Ico Abantu Abengi Balomba Pano Calo

ELENGANYENI ukuti abantu amabilioni nalimo yabili balelomba icintu cimo cine ukuti cicitike. Balelomba kateka wapulamo ukuti abacitile ico balefwaya. Lelo pali aba pali fye abanono sana abeshibe ico balelomba. Bushe ico kuti cacitika? Ukwabula no kutwishika cilacitika cila bushiku. Cinshi aba bantu bonse balomba? Balomba ukuti Ubufumu bwa kwa Lesa bwa kwa Lesa bwise!

Abafwailisha ifishinka basanga ukutila, kwaba ifilonganino fya mapepo nalimo 37,000 umwaba abatila Bena Kristu kabili abalanda no kuti Yesu Kristu e Ntungulushi yabo. Muli ifi filonganino fyalekanalekana mwaba abantu ukucila pa mabilioni yabili. Abengi nga nshi ababa muli ifi filonganino balapepa ipepo ilyo abengi beta ati Ipepo lya We Shifwe nelyo Ipepo lya kwa Shikulu. Bushe mwalilishiba ili pepo? Nga filya fine Yesu asambilishe abasambi bakwe, ili pepo litendeka ifi: “Shifwe wa mu muulu, ishina lyenu lishishiwe [atemwa licindikwe]. Ubufumu bwenu bwise. Ukufwaya kwenu kucitwe pano isonde nga mu muulu.”—Mateo 6:9, 10.

Palipita imyaka iingi nomba, abantu balapepa sana ili pepo nga bali ku calici ku kupepa. Na kabili balisungila ili ipepo ku mutwe no kulalipepa lintu bali pamo ne ndupwa shabo na lintu bali fye beka, ilyo kwacitika ifisuma nangu ifibi. Abantu balabikako amano pa kulanda amashiwi yaba muli ili pepo kabili balayalanda no mutima onse. Abengi abasungila ku mutwe amashiwi yaba muli ili pepo, bayalanda fye ukwabula no kutontonkanya sana pa fyo yapilibula. Na bashili Bena Kristu balasuubila Ubufumu bwa kwa Lesa ukwisa kabili na bo balabupepela.

Na Bashili Bena Kristu Balapepela Ubufumu

Kwaba ipepo lya baYuda ilyaishibikwa sana ilyo bapepa nga bali ne cililo nangu ca kutila ifilandwapo muli ili pepo te mfwa nelyo ifya malanda. Muli ili pepo balomba ukuti: “Mwe [Lesa], shi leteni Ubufumu bwenu ilyo ncili no mweo . . . kabili angufyanyeni ukucite co.”a Mwi pepo na limbi ilya kale ilyo abaYuda bapepa mwi sunagoge batila kukesa Ubufumu bwa kwa Mesia uukafuma mu lupwa lwa Davidi.

Na bambi ababa mu mipepele ishili ya Bena Kristu na bo balafwaya Ubufumu bwa kwa Lesa. Inyunshipepala ya ku India iya The Times of India, yalandile pali shimapepo umo uwaishibikwa sana mu calo ca India uwaliko mu myaka ya ba1800. Uyu muntu, alefwaisha sana ukwikatanya imipepele ya baHindu, abaShilamu na Bena Kristu. E calengele asose ukuti: “Pa kuti Ubufumu bwa kwa Lesa ubwa cine cine bukese kano Abena Kristu na bashili Bena Kristu bakatendeke ukupepela pamo.” Kabili kafundisha mukalamba pa koleji imo iya baShilamu mwi tauni lya Strathfield, ku Australia, nomba line alembeele abalemba inyunshipepala ukuti: “Ine pamo na baShilamu bonse, nalicetekela [ukuti] Yesu akabwela no kwisatendeka ukuteka Ubufumu bwa kwa Lesa ubwa cine cine.”

Ukwabula no kutwishika, kwaba abantu abengi nga nshi abasuubila no kupepela Ubufumu bwa kwa Lesa. Nomba tontonkanyeni pa cishinka cimo icacindama.

Mufwile mwalishiba ukuti fwe Nte sha kwa Yehova, fwe balemba ino magazini, tulaya ku mayanda ya bantu ku kulanda na bo pa fyaba mu Baibolo. Ino nshita, tushimikila abantu ifya mu Baibolo mwi sonde lyonse, mu fyalo nalimo 236 kabili mu ndimi ukucila pali 400. Ilyo tuleshimikila, tulanda sana pa Bufumu bwa kwa Lesa. Na kuba moneni no kuti ishina lya ino magazini lya kuti Ulupungu lwa kwa Kalinda Ulusabankanya Ubufumu bwa kwa Yehova. Imiku iingi tulepusha abantu nga balapepela ubo Bufumu. Abengi sana balasumina. Nomba nga twabepusha ukuti Ubufumu cinshi, abengi balanda ati tabaishiba. E lyo bambi tabalondolola bwino bwino ifyo Ubufumu bwaba.

Mulandu nshi abengi balombela ukuti Ubufumu bwa kwa Lesa bwise ubo bashaishiba na kwishiba? Bushe ni co Ubufumu bwa kwa Lesa bwalyafya ukubwishiba bwino, nangu bushe ni co Baibolo tayabulondolola bwino bwino? Iyo. Baibolo yalilondolola bwino sana ifyo Ubufumu bwaba. E lyo ne cacilapo ukuwama ca kutila, ifyo Baibolo yalanda pa Bufumu filalenga mwakwata isubilo line line muli shino nshiku shayafya. Mu cipande cikonkelepo, twalamona ifyo Baibolo yalondolola ili subilo. Lyena twalaisamona ilyo ipepo lya kwa Yesu likasukwa.

[Futunoti]

Bushe Ubufumu bwa kwa Lesa Cinshi?

CINSHI Yesu alelandapo sana ilyo aleshimikila? Yesu umwine atile aishile mu kubila Ubufumu bwa kwa Lesa. (Luka 4:43) Abaleumfwa ifyo alesosa, ukwabula no kutwishika balemona ukutila alelandapo sana pa Bufumu. Bushe calebapapusha? Bushe balemwipusha ukuti Ubufumu cinshi? Iyo. Mu mabuuku ya Mbila Nsuma, tamwaba ifi fipusho. Bushe ninshi abantu abengi balishibe Ubufumu bwa kwa Lesa?

Kwena, Amalembo ya kale ayo abaYuda bacindike ukuti ya mushilo, yalilondolwele ubu Bufumu, kabili yalilandile na bwino bwino ifyo bwali no kwisacita. Nga filya fine amalembo yayafwile abaYuda ukwishiba Ubufumu, na ifwe bene pali lelo fingi twingasambilila pa Bufumu nga tulebelenga Baibolo. Natulande pa fishinka 7 ifyo Baibolo itusambilisha pa Bufumu. Ifishinka fya kubalilapo fitatu abaYuda baliko mu nshiku sha kwa Yesu na lintu Yesu talaisa pano calo balifishibe. Kabili fitatu ifyalakonkapo, abalenga tufishibe, ni Kristu na batumwa bakwe ilyo bali pa calo. Icishinka ca kulekelesha cena, caisaishibikwa muno nshiku shesu.

1. Ubufumu bwa kwa Lesa buteko bwa cine, ubukabako umuyayaya. Ubusesemo bwa mu Baibolo bulanda ukutila Lesa akatuma uwa kulubula abantu ba cishinka. Uyu muntu uwitwa ati “ubufyashi,” akafumyapo amafya yonse ayaisa pano calo pa mulandu wa bucipondoka bwa kwa Adamu, Efa, na Satana. (Ukutendeka 3:15) Pa numa ya myaka iingi, Davidi Imfumu ya cishinka balimwebeleko fimo ifisuma pali ubu “bufyashi” nelyo uyu Mesia. Aali no kuba Imfumu ya Bufumu bwa kwa Lesa. Ubu Bufumu bukapusanako na mabufumu yambi. Bwena bukekalilila umuyayaya.—2 Samwele 7:12-14.

2. Ubufumu bwa kwa Lesa bukafumyapo amabuteko ya bantu yonse. Mu cimonwa kasesema Daniele amwene, mwali amabufumu yakwatisha amaka aya pano calo ne fyo yakonkene ukuteka ukufuma fye ku kale ukufika muno nshiku. Umfweni ifyo Daniele amwene ifyamucincimwishe sana: “Mu nshiku sha shamfumu ishi [Ishamfumu sha bantunse isha kulekeleshako] Lesa wa mu muulu akemyo bufumu ubushakonaulwe umuyayaya, no bufumu bwa buko tabwakashiilwe ku bantu bambi; bukashonaula no kupesha aya mabufumu yonse, kabili bukeminina umuyayaya.” Kanshi amabufumu yonse nelyo amabuteko yonse, pamo ne nkondo, umutitikisha, na mafisakanwa ya muli cino calo fikafumapo umupwilapo. Nga fintu ubusesemo bwaba pa cikomo cakonkapo bulanda, Ubufumu bwa kwa Lesa bwalitendeka kale ukuteka ku muulu, kabili nomba line buli no kuteka isonde lyonse. (Daniele 2:44, 45) Ubu bufumu bwa cine cine kabili e buteko fye bweka ubukashala pano calo.a

3. Ubufumu bwa kwa Lesa bukafumyapo inkondo, amalwele, ifipowe, pamo ne mfwa iine. Amasesemo ya mu Baibolo aya kucincimusha yalatulangilila ifyo Ubufumu bwa kwa Lesa bukacita ilyo bukateka lino isonde. Ala ubu bufumu ifyo bukacita fikawama ica kuti tapali ubuteko nelyo akabungwe pano calo akengacita ifya musango yo. Elenganyeni ukuti ifyanso fyonse ifya nkondo muno calo nafyonaulwa umupwilapo! Baibolo itila: “Aputulo bulwi ukufika ku mpela ya calo.” (Amalumbo 46:9) Takwakatale akuba badokota, ifipatala, nelyo amalwele ayali yonse. “Umwikashi wa mu calo takasose, ati, Nindwala.” (Esaya 33:24) Takwakatale akuba ifipowe, insala, ubulwele bwa nsala, nelyo ukwikala ne nsala. Baibolo itila: ‘Mukaba ukupaka kwa ngano mu calo.’ (Amalumbo 72:16) Takwakabe ifililo, ukuceesha pa fililo, inshiishi, amasaini, nelyo ifyabipa ifili fyonse ificusha abantunse. Nangu fye ni mfwa iine iya tuteka imfine, nayo mu kulekelesha ikapwa umupwilapo. Lesa “akamine mfwa ukumina kwa pe. Shikulu Yehova akafuuta ne filamba pa finso fyonse.”—Esaya 25:8.

4. Lesa e wasala Kateka wa Bufumu bwakwe. Mesia taibika fye umwine pa bufumu kabili te bantunse abamusala. Yehova Lesa umwine e wamusala. Na malumbo yakwe aya kuti Mesia nangu Kristu yalangilila ukuti asalwa na Lesa. Aya malumbo yonse yabili, yalola mu kuti “Uwasubwa.” Kanshi Yehova e wasuba nelyo ukusala iyi Mfumu ukuba pali ici cifulo. Lesa alanda pali iyi mfumu ukuti: “Moneni umubomfi wandi, uo ntungilila, uwasalwa wandi, uo umutima wandi ucankilwa; nimbiko mupashi wandi pali wene, ku kuleka afumishe ubupingushi ku nko.” (Esaya 42:1; Mateo 12:17, 18) Ala mwandini Kabumba wesu alishiba bwino bwino Imfumu yalinga ukututeka!

5. Kateka wa Bufumu bwa kwa Lesa alilanga abantu bonse ukuti akabateka bwino. Yesu umwina Nasarete alilangile ukuti e Mesia uo batile akesa. Lesa alilandile no lupwa umo akafuma. (Ukutendeka 22:18; 1 Imilandu 17:11; Mateo 1:1) Ilyo aali pano calo, afikilishe amasesemo ayengi ayo balembele kale sana ayalelanda pali Mesia. Ne shiwi ukufuma ku muulu lyalilandile ukuti e Mesia. Nga cali shani ifyo? Lesa umwine e walandile ukufuma ku muulu ukuti uyu aali Mwana wakwe; bamalaika na bo batile Yesu e Mesia uo Lesa atile akesa; kabili Yesu alicitile ne fisungusho ifyalangilile apabuuta tuutu ukutila aleficitila ku maka ya kwa Lesa. Na kabili, imiku iingi aleficita ninshi pali na bantu abengi sana abalemonako.b Imiku iingi Yesu alilangilile ifyo akacitila abantu ilyo akaba Kateka. Alikwete amaka ya kwafwilisha abantu kabili alefwaya no kubafwilisha. (Mateo 8:1-3) Alebika sana amano ku bantu, aali ne cikuuku, aali uwashipa, kabili uwaiceefya. Fyonse ifyo acitile pano calo fyalilembwa muli Baibolo pa kuti abantu bonse balefibelenga.

6. Ba 144,000 e bakateka pamo na Kristu mu Bufumu bwa kwa Lesa. Yesu atile kukaba na bambi abakateka nankwe ku muulu pamo na batumwa bakwe bene. Aitile aba bantu ukuti “umukuni unono.” (Luka 12:32) Inshita imbi, umutumwa Yohane balimwebele impendwa ya aba bantu aba mukuni unono ukuti bakaba 144,000. Bakabomba umulimo uusuma sana ku muulu, bakaba ishamfumu kabili bashimapepo pamo na Kristu.—Ukusokolola 5:9, 10; 14:1, 3.

7. Ubufumu bwa kwa Lesa bwalitendeka kale ukuteka ku muulu, kabili nomba line bukatendeka ukuteka icalo conse. Ici cishinka ca kulekelesha twalandapo, caba pa fintu ifisuma sana ifyo twingatemwa ukwishiba. Baibolo ilatweba ifishinka ifingi ifitulanga ukuti Yesu balimupeela amaka ya kuba Imfumu ku muulu. Ino ine nshita tulimo, aleteka ku muulu, kabili nomba line ali no kutendeka ukuteka ne calo conse kabili akafikilisha amasesemo ayakankaala ayo tulandilepo kale. Lelo bushe kuti twashininkisha shani ukuti Ubufumu bwa kwa Lesa buleteka ino ine nshita? Kabili ni lilali bukatendeka ukuteka icalo conse?

[Amafutunoti]

Ni Lilali Ubufumu bwa kwa Lesa Bukesa?

“SHIKULU, bushe ni pali ino nshita mulebwesesha ubufumu kuli Israele?” (Imilimo 1:6) Abatumwa balefwaisha ukwishiba ilyo Yesu ali no kuleta Ubufumu bwakwe pano calo. Nangu ca kutila palipita imyaka nakalimo 2,000, abantu bacili balepusha abati: Ni lilali Ubufumu bwa kwa Lesa bukesa?

Apo Yesu alelanda sana pa Bufumu ilyo aleshimikila abantu, te kuti mutwishike ukutila alilandilepo pali ici cipusho. Na ka cine alilandilepo! Imiku iingi alandile ukuti kukaba inshita imo ifi iyo aitile ati inshita ya “kubapo” kwakwe. (Mateo 24:37) Muli iyi yine nshita ya kubapo kwakwe e mo no Bufumu bwa kwa Mesia bufwile ukutendeka. Bushe finshi fingatwafwa ukwishiba inshita ya kubapo kwakwe? Natulande pa fishinka fine ifyo Baibolo itweba pa nshita ya kubapo kwa kwa Kristu.

1. Inshita ya kubapo kwa kwa Kristu yali no kutendeka ninshi palipita sana inshita apo afumine pano calo. Yesu alandile cilangililo umo aipashenye ku muntu umo uwaile “ku calo ca kutali ku kuimweno bufumu.” (Luka 19:12) Bushe ici cilangililo icalesobela ifya ku ntanshi cafikilishiwe shani? Kwena Yesu alifwile no kubuuka; e lyo aya ku “calo ca kutali,” e kutila ku muulu. Nga filya fine Yesu asobele na mu cilangililo icapalana ne ci, pa kuti akabwele ku kwisateka mu bufumu bwakwe paali no ‘kupita sana inshita.’—Mateo 25:19.

Ilyo papitile imyaka imo ukufuma apo Yesu ailile ku muulu, umutumwa Paulo alembele ukuti: “Uyu muntu [Yesu] atuulile ilambo limo ilya pa membu ku ciyayaya no kwikala ku kwa kulyo kwa kwa Lesa, ukufuma lilya line alolela bakasuke abalwani bakwe ababikwa nge cipuna ca makasa yakwe.” (AbaHebere 10:12, 13) Kanshi ilyo Yesu aile ku muulu, atendeke ukulolela pa nshita ntali ilyo tabalamupeela ubufumu. Uyu Mwana asukile aleka ukulolela ilyo Yehova Lesa amubikile pa Bufumu ubo alandile kale sana ukuti bukatekwa na Mesia. Ili line e lyo inshita ya kubapo kwa kwa Kristu yatendeke. Bushe abantu pano calo bali no kwishiba ukuti ici cintu icikankaala nacicitika?

2. Ukubapo kwa kwa Kristu takumoneka na menso ya buntunse. Ibukisheni ukuti Yesu aebele abasambi bakwe icishibilo ca kubapo kwakwe. (Mateo 24:3) Nga ca kutila abantunse bali no kumona atendeka ukuteka, bushe kuti bakabila ne ca kwishibilako? Natulangilile: Tutile muli pa bulendo bwa kuya mu kumona bemba. Ilyo muleya mu nshila, kuti mwalasanga ifipabi fya kumulanga ukwabela bemba. Nomba nga mwafika pa lulamba, mwaimina mupepi na menshi muletamba na bemba ifyo apabuka, bushe cine cine kuti mwakabila ne cipabi ica kumulangilila ukuti uyu e bemba? Iyo! Nga cinshi kwingabela icipabi ca kumulanga icintu ico muleimwena na menso?

Icalengele Yesu alande icishibilo ca kubapo kwakwe, te kulangilila abantu icintu ico bengaimwena na menso, lelo kubaafwa ukwiluka icali no kucitika ku muulu. E ico, Yesu atile: “Ubufumu bwa kwa Lesa tabwakese ne fya kumwenako fya kucebusha.” (Luka 17:20) Lelo bushe fishibilo nshi ifyo aba pa calo bengamwenako ukuti inshita ya kubapo kwakwe naifika?

3. Mu nshita ya kubapo kwa kwa Yesu kuli no kuba amacushi ya kapeleko pano calo. Yesu atile inshita ya kubapo kwakwe ilyo akalateka mu Bufumu bwa ku muulu, pano calo pakaba inkondo, ifipowe, ifinkukuma, ifikuko, na bumpulamafunde. (Mateo 24:7-12; Luka 21:10, 11) Cinshi cili no kulenga amafya yonse aya? Baibolo yalilondolola ukuti Satana, “kateeka wa pano calo,” aba ne cipyu pantu alishiba ukuti inshita yakwe yalicepa sana ukutula apo Kristu atendekela ukuteka mu Bufumu bwakwe. (Yohane 12:31; Ukusokolola 12:9, 12) Ino nshita tulamona ifitulanga sana ukuti Satana ali ne cipyu cikalamba e lyo tulamona no kuti Kristu alitendeka ukuteka. Sana sana ukutula mu 1914, umwaka uo na baishiba ilyashi lya kale batila e po ifintu mu calo fyayalukiile, ifya kutulanga kuti Kristu aleteka fyalimonekesha sana mu calo conse.

Fyonse ifi twalandapo tafyawama iyo, lelo kwena kuli ifisuma ifyo ifi filetulanga. Ifi fyonse filetulanga ukuti Ubufumu bwa kwa Lesa ubo Mesia ateka, bwalitendeka kale ukuteka ku muulu. Nomba line fye, ubu Bufumu buli no kuteka icalo fye conse. Nomba bushe abantu kuti baishiba shani ukuti kwaliba ubu Bufumu pa kuti basumine ukutila imfumu Yesu ikabateke?

4. Umulimo wa kushimikila abantu icalo conse ulelanga ukuti tuli mu nshita ya kubapo kwa kwa Yesu. Yesu atile ukubapo kwakwe kukaba nge “nshiku sha kwa Noa.”a (Mateo 24:37-39) Noa tapelele fye pa kupanga icibwato; lelo aali ni “kashimikila wa bulungami.” (2 Petro 2:5) Noa alisokele abantu ukuti tapakokole, Lesa aali no kubapingula. Yesu atile abakonshi bakwe aba mu nshita ya kubapo kwakwe na bo bakulasoka abantu ukuti ubupingushi nabupalama. Asobele ukuti: “Ne mbila nsuma iyi ya bufumu ikashimikilwa pano isonde ponse ku kubo bunte ku nko shonse; e lyo ne mpela ikesa.”—Mateo 24:14.

Nge fyo twacumfwa mu cipande cifumineko, Ubufumu bwa kwa Lesa bukafumyapo amabuteko yonse ayaba pano calo. Abashimikila abantu ifya kwa Lesa balabasoka ukuti ubuteko bwa kwa ku muulu buli no kwalule fintu nomba line, pa kuti bonse abaumfwa bakapusuke ubu bonaushi no kwisaba mu Bufumu. Icipusho cacindama kanshi ca kutila, nga imwe mukacita shani?

Bushe Cikamuwamina Ilyo Ubufumu bwa kwa Lesa Bukesa?

Imbila Yesu aleshimikila abantu yalengele bakwata isubilo ilisuma sana. Kale sana, ilyo Adamu na Efa bapondweke, Yehova Lesa alandile ukuti kukaba Ubufumu bwakwe ubukawamya ifintu no kulenga abantu ba cishinka ukwikala umuyayaya muli paradaise pano calo filya fine Lesa alefwaya pa kutendeka. Ala te pa busuma ukwishiba ukutila ubufumu ubo Lesa alandile kale sana ukuti bukesa, fino tulelanda buleteka ku muulu! Ubu bufumu, te cintu ca kwelenganya fye icishaishibikwa bwino, lelo e ko bwaba icine cine!

Fino tulelanda, Yesu, Imfumu iyo Lesa asala alitendeka kale ukuteka nangu ca kutila abalwani bakwe e po bacili. (Amalumbo 110:2) Muli cino calo cabipa umwaba abantu abashipepa, Mesia alebomba umulimo uo Wishi amupeela, uwa kufwayafwaya abengatemwa ukwishiba Lesa bwino bwino no kumupepela “mu mupashi na mu cine.” (Yohane 4:24) Abantu ba mitundu yalekanalekana, aba mishinku yalekanalekana, kabili aba nkulilo shapusanapusana kuti baba ne subilo lya kwisaikala umuyayaya mu Bufumu bwa kwa Lesa. (Imilimo 10:34, 35) Tuletila na imwe bene, mukwai citenipo cimo pa kuti mukekale umuyayaya muli ubu Bufumu. Sambilileni pali ubu Bufumu bwa kwa Lesa ino ine nshita, pa kuti na imwe mukekale bwino sana ku ciyayaya muli ubu buteko umukaba fye abalungama!—1 Yohane 2:17.

[Futunoti]

[Ifikope pe bula 8, 9]

Amalyashi ya bulanda ayo tumfwa cila bushiku yatulangilila fye ukuti icalo cisuma cili mupepi

[Abatusuminishe]

Imfuti: icikope ca ba U.S. Army