“Bushe ca Cine Ukuti Lesa Alapingula Abantu Ukuyapya mu Helo?”
“Bushe mulasambilila ifya kwa Lesa?”
Ici cipusho capapwishe Joel na Carl. Aba abalumendo babili—ababomfi ba kuitemenwa aba pa maofeshi yakalamba aya Nte sha kwa Yehova mu Brooklyn, New York—balemona fitabo mwi tuuka lya fitabo ilyabela mupepi no ko bekala. Ilyo Joel alebebeta amakonkodansi ya Baibolo, Carl alemushimikila ifyo aipakishe ukulanshanya na umo mu butumikishi. Pa kukutikako ifyo aba balelanshanya, umwaume waiminine mupepi na ba balumendo apaleme kuli bene.
Lelo, icasakamike sana uyu mwaume te kufwaya fye ukwishiba nga aba balumendo balesambilila ifya kwa Lesa. Alondolwele ati: “Ine ndi muYuda, kabili abanandi bamo Abena Kristu banjeba ati nkapya mu helo pa mulandu wa kuti abaYuda balikene Yesu. Ici cilansakamika sana. Ukukanda kwa musango uyo ukucitwa na Lesa wa kutemwa te kusuma. Bushe ca cine ukuti Lesa alapingula abantu ukuyapya mu helo?”
Joel na Carl baebele uyu mwaume walefwaisha ukumfwa ukuti bali basambi ba cine cine aba Baibolo. Bamulangile mu Baibolo ukuti abafwa tabaishiba nangu kamo no kuti balaala fye utwamfwa ukulolela ukubuushiwa. Kanshi tabacululushiwa nelyo ukupya mu helo. (Amalumbo 146:3, 4; Lukala Milandu 9:5, 10; Daniele 12:13; Yohane 11:11-14, 23-26) Pa mpela ya kulanshanya kwabo ukwasendele baminiti 45, uyu mwaume apeele Joel na Carl akeyala kakwe no kwipusha ukuti bakaye mulondolwelako na fimbi pa mulandu umo wine.
Nga ca kuti helo cali cifulo ca kulungulushishamo abantu ku mulilo, bushe kuti kwaba uwingalomba ukuyako? Lelo, icikolwe Yobo, uwafwaile ukulubukako ku macushi yakwe, alombele ati: “Nani wingampa ici, ukuti mwingancingilila mu helo, no kumfisa ukufikila ubukali bwenu bwapita?” (Yobo 14:13, Douay Version) Cailanga fye ukuti Yobo tasumine ukuti helo cifulo ca kulungulushishamo abantu. Lelo, afwaile ukuti e mo acingililwe. Imfwa kukanabako, na helo Baibolo ilandapo ni nshishi ya bantu bonse.
Nga mulefwaya ukwishibilapo ifitucitikila nga twafwa ne subilo lingabako ilyo twafwa, mukwai tulemucincisha ukutulembela.