ABACAICE BEPUSHA UKUTI
Bushe Baibolo Kuti Yangafwa Shani?—Ulubali 1: Ukwishiba Ifyaba mu Baibolo
“Ndabelenga Baibolo, nomba yalikulisha imona ukuti te kuti nkumanishe ukuibelenga.”—E fyalandile Briana.
Bushe na iwe e fyo umfwa? Ifili muli cino cipande kuti fyakwafwa!
Cinshi ulingile ukubelengela Baibolo?
Bushe nga watontonkanya pa kubelenga Baibolo ulomfwa ubunang’ani? Ifi nga e fyo umfwa wilaumfwa ububi. Baibolo ikalamba kabili tamwaba ne fikope, mwaba fye utulembo utunono, nomba nga wailinganya ku fiba pa TV na mu mavidio nalimo kuti wasalapo ukutamba ifi ukucila ukubelenga Baibolo!
Nomba tontonkanya pali ici: Nga walisangile icibokoshi icikalamba ica umo mutengo, bushe teti utemwe ukwishiba ifili mu kati?
Baibolo yaba kwati cibokoshi ica mutengo kabili ifya bamo kuti fyakwafwa sana
Ukwishiba ifya kusalapo bwino pa fintu
Ukwishiba ifya kulaumfwana bwino na bafyashi bobe
Ukwishiba ifya kukwata ifibusa ifisuma
Ukwishiba ifya kucita pa kuti wilasakamana sana
Bushe icitabo icalembelwe kale sana, kuti catwafwa muno nshiku? Ee, pantu “Amalembo yonse aya mushilo yafuma kuli Lesa.” (2 Timote 3:16) Ici cilolele mu kuti, ukupanda amano ukwaba Baibolo kwafuma ku muntu uwakwatisha amano.
Baibolo yaba nga icibokokoshi ica umo mutendo umwaba icuma e kutila amano
Ningile ukubelenga shani Baibolo?
Inshila imo kubelenga ukufuma ku ntendekelo ukufika ku mpela. Nga wacita ifi kuti waishiba ilyashi lyonse ilyo Baibolo ilandapo. Kwaliba inshila ishingi isho wingabelengelamo Baibolo. Natulandeko pa nshila shibili:
Kuti wabelenga amabuuku yonse 66 aya mu Baibolo filya fine fye yakonkana ukufuma ku Ukutendeka ukufika ku Ukusokolola.
Kuti wabelenga amabuuku ya mu Baibolo ayalanda pa lyashi limo line nelyo ukulingana ne fyo ifintu ifyalecitika fyakonkene.
Ifingakwafwa: Mu Akatabo ka Kutwafwa Ukusambilila Icebo ca kwa Lesa mwaliba ifyacitike ifyakumine ubumi bwa kwa Yesu ilyo ali pano isonde.
Inshila imbi wingabomfya kulabelenga amalyashi ya mu Baibolo ayalingene sana ne filekucitikila. Ku ca kumwenako:
Nga ulefwaya ukwishiba ifyo wingacita pa kuti ukwate ifibusa ifyo wingacetekela. Kuti wabelenga pa lyashi lya kwa Yonatani na Davidi. (1 Samwele ifipandwa 18 ukufika ku 20) Lyena kuti wabomfya apo imisepela ingalemba “How to Find Loyal Friends” no kumona ifyo wingasambililako kuli ili lyashi.
Nga ulefwaya ukwishiba ifyo wingakaana ilyo balekutunka ukucita fimo. Kuti wabelenga ilyashi lya kwa Yosefe no kusambililako ifyo acitile pa kuti akaane ukucita ifyo balemutunka ukucita. (Ukutendeka icipandwa 39) Lyena kuti wabomfya apo imisepela ingalemba “How to Resist Temptation . . . Joseph—Part 1” na “Falsely Accused! Joseph—Part 2” no kumona ifyo wingasambililako kuli ili lyashi.
Nga ulefwaya ukwishiba ifyo ipepo lingakwafwa. Kuti wabelenga pali Nehemia. (Nehemia icipandwa 2) Lyena kuti wabomfya apo imisepela ingalemba “God Answered His Prayer” no kumona ifyo wingasambililako ku lyashi lyakwe.
Ifingakwafwa: Ilyo ulebelenga Baibolo uleba ukushili icongo pa kuti uleumfwikisha ifyo ulebelenga.
Inshila ya butatu iyo wingabomfya, kusala ilyashi lya kubelenga, nga wapwa ukubelenga lyena mona ifyo wingabomfya ifyo wabelenga. Nga wabelenga, kuti wayipusha aya mepusho:
Mulandu nshi Yehova abikilemo ili lyashi mu Baibolo?
Finshi ndesambililako pali Yehova na pa fyo acita ifintu?
Kuti nabomfya shani ifi fyebo mu bumi bwandi?
Ifingakwafwa: Panga ifyo ulefwaya ukucita. Lembela limo ubushiku ilyo wingatemwa ukutendeka ukubelenga Baibolo.