pali ino nshita tatufuma bwangu panse pa numa ya kupwisha ukulongana. Lelo tulekala mu kati pa nshita ya kutuusha kabili tulakwata inshita ya kulanshanya ne fibusa. Ukuba muli ici cikuulwa icipya kumfwika kwati wikele mwi samba lya cimuti icikulu kabili icisuma sana.”

Ifyo Tubomfya Ifintu Pamo nga Akasuba, Umwela ne Mfula

Pa fikuulwa fyesu ifingi ifya kulonganinapo mwi sonde lyonse, tulabikapo ama solar. Ne ci cilenga twilabomfya sana inshila ishikowesha umwela. Ama solar tayafumya ifili fyonse ifikowesha umwela kabili yalalenga tulebomfya bwino imisangulo iyo tusangula.

Mu 2022, twalibikile ama solar pa Bethel ya ku Slovenia. Aya ama solar yatupeela icipimo ca malaiti ukufika ku ma pesenti 30 ayo tubomfya pali iyi Bethel. Nga ca kuti pa nshita imo twakwata amalaiti ukucila pa yo tukabila pali iyi Bethel, tulapeelako abena mupalamano amalaiti. Twapoosele indalama ukufika ku madola 360,000. Kanshi apo iyi Bethel tayakulabomfya indalama ishingi pa kulipila amalaiti, indalama isho bakasunga mu myaka 4, shikalingana ne sho babomfeshe pa kushita ama solar.

Mu 2024, twalibikile ama Solar pa Bethel ya ku Sri Lanka. Twabomfeshe indalama ukufika ku madola 3 milioni pa kuti fye tubike aya ama Solar, kabili yatupeela icipimo ca malaiti ukufika ku ma pesenti 70 ayo tubomfya pali iyi Bethel. Kanshi indalama isho bakasunga mu myaka itatu, shikacila ne sho babomfeshe pa kushita ama solar. Mu mwaka umo wine, twalibikile ama solar pa Bethel ya ku Netherlands. Twabomfeshe indalama amadola 1.1 milioni pa kupwisha uyu mulimo. Kabili aya ama solar yatupeela icipimo ca malaiti ukufika ku mapesenti 35 ayo tubomfya pali iyi Bethel. Kanshi indalama isho bakasunga mu myaka 9, shikalingana ne sho babomfeshe pa kushita ama solar.

Na kabili twalibika ama solar pa maofesi ayengi aya bakapilibula (ama RTO) mu Mexico. Ku ca kumwenako: katulandeko pe ofesi lya bakapilibula ilya Tarahumara (Central) RTO ilyabela mu Chihuahua. Mu nshita ya mpepo kulatalala sana kabili mu lusuba namo kulakaba sana. Pa mulandu wa kuti amalaiti yalikosa sana umutengo, bamunyinefwe balefilwa ukubomfya ama mashini ayakafya no kutalalika umwela. Munyinefwe Jonathan uubombela pali aya amaofesi alandile ukuti: “Mu nshita ya mpepo twalefwala ifya kufwala ifya kaba kabili twalefimbana na malangeti, lyena mu lusuba twaleisula amawindo.”

Mu 2024 balibikile ama solar pali aya amaofesi ya bakapilibula. Babomfeshe indalama amadola 21,480 pa kupwisha uyu mulimo, lelo indalama isho bakasunga mu myaka 5, shikalingana ne sho babomfeshe pa kushita ama solar. Pali ino nshita bamunyinefwe balabomfya ama mashini ayakafya no kutalalika umwela. Ba Jonathan balandile no kuti: “Tulaba ne nsansa ilyo tulebomba umulimo wa kupilibula impapulo , kabili ici cilalenga tulebombesha. Na kabili tulomfwa bwino ifi icilonganino cesu cibomfya bwino imisangulo ne nshila ishishonaula isonde.”

Ukubomfya Amenshi ya Mfula

Amayanda ya Bufumu ayengi mu Africa, tabakwata ukwakufumya amenshi ayasuma. Ne ci cilenga aba bwananyina inshita shimo baletapa amenshi ukutali no kwabela Ing’anda ya Bufumu. Lyena pa mayanda ya Bufumu yamo, bamunyinefwe balashita amenshi ya kubomfya kabili babomfya imyotoka ishikalamba pa kubatwalila amenshi. Nomba ukucita ifi kulalenga balebomfya indalama ishingi kabili iyi nshila ilalenga isonde ukonaika.

Pa kuti bamunyinefwe balekwata amenshi, twalibika imipaipi umuponena amenshi ayafuma pa mutenge ilyo imfula ileloka, kabili twalibika na matanki pa Mayanda ya Bufumu ayengi mu Africa. Ilyo bashilabika imipaipi na matanki, bamunyinefwe babalilapo ukumona ifyaba imiceele ya kuli iyo ncende pa kuti babike ifikalabomba bwino. Indalama shonse pamo isho twabomfeshe pa kubika ifi pa Ng’anda ya Bufumu shali amadola pa kati ka 600 na 3,000. Ici calilenga aba bwananyina belabomfya sana indalama mu kusakamana Ing’anda ya Bufumu, pantu pali ino nshita tabalipila pa kuti bakwate amenshi.

Iyi nshila ilalenga bamunyinefwe balekwata amenshi ayasuma. Ba nkashi Noemia aba ku Mozambique balandile ukuti: “Twale-enda intamfu iitali pa kuti fye tusange ukwa kutapa amenshi. Kanshi twalenaka sana pa kuti fye tufike pa Nga’anda ya Bufumu. Pa mulandu wa kuti calyafishe ukukwata amenshi, caletukosela ukuba no busaka. Lelo pali ino nshita bonse fye cilatwangukila ukuba no busaka. Tulasamba ku minwe lyonse. Kabili tulanonkelamo ilyo tulelongana pantu tatunaka sana. Tulatasha icine cine!”

Bushe icilonganino cesu cifumya kwisa indalama sha kubomfya pa kuti tucite ifi twalandapo ? Shifuma ku misangulo ya mwi sonde lyonse iyo tusangula ukubomfya inshila ishalekanalekana ishaba pa donate.jw.org. Tulatasha sana pa fyo muipeelesha ukusangwilako!