Bushe Inte sha kwa Yehova Balalekanya Indupwa Nelyo Balalenga Shaikatana?

Fwe Nte sha kwa Yehova tulabombesha ukwikatanya indupwa shesu e lyo ne sha bantu bambi. Twalicindika Lesa uwatendeke ulupwa. (Ukutendeka 2:21-24; Abena Efese 3:14, 15) Lesa alabomfya Baibolo ukusambilisha abantu amashinte ya mafunde aya-afwa abantu mwi sonde lyonse ukuba ne fyupo ifyakosa kabili ifya nsansa.

Ifilenga Inte sha kwa Yehova Balekwata Indupwa Ishakosa

Tulabombesha ukukonka ifyo Baibolo ilanda, pantu filatwafwa ukuba abalume abasuma, abakashi abasuma e lyo na bafyashi abasuma. (Amapinda 31:10-31; Abena Efese 5:22–6:4; 1 Timote 5:8) Ifyaba mu Baibolo filafwa ne ndupwa umwaba abapepa ukwapusanapusana ukuba ne nsansa. (1 Petro 3:1, 2) Moneni ifyo abalume na bakashi abo abena mwabo baishileba Inte sha kwa Yehova balandile:

• “Imyaka iya kubalilapo 6 mu cupo cesu twaleumana fye kabili twalekalifyanya. Ilyo ba Ivete baishileba Inte ya kwa Yehova, balelanda sana ukuti balintemwa kabili bali ne cikuuku. Ifi bayalwike fyalengele icupo cesu cipwa.”—E fyalandile ba Clauir, aba ku Brazil.

• “Ilyo ba Chansa batendeke fye ukusambilila Baibolo ne Nte sha kwa Yehova, nalebakaanya pantu nalemona ukuti ba Nte balalekanya indupwa. Nomba ukutula apo batendekele ukusambilila Baibolo nalimona ukuti Baibolo yalitwafwa mu cupo cesu.”—E fyalandile ba Agness, aba ku Zambia.

Ilyo tulebila imbila nsuma tulasambilisha abantu ifya kubomfya ifyo Baibolo isambilisha pa kuti ilebafwa

• Ukusala bwino uwa kuupana nankwe

• Ukwishiba ifya kucita mu mwaka wa kubalilapo nga baupana

• Ukwishiba ifya kucita pa kuti baleumfwana na bapongoshi

• Ukulabomfya bwino indalama

• Ukuleka ukuumana

• Ukulaelela

• Ukusambilisha bwino abana

Bushe uwaupwa nelyo uwaupa nga aba Inte ya kwa Yehova kuti calenga mu cupo mwaba amafya?

Ukulanda fye icishinka limo cilalenga mu cupo mwaba amafya. Ku ca kumwenako, lipoti imo iya mu 1998 iyo akampani ako beta ukuti Sofres kalembele, yatile pa fyupo 20 icupo cimo umwali uwaupa nelyo uwaupwa mwaleba amafya ayakalamba sana nga ca kuti umo atendeke ukupepa ku Nte sha kwa Yehova.

Yesu asobele ukuti abali no kulakonka ifyo alesambilisha bali no kukwata amafya mu lupwa. (Mateo 10:32-36) Uwasambilila sana ilyashi lya kale Will Durant alandile ukuti ilyo ubuteko bwa bena Roma bwaleteka, “Abena Kristu balibapeele umulandu wa kulekanya indupwa,”a kabili na muno nshiku mwine Inte sha kwa Yehova shimo balashipeela umulandu umo wine. Bushe ici cilolele mu kuti ba Nte balalekanya indupwa?

Ilyo icilye ca European Court of Human Rights calepingula umulandu umo bapeele Inte sha kwa Yehova umulandu wa kulekanya indupwa, icilye catile balupwa abashili ni Nte sha kwa Yehova ilingi line e baleta amafya pantu “balakaana ukusumina no kucindika insambu isho lupwa wabo akwata isha kupepa uko alefwaya no kulacita ifyo asuminamo.” Icilye calandile no kuti: “Ubu ubwafya bwaliseka ku baba mu ndupwa umo bapepa ukwapusana kabili ifi fine e fyo caba na ku baba Inte sha kwa Yehova.”b Nangu ca kuti Inte sha kwa Yehova balabacusha kuli balupwa, balesha na maka ukukonka ifyo Baibolo ilanda, itila: “Mwilabwesesha ububi pa bubi. . . . Mule-esha na maka yenu yonse ukuba aba mutende ku bantu bonse.”—Abena Roma 12:17, 18.

Mulandu nshi Inte sha kwa Yehova basuminina ukuti balingile fye ukuupa nelyo ukuupwa kuli Nte munabo?

Inte sha kwa Yehova balakonka ifyo Baibolo ilanda pa kupiila nelyo ukupiilwa “muli Shikulu epela,” e kutila ukuupana fye na Nte munabo. (1 Abena Korinti 7:39) Ili lifunde lyaba mu Baibolo kabili lilabomba no kubomba. Ku ca kumwenako, ulupapulo lumo ulwa Journal of Marriage and Family ulwa mu 2010 lwatile, “abaupana abapepa kumo kwine, abasumina muli fimo fine” balomfwana sana.c

Inte sha kwa Yehova tabakoselesha ba Nte banabo abaupana nabashili ba Nte ukusha abena mwabo. Baibolo itila: “Ngo wa bwananyina ali no mukashi uushatetekela, kabili umukashi asumina ukwikala nankwe, tafwile ukumusha; kabili umwanakashi uuli no mulume uushatetekela, no mulume asumina ukwikala nankwe, tafwile ukusha umulume wakwe.” (1 Abena Korinti 7:12, 13) Inte sha kwa Yehova balakonka ili funde.