Icilonganino ca mu Yerusalemu na BaYuda Basalanganine Kumbi

Yakobo uwasangilweko ilyo kwali ukukumana uko balelanda pa fifulo fya kushimikilamo, ali ni kangalila mu cilonganino ca mu Yerusalemu. (Imilimo 12:12, 17; 15:13; Abena Galatia 1:18, 19) Alimwene ifyacitike pa Pentekoste wa 33 C.E. lintu abaYuda abengi pali balya bafumine mu fyalo fimbi baishile ku mutebeto no kumfwa imbila nsuma e lyo no kubatishiwa.—Imilimo 1:14; 2:1, 41.

Ukutula lilya abaYuda abengi baleisa ku kusefya imitebeto ya pa mwaka. Mu musumba mwaleisula abantu ica kuti abeni baleikala mu mishi yali mupepi nelyo ukusaka insakwe no kwimika amatenti. Encyclopaedia Judaica yalanda ukuti pa mbali ya kukumanya ifibusa, abaYuda baileingila na mwi tempele no kupepa, ukupeela amalambo, no kubelenga Tora.

Takuli na kutwishika ukuti Yakobo na balya aali nabo mu cilonganino ca mu Yerusalemu baleshukila iyi nshita ukushimikila ku baYuda balefuma ku fyalo fimbi. Abatumwa bafwile balebomba mu kucenjela sana pali iyi nshita lintu ‘kwaimine ukupakasa kukalamba pa cilonganino icali mu Yerusalemu’ pa mulandu wa kuti Stefani alipaiwe. (Imilimo 8:1) Ifyalembwa filanga ukuti ilyo ukupakaswa kushilatendeka na lintu kwapwile, kwali ukulunduluka pantu Abena Kristu bali abacincila mu kushimikila.—Imilimo 5:42; 8:4; 9:31.

Cimbi icalelenga ukuti baleishiba ifyalecitika ku calo ca kumwabo ni balya bantu baleya ku Yerusalemu cila mwaka ku mitebeto. Tubelenga ifi mu calembwa ca Imilimo 2:9-11 icilanda pali Pentekoste wa mu 33 C.E. AbaYuda basangilwe ku mutebeto bafumine ku Partia, ku Media , ku Elamu, ku Mesopotamia, ku Kapadokia, ku Ponte, ku Asia, ku Frugia, ku Pamfulia, ku Egupti, ku Libya, ku Roma, ku Krete, na ku Arabia.