Imbila Nsuma Ukufuma Kuli Lesa

Amashiwi yonse ayaba mu Baibolo yafuma kuli Lesa. Shifwe wa mu muulu alitupeela Baibolo pa kuti tulesambililamo. Umfweni imbila nsuma iilanda pa kufyalwa kwa bantu babili iyafumine ku muulu imyaka 2,000 iyapita. Uwaletele iyi imbila nsuma ni malaika Gabriele, “uwiminina pa ntanshi ya kwa Lesa.” (Luka 1:19) Bushe ifintu fyali shani ilyo malaika alandile pa kufyalwa kwa kwa Yohane Kabatisha na Yesu?

Mu 3 B.C.E. e lyo Gabriele aletele iyi mbila nsuma iyafumine kuli Lesa. Ni kwi atwele imbila nsuma ya kubalilapo? Aile mu mpili sha Yudea, ishali mupepi na Yerusalemu, uko Sekaria, shimapepo wa kwa Yehova aleikala. Sekaria no mwina mwakwe Elisabete bali abakalamba, kabili tabakwete abana. Pali iyi nshita, Sekaria e wali shimapepo pe tempele lya kwa Lesa mu Yerusalemu. Ilyo Sekaria ali pe tempele, amwene fye Gabriele aisa pa ciipailo apo baletuulila ifyanunkila.

Sekaria alyumfwile umwenso. Lelo malaika amukoseleshe ati: “Witiina, Sekaria, pantu ukupapaata kobe nakumfwika, no mukashi obe Elisabete akakufyalila umwana umwaume, kabili ukamwinike ati Yohane.” Gabriele asosele no kuti Yohane “akaba umukalamba ku cinso ca kwa Yehova” kabili ‘akapekanishisha Yehova abantu.’—Luka 1:13-17.

Sekaria alifililwe ukusumina. Mulandu nshi? Pantu ena no mwina mwakwe bali abakalamba. E ico Gabriele amwebele ati: “Walaba cibulu kabili tawakulalanda mpaka no bushiku ifi fintu fikacitika, pantu tausumiine amashiwi yandi.”—Luka 1:20.

Abali pa nse ye tempele balepapa fye ukuti Sekaria akokola mu kati. Awe asukile afuma, lelo talelanda. Alepanga fye ifishibilo ne minwe. Cali-ilangile fye apabuuta tuutu ukuti alimwene icisungusho mwi tempele.

Ilyo Sekaria apwishishe umulimo alebomba pe tempele, abweleele ku ng’anda. Tapakokwele, na Elisabete aimita! Ilyo Elisabete alelolela ukufyalwa kwa mwana wakwe, pa myeshi 5 iya kulekeleshako, aleikala fye pa ng’anda pantu talefwaya ukulamonekela ku bantu.

Gabriele alibwelele na kabili. Ni kuli ani aile? Kuli Maria, umwanakashi umushimbe, uwaleikala ku kapinda ka ku kuso, mu musumba wa Nasarete uwali mu citungu ca Galili. Cinshi malaika aebele Maria? Gabriele atile: “Lesa nakupaala.” Kabili akonkenyepo ukusosa ati: “Mona! ukemita no kufyala umwana umwaume, kabili ukamwinike ati Yesu. Uyu akaba umukalamba kabili aketwa ati Umwana wa Wapulamo, . . . kabili akaba Imfumu umuyayaya pa ng’anda ya kwa Yakobo, no Bufumu bwakwe tabwakabe ne mpela.”—Luka 1:30-33.

Ukwabula no kutwishika, Gabriele alyumfwile bwino ilyo bamupeele ishuko lya kweba Sekaria na Maria imbila nsuma. Ilyo tulebelenga na fimbi pali Yohane na Yesu twalamona ico imbila nsuma iyo malaika aebele Sekaria na Maria yacindamina.