Ifyo Mwingatwalilila Ukuba Abapimpa
1 Ukupimpa kwa kwa Apolo mu mulimo wakwe kuti kwatucinkulako ulwa fyo Abena Kristu banensu pali lelo bapimpa, sana sana mu kubila imbila nsuma. (Imil. 18:24-28) Lelo kwena ifwe bonse twakonkomeshiwa ukuti: “Mwilashingashinga mu mulimo wenu. Mube ababilima ku mupashi.” (Rom. 12:11) Cinshi cingatwafwa ukuba abapimpa mu mulimo wa Bwina Kristu kabili cinshi cingatwafwa kutwalilila ukuba ifyo?
2 Ukwishiba Kuti Kwalenga Twapimpa: Ilyo Yesu amoneke ku basambi bakwe babili no ‘kubelwila ifyamulembelwe mu Malembo yonse,’ batile: “Bushe imitima yesu tayacilabilima ilyo acilalanda na ifwe mu nshila, ilyo acilatukupukwila Amalembo?” (Luka 24:27, 32) Bushe na ifwe imitima yesu taibilima ku nsansa nga twaishiba umwalola ifyebo fyaba mu Cebo ca kwa Lesa? Cine cine icitetekelo cilakoshiwa nga twaishibilapo na fimbi. Ilembo lya Abena Roma 10:17 lilondolola ukuti: “Icitetekelo cifuma ku caumfwika.” Imitima yesu nga yaisulamo isubilo mu malayo ya kwa Yehova, te kuti tuleke ukulalanda pa fyo twasambilila!—Amalu. 145:7; Imil. 4:20.
3 Nga tulefwaya icitemwiko cesu muli Lesa ukukosa no kutwalilila ukuba abapimpa mu mulimo wakwe, tatufwile ukwikalila fye mu fyo twasambilila kale. Tufwile ukutwalilila ukulasambilila icine no kukushishako icitemwiko cesu muli Yehova. Nakana nga te ifyo, umulimo wesu kuli Lesa kuti waba wa kubombela fye ico cine. (Ukus. 2:4) Icebo ca kwa Lesa citukoselesha ukuti “muleya . . . muleisulamo ukwishiba Lesa bwino bwino.”—Kol. 1:9, 10.
4 Ifyo Twatantika Ukuisambilisha: E ico kanshi kuti cawama ukuiceeceeta fwe bene no kumona ifyo tucita pa kuisambilisha. Ku ca kumwenako, kuti twashila pa fyasuko fye sambililo lya Ulupungu lwa kwa Kalinda no kwasuka fye bwino bwino. Lelo bushe tulabelenga amalembo yabikilwemo no kwetetula pa fyo twingabomfya ifyo fyebo? Mu kubelenga Baibolo ukwa cila mulungu, bushe tulabombesha ukufwailisha ifyebo na fimbi nga kuti twakumanisha ukucite co e lyo no kwetetula pa masambililo yalimo? (Amalu. 77:11, 12; Amapi. 2:1-5) Ala cisuma nga nshi ukwetetula no kobelwa mu Cebo ca kwa Lesa! (1 Tim. 4:15, 16) Nga tuleisambilisha muli uyu musango kuti twakosha imitima yesu kabili kuti twaba “abapimpilile milimo isuma.”—Tito 2:14.