Kuli Kasabankanya Uushabatishiwa:

Lishuko nga nshi ukuba kasabankanya uushabatishiwa mu cilonganino. Tulemutasha pa fyo mwalunduluka mu fya kwa Lesa. Apo mulasambilila Icebo ca kwa Lesa, mwalishiba ifyo Lesa aaba kabili mwalicetekela ne fyo alaya.—Yoh. 17:3; Heb. 11:6.

Ilyo mushilatendeka ukusambilila ne Nte sha kwa Yehova, nalimo mwalepepa kumbi nelyo tamwalepepa nangu kumo. Nalimo mwalecita ifyo Baibolo yakaanya. Nomba mwalilanga ukuti mwalikwata icitetekelo pantu mwalilapila, icilepilibula ukuti mwalileka ukucita ifyabipa ifyo mwalecita kale, kabili mwalipampamina pa kucita ifisuma ifyo Lesa afwaya.—Imil. 3:19.

Nalimo mwalishiba amalembo ya mushilo “ukufuma ku bunya,” kabili tamwacitapo ifyo Abena Kristu bashilingile ukucita, nelyo ukucita imembu ishikalamba. (2 Tim. 3:15) Mwalisambilila ifya kucita pa kukanakonkelela ifibusa fyabipa kabili tamucita ifyo Yehova amona ukuti fyalibipa. Mwalilanga ukuti mwalikwata icitetekelo pantu mulatungilila ukupepa kwa cine, kabili mulashimikilako abantu ifyo mwasuminamo. Balimusambilisha ifya kubila bwino imbila nsuma. Nomba namupingulapo ukulabombela Yehova nga kasabankanya uushabatishiwa.

Nampo nga mwasambilile ifyo Yehova afwaya ukutula ku bunya nelyo nga ni mu bukalamba, nalimo nomba mulefwaya ukucita ifintu fibili ifyacindama nga nshi, e kutila, ukuipeela e lyo no kubatishiwa. Ukuipeela kupepa kuli Yehova ukumweba ukuti namupingulapo ukulamubombela ubumi bwenu bonse. (Mat. 16:24) Pa kulanga ukuti mwali-ipeela kuli Yehova, mulingile ukubatishiwa. (Mat. 28:19, 20) Nga mwaipeela no kubatishiwa, e lyo mwingaba umubomfi wa kwa Yehova Lesa uo asala. Ala lishuko nga nshi ukuba umubomfi wa kwa Lesa uo asala!

Nomba nga fintu mwasambilile mu Baibolo, inshita shimo mukalakwata amafya ayalekanalekana. Nga muleibukisha, ilyo fye Yesu abatishiwe, ‘umupashi wamutungulwile ku matololo pa kuti ayetunkwa kuli Satana Kaseebanya.’ (Mat. 4:1) Na imwe bene mule-enekela ukutila mukalaba na mesho ayengi nga mwaba umusambi wa kwa Yesu uwabatishiwa. (Yoh. 15:20) Aya mesho yakaba ayapusanapusana. Nalimo balupwa kuti balamukaanya ukubombela Lesa. (Mat. 10:36) Nalimo abo musambilila nabo ku sukulu, abo mubomba nabo, ne fibusa fyenu kuti balamuseka. Lyonse muleibukisha amashiwi Yesu alandile ayaba pali Marko 10:29, 30 apatila: “Ndemweba icine cine, nati, takuli uwasha ing’anda nelyo bamunyina nelyo inkashi nelyo nyina nelyo wishi nelyo abana nelyo amabala pa mulandu wa ine na pa mulandu wa mbila nsuma uushakapokelele imiku 100 pali ino nshita, amayanda na bamunyina ne nkashi na banyina na bana na mabala, e lyo no kumucusha pa mulandu wa ine. Na ku ntanshi akapokelela umweo wa muyayaya.” E ico twalilileni fye ukulakosha bucibusa bwenu na Yehova no kulakonka amafunde yakwe ayalungama.

Nga mulefwaya ukubatishiwa, mufwile ukweba kampanya we bumba lya baeluda. Pa mabula yakonkelepo pali amepusho ayo baeluda bakalanshanya nenu pa kuti bakamone nga namufikapo ukubatishiwa. Nga mulefwaya, kuti mulepituluka muli aya mepusho ilyo muleisambilisha ifya kwa Lesa.

Ilyo mulepitulukamo mulebelenga no kutontonkanya sana pa Malembo ayo ba-ambula. Nga mulefwaya kuti mwalembako ifyebo fimo muli cino cine citabo nelyo kuti mwalemba pambi. Kuti mwabomfya ifyo fyebo mulembele pamo na cino cine citabo ilyo mulelanshanya amepusho na baeluda. Nga ca kuti amepusho yamo yamukosela ukumfwa, tamulingile ukumfwa insoni ukwipusha aba musambilisha Baibolo nelyo baeluda pa kuti bamwafwe.

Ilyo mulelanshanya amepusho na baeluda, tamulingile ukumona ukuti mufwile ukulefya icasuko nelyo ukulanda ifingi. Mulingile ukubomfya fye amashiwi aya-anguka kabili mufwile ukwasuka fye mu kulungatika mu mashiwi yenu. Ilyo muleasuka, kuti cawama nga mulelandako amashiwi yamo ayaba mwi lembo limo nelyo yabili, ayalanga ukuti ifyo mulelanda e fyo Baibolo isambilisha.

Nga ca kuti baeluda bamona ukuti tamulaishiba sana amasambililo ya mu Baibolo aya kutendekelako, bakapekanya ukuti mukatwalilile ukusambilila pa kuti mukayeshibe bwino, kabili mukaleasuka na mu mashiwi yenu. Lyena ku ntanshi kuti mwafikapo ukubatishiwa.

[Icishibisho kuli baeluda: Ifyebo ifingamwafwa ukwishiba ifya kupituluka mu mepusho na balefwaya ukubatishiwa fili pa mabula 208 ukufika ku 212.]

Ukusambilila Baibolo ne Nte sha kwa Yehova kwalilenga mwaishiba icine. Ukwabula no kutwishika ifyo mwasambilila fyalilenga mwaba cibusa wa kwa Lesa, kabili mwaliba ne subilo lya kwikala umuyayaya mu paradaise pano isonde ilyo Ubufumu bwa kwa Lesa bukalateka. Mwalitetekela sana Icebo ca kwa Lesa, kabili ukuba mu cilonganino ca Bena Kristu kwalilenga muleipakisha amapaalo ayengi. Mwalishiba ne fyo Yehova atungulula abantu bakwe muno nshiku.—Seka. 8:23.

Ilyo mushilabatishiwa, mukapituluka mu fyo fwe Bena Kristu twasuminamo, na baeluda ba mu cilonganino mwaba, kabili mukanonkelamo sana. (Heb. 6:1-3) Yehova natwalilile ukumupaala ilyo mule-esha na maka ukuti mumwishibe, kabili akamupeela icilambu amulaya.—Yoh. 17:3.

1. Mulandu nshi mulefwaila ukubatishiwa?

2. Yehova nani?

• “Yehova e Lesa wa cine mu muulu ku muulu na pe sonde pa nshi. Takwaba na umbi.”—Amala. 4:39.

• “Imwe mweka, mwe bakwata ishina lya kuti Yehova, ni mwe Mwapulamo pano isonde ponse.”—Amalu. 83:18.

3. Mulandu nshi cacindamina ukulabomfya ishina lya kwa Lesa?

• “E ico imwe mufwile ukupepa ifi, amuti: ‘Shifwe wa mu muulu, ishina lyenu libe ilya mushilo.’”—Mat. 6:9.

• “Onse uwalilila kwi shina lya kwa Yehova akapusuka.”—Rom. 10:13.

4. Mashiwi nshi yamo ayaba mu Baibolo ayalondolola ifyo Yehova aaba?

• “Yehova, Kabumba we sonde lyonse, ni Lesa umuyayaya.”—Esa. 40:28.

• “Shifwe wa mu muulu.”—Mat. 6:9.

• “Lesa kutemwa.”—1 Yoh. 4:8.

5. Finshi mwingapeela Yehova Lesa?

• “Muletemwa Yehova Lesa wenu no mutima wenu onse, no mweo wenu onse, no kutontonkanya kwenu konse, na maka yenu yonse.”—Marko 12:30.

• “Yehova Lesa obe e o ulepepa, kabili eka fye e o ulebombela.”—Luka 4:8.

6. Mulandu nshi mufwaila ukuba aba cishinka kuli Yehova?

• “We mwana wandi, ube na mano, kabili ulenge umutima wandi ukusekelela, pa kuti njasuke uulenseebanya.” —Amapi. 27:11.

7. Ni kuli nani mupepa, kabili mupepela mwi shina lya kwa nani?

• “Ndemweba icine cine [ine ne Yesu] nati, nga mwalomba icintu conse kuli Tata, akamupeela mwi shina lyandi.”—Yoh. 16:23.

8. Finshi fimo ifyo mwingapepelapo?

• “E ico imwe mufwile ukupepa ifi, amuti: ‘Shifwe wa mu muulu, ishina lyenu libe ilya mushilo. Ubufumu bwenu bwise. Ukufwaya kwenu kucitwe pano isonde nga mu muulu. Tupeeleni lelo ifya kulya ifya buno bushiku; kabili tubeleleni uluse pa membu shesu, ifyo na ifwe tubelela uluse abatulufyanya. Kabili mwitutwala mu kutunkwa, lelo tupokololeni ku mubifi.’”—Mat. 6:9-13.

• “Uku e kucetekela uko twamucetekela, ukuti conse ico twalomba, cikulu fye nacilingana no kufwaya kwakwe, alatumfwa.”—1 Yoh. 5:14.

9. Cinshi nalimo cingalenga Yehova akaana ukukutika kwi pepo lya muntu?

• “Mu nshita ilya bakalilila kuli Yehova ku kubafwa, lelo takabasuke. Kabili akafisa icinso cakwe kuli bena muli ilya nshita, pantu bacitile ifyabipa.”—Mika 3:4.

• “Amenso ya kwa Yehova yaba pa balungama, na matwi yakwe yomfwa ukupapaata kwabo; lelo icinso ca kwa Yehova cili pa bacita ifyabipa.”—1 Pet. 3:12.

10. Yesu Kristu nani?

• “Simone Petro a-aswike ati: ‘Ni mwe Kristu, Umwana wa kwa Lesa wa mweo.’”—Mat. 16:16.

11. Mulandu nshi Yesu aishile pano isonde?

• “Umwana wa muntu taishile ukuti balemubombela, lelo aishile mu kubombela abantu no kupeela umweo wakwe icilubula pa kuti alubule abengi.”—Mat. 20:28.

• “Na mu misumba imbi [ine ne Yesu] ndi no kubila imbila nsuma iya bufumu bwa kwa Lesa, pantu e co natumiinwe.”—Luka 4:43.

12. Kuti mwalanga shani ukuti mulatasha pe lambo lya cilubula ilya kwa Yesu?

• “Afwilile bonse pa kuti aba mweo belaikalila abene beka kano ukulaikalila uwabafwilile kabili uwabuushiwe.”—2 Kor. 5:15.

13. Maka nshi Yesu akwata?

• “Nabampela amaka yonse mu muulu na pano isonde.”—Mat. 28:18.

• “Lesa na o alimusansabike kabili mu cikuuku amupeele ishina ilyacila amashina yonse.”—Fil. 2:9.

14. Bushe mwalisumina ukuti Ibumba Litungulula ilya Nte sha kwa Yehova e “musha wa cishinka kabili uwashilimuka” uo Yesu asonta?

• “Nga kanshi nani umusha wa cishinka kabili uwashilimuka uo shikulu wakwe asontele ukuba kangalila pa ba mu ng’anda yakwe, pa kuti alebapeela ifya kulya fyabo pa nshita yalinga?”—Mat. 24:45.

15. Bushe umupashi wa mushilo muntu?

• “Na o malaika amwaswike ati: ‘Umupashi wa mushilo ukesa pali iwe, na maka ya Wapulamo yakakufimba. E mulandu wine uukafyalwa aketilwa uwa mushilo, Umwana wa kwa Lesa.’”—Luka 1:35.

• “E ico imwe nga mwalishiba ukupeela abana benu ifya bupe ifisuma nangu ca kutila muli babifi, ninshi Shinwe wa mu muulu ena akacishapo ukupeela umupashi wa mushilo ku bamulomba!”—Luka 11:13.

16. Bushe Yehova abomfeshe shani umupashi wakwe uwa mushilo?

• “Ku cebo ca kwa Yehova imyulu yalipangilwe, Na ku mupu wa mu kanwa kakwe amabumba ya fya mu myulu yonse yalipangilwe.”—Amalu. 33:6.

• “Mukapokelela amaka ilyo umupashi wa mushilo ukesa pali imwe, kabili mukaba inte shandi . . . ku mpela ya pano isonde.”—Imil. 1:8.

• “Takwaba nangu umo uwingalondolola umwine ukusesema kwa mu Malembo. Pantu bakasesema tabaitendekele fye abene ukulanda amashiwi ya kusesema, lelo umupashi wa mushilo e walengele ukuti balande ayo mashiwi ayafumine kuli Lesa.”—2 Pet. 1:20, 21.

17. Bushe Ubufumu bwa kwa Lesa ni cinshi?

• “Lesa wa mu muulu akemya ubufumu ubushakonaulwe nakalya. Kabili ubo bufumu tabwakashiilwe ku bantu bambi. Bukashonaula no kupwisha aya mabufumu yonse, kabili bwena bukeminina umuyayaya.”—Dan. 2:44.

18. Mukanonkelamo shani mu fyo Ubufumu bwa kwa Lesa bukacita?

• “Akafuuta ifilamba fyonse ku menso yabo, ne mfwa tayakabeko na kabili, takwakabe no kuloosha nangu ukuteta nangu ukukalipwa na kabili. Ifya ntanshi nafiya.”—Ukus. 21:4.

19. Finshi fyalenga mushininkishe ukuti nomba line Ubufumu bwa kwa Lesa buli no kutuletela amapaalo?

• “Abasambi baishile kuli ena ku mbali, no kumwipusha abati: ‘Twebeni, Ni lilali ifi fintu fikabako, kabili cinshi tukeshibilako ukuti e po muli no kuti icalo cili ku mpela?’ Na o Yesu abaswike ati: ‘. . . Uluko lukemina uluko lubiye no buteko bukemina ubuteko bubiye, kabili kukaba ifipowe ne finkukuma mu ncende shimo shimo. Ne mbila nsuma iyi iya bufumu ikabilwa ku bantu bonse aba pe sonde ku kuba ubunte ku nko shonse; e lyo impela ikesa.’”—Mat. 24:3, 4, 7, 14.

• “Mu nshiku sha kulekelesha mukesaba inshita ishayafya nga nshi. Pantu abantu bakaba abaitemwa, abatemwa indalama, aba mataki, aba matutumuko, aba miponto, abashumfwila abafyashi babo, abashitasha, abashaba na cishinka, abashatemwa abantu, abashifwaya ifipangano, aba lwambo, abashailama, abankalwe, abashatemwa ubusuma, abafutuka abanabo, bamunshebwa, aba cilumba, abatemwa ukwangala ukucila ukutemwa Lesa, abamoneka kwati ni bakapepa lelo abakaana amaka ya bukapepa.”—2 Tim. 3:1-5.

20. Finshi fyalenga mushininkishe ukuti Ubufumu bwa kwa Lesa bwalicindama kuli imwe?

• “E ico, intanshi mulefwaya ubufumu no bulungami bwakwe.”—Mat. 6:33.

• “Yesu aebele abasambi bakwe ati: ‘Umuntu nga alefwaya ukunkonka, aikaane umwine, asende icimuti cakwe ica bucushi, e lyo alenkonka.’”—Mat. 16:24.

21. Bushe Satana ne fibanda fyakwe ni bani?

• “Imwe shinwe ni Satana Kaseebanya . . . Ulya ali ni kepaya wa bantu ilyo atendeke.”—Yoh. 8:44.

• “Icing’wena cikalamba capooselwe pa nshi, icisoka ca pa kutendeka, iciitwa Kaseebanya kabili Satana, icilufya aba pano isonde bonse; capooselwe pe sonde, na bamalaika ba ciko bapooselwe pamo na co.”—Ukus. 12:9.

22. Bufi nshi Satana abepeeshe Yehova e lyo na ba mupepa?

• “Umwanakashi ayaswike insoka ukuti: ‘Ku fisabo fya miti yonse iya mwi bala kuti twalyako. Lelo ifisabo fya ku muti uwaba pa kati ke bala, Lesa atila, “Mwilalyako iyo, kabili mwilakumyako epali mwafwa.”’ Na yo insoka e pa kweba umwanakashi aiti: ‘Ukufwa tamwakafwe. Pantu Lesa alishiba ukuti mu bushiku mukalyako e mo amenso yenu yakashibulwa kabili mukaba nga Lesa, mukeshiba ubusuma no bubi.’”—Ukute. 3:2-5.

“Satana ayaswike Yehova no kutila: ‘Inkanda pa nkanda, kabili conse ico umuntu akwata kuti apeelela pa mweo wakwe.’”—Yobo 2:4.

23. Kuti mwashinina shani Satana ukuti wa bufi?

• ‘Ulebombela Lesa no mutima onse.’—1 Imila. 28:9.

• “Nshakaleke ukuba uwa kaele mpaka ne mfwa yandi!”—Yobo 27:5.

24. Cinshi abantu bafwila?

• “Ulubembu lwaingilile mu muntu umo pano calo ne mfwa yaingilile mu lubembu, e fyo ne mfwa yasalanganine ku bantu bonse pantu bonse balibembwike.”—Rom. 5:12.

25. Bushe abafwa baba shani?

• “Aba mweo balishiba ukuti bakafwa; lelo abafwa, tabaishiba akantu nangu kamo.”—Luk. Mil. 9:5.

26. Finshi fikacitika ku bafwa?

•“Kukaba ukubuuka kwa balungama na bashalungama.”—Imil. 24:15.

27. Bantu banga abakaya ku muulu mu kuteka na Yesu?

• “Moneni! Umwana wa mpaanga aiminine pa Lupili lwa Sione, kabili ali pamo na ba 144,000. Aba bantu pa mpumi shabo palembelwe ishina lya Mwana wa mpaanga ne shina lya kwa Wishi.”—Ukus. 14:1.

Ukusambilila Baibolo kwalilenga mwaishiba ifyo Yehova afwaya ne fyo mwingacita pa kuti mulekonka amafunde yakwe ayalungama. Ifyo mwasambilila fifwile fyalilenga mwaba ne mibele iisuma, kabili mufwile nomba mwalicindika ubumi. Apo nomba namupingulapo ukulakonka amafunde ya kwa Yehova ayalungama, namulinga ukulabila imbila nsuma.

Ukupituluka mu mepusho yakonkapo kukamwafwa ukwishiba bwino bwino amafunde ya kwa Yehova ayalungama, kabili kukalenga mukeshibe ifyo mwingacita pa kuba umubomfi wa kwa Lesa. Ifi fyebo fikalenga mukeshibe ifyo cawamina ukulacita ifintu fyonse na kampingu iisuma e lyo no kulacita fyonse ku kucindika Yehova.—2 Kor. 1:12; 1 Tim. 1:19; 1 Pet. 3:16, 21.

Te ca kutwishika no kutwishika ukuti ifyo mwasambilila mu Baibolo ukufika pano, nafilenga mulefwaisha ukulanakila Yehova no kuba mu cilonganino cakwe. Amepusho yabalefwaya ukubatishiwa na Malembo yalipo, yakamwafwa ukwishiba nga ca kuti mwalyumfwikisha umulandu mulingile ukulanakila abo Yehova asonta ukutungulula mu cilonganino na mu lupwa, nelyo umulandu mulingile ukulanakila ubuteko. Tatuletwishika ukuti mukacindika sana inshila Yehova abomfya pa kutusambilisha no kukosha icitetekelo cesu, fwe babomfi bakwe. Inshila imo iyo Yehova abomfya, kulongana uko mukalafwaisha ukulasangwako no kula-asukapo.

Na kabili, cino cipande cilanda pa mulandu cacindamina ukulabombako umulimo wa kubila pa Bufumu, uulenga abantu baishiba Yehova e lyo ne fyo acitila abantunse pali ino nshita. (Mat. 24:14; 28:19, 20) Cino cipande calalenga mwishibe no kuti ukuipeela kuli Yehova Lesa no kubatishiwa kwalicindama nga nshi. Te ca kutwishika no kutwishika ukuti Yehova alatemwa pa fyo mulanga ukuti mulatasha pa cikuuku cakwe ica bupe fye.

1. Finshi Baibolo yalanda pa fyo icupo ca Mwina Kristu cifwile ukuba? Cinshi Baibolo yalanda ukuti e cingapwisha fye icupo?

• “Bushe tamwabelenga ukuti uwababumbile pa kutendeka ababumbile umwaume no mwanakashi, kabili atile, ‘E mulandu wine umwaume akashiila wishi na nyina no kulambatila ku mukashi wakwe, kabili aba babili bakaba umubili umo’? E ico tabali babili na kabili iyo, lelo bali umubili umo. Kanshi, ico Lesa alundenye, umuntu ecilekanya. . . . Onse uwaleka umukashi wakwe, apashili umulandu wa bulalelale, aupa na umbi, ninshi acita ubucende.”—Mat. 19:4-6, 9.

2. Cinshi umwaume no mwanakashi balingile ukuupanina ukulingana ne funde? Nga ca kuti mwalyupa nelyo ukuupwa, bushe mwaupana ukulingana ne funde, kabili bushe ubuteko bwalisuminisha icupo ca musango uyo?

• “Ulebebukisha ukunakila no kulaumfwila ubuteko na balashi.”—Tito 3:1.

• “Icupo cifwile ukuba ica mucinshi kuli bonse, kabili tacifwile ukuba icakowela, pantu aba bulalelale na bacende Lesa akabakanda.”—Heb. 13:4.

3. Finshi mufwile ukulakonka mu lupwa?

• “We mwana wandi, umfwila ukusalapula kwa kwa wiso, kabili wisuula amafunde ya kwa noko.”—Amapi. 1:8.

• “Umulume e mutwe wa mukashi wakwe ifyo na Kristu e mutwe wa cilonganino . . . Mwe balume, muletemwa abakashi benu, filya na Kristu atemenwe icilonganino.”—Efes. 5:23, 25.

• “Mwe bashibo, mwilakalifya abana benu, lelo mulebakusha ukulingana no kusalapula kwa kwa Yehova no kukonkomesha kwakwe.”—Efes. 6:4.

• “Mwe bana, muleumfwila abafyashi benu muli fyonse, pantu ukucita ifi e cawama mu menso ya kwa Shikulu.”—Kol. 3:20.

• “Mwe bakashi, mulenakila abalume benu.”—1 Pet. 3:1.

4. Mulandu nshi tufwile ukucindikila ubumi?

• “[Lesa] e upeela abantu bonse umweo no mupu na fyonse. . . . E walenga ukuti tube no mweo, ukuti tule-enda no kuti tubeko.”—Imil. 17:25, 28.

5. Cinshi ico tushifwile ukwipaila umuntu uuli onse ukubikako fye no mwana uushilafyalwa?

• “Nga ca kuti abaume babili balelwishanya kabili bapunka no mwanakashi uuli ne fumo . . . nga kwaba uwafwa, lyena mukapeele umweo pa mweo.”—Ukufu. 21:22, 23.

• “Ilyo fye nalepangwa amenso yenu yalimwene, kabili mwi buuku lyenu mwalembelwe ifilundwa fyandi fyonse, mwalembelwe inshiku ifilundwa fyapangilwe ninshi tapalaba icilundwa nangu cimo.”—Amalu. 139:16.

• “Yehova apata . . . ne minwe iisumya umulopa wa kaele.”—Amapi. 6:16, 17.

6. Finshi amafunde ya kwa Lesa yalanda pa mulopa?

• “Muletaluka . . . ku mulopa, [na] ku fyatitilwa.”—Imil. 15:29.

7. Cinshi tulingile ukutemenwa bamunyinefwe na bankashi?

• “Ndemupeela ifunde ilipya, ilya kuti muletemwana; ifyo namutemenwe, e fyo na imwe muletemwana. Nga muletemwana, e lyo bonse bakeshiba ukuti muli basambi bandi.”—Yoh. 13:34, 35.

8. Pa kuti uulwele ubulwele bwambukila nelyo ubwingepaya tambukisheko bambi: (a) Mulandu nshi ashilingile ukukumbatila nelyo ukutomona abantu? (b) Mulandu nshi ashilingile ukufulilwa nga ca kuti bamo tabamwitileko ku mwabo? (c) Mulandu nshi umuntu uulemona kwati alilwala ubulwele ubwambukila alingile ukuitendekelako ukuyapimishisha umulopa ilyo ashilatendeka ukwishishanya no muntu? (d) Mulandu nshi umuntu uwalwala ubulwele ubwambukila alingile ukwebelako kampanya we bumba lya baeluda pa bulwele alwala ilyo ashilabatishiwa?

• “Mwiba ne nkongole nangu shimo ku muntu, kano inkongole sha kutemwana. . . . ‘Uletemwa umunobe nge fyo waitemwa we mwine.’ Umuntu uwatemwa umunankwe te kuti acite icabipa kuli ena.”—Rom. 13:8-10.

• “Tamubika fye amano ku fyo mulefwaya fye mwe bene, lelo mulabika amano na ku fyo bambi bafwaya.”—Fil. 2:4.

9. Cinshi Yehova afwaila ukuti tulebelela abantu banensu uluse?

• “Muleshipikishanya no kubelelana uluse nga umo ali ne ca kuilishanya ku munankwe. Ifyo Yehova amubelela uluse, e fyo na imwe mulebelelana uluse.”—Kol. 3:13.

10. Cinshi mulingile ukucita nga ca kuti uwa bwananyina amubepesha ubufi bwabipisha nelyo nga amucenjesha ifintu?

• “Nga munonko acita ulubembu, kabiye no kumweba icilubo cakwe ninshi muli fye babili. Nga akuumfwa, ninshi wabwesesha munonko mu nshila. Lelo nga tomfwile, senda umuntu na umbi nelyo babili pamo nobe, pantu inte shibili nelyo shitatu e shingashininkisha umulandu. Nga tomfwile kuli bena, eba icilonganino. Nga tomfwile na ku cilonganino, leka abe kuli iwe ngo mwina fyalo kabili nga kasonkesha wa misonko.”—Mat. 18:15-17.

11. Bushe Yehova amona shani imembu shakonkapo?

▪ Ubulalelale

▪ Ukubomfya ifipasho pa kupepa

▪ Abaume nelyo abanakashi ukulaalana beka beka

▪ Ukwiba

▪ Ukuteya ifyangalo fya kushitikapo

▪ Bucakolwa

• “Mwilufiwa. Aba bulalelale, nangu abapepa utulubi, nangu abacende, nangu abaume abasuminisha abaume banabo ukulaala na bo, nangu abaume abalaala na baume banabo, nangu bapuupu, nangu bafunushi, nangu ni bacakolwa, nangu abatukana, nangu ni balya abacenjesha abanabo, tabakapyane ubufumu bwa kwa Lesa.”—1 Kor. 6:9, 10.

12. Ukulingana ne fyo Baibolo yalanda pa bulalelale, finshi mulefwaisha ukulacita?

• “Fulumuka ubulalelale.”—1 Kor. 6:18.

13. Cinshi ico tushilingile ukulabomfesha imiti icibomfye bomfye nelyo ukulabomfya imiti iikola iingalenga umuntu aleka ukutontonkanya bwino?

• “Mutuule imibili yenu nge lambo ilituntulu, ilyasanguluka, ilingapokelelwa kuli Lesa, e kutila ukubombela Lesa na maka yenu aya kupelulula. Kabili mwipalana no bwikashi buno, lelo mupilibuke pa kwalula amatontonkanyo yenu, pa kuti mushininkishe mwe bene ico Lesa afwaya, icisuma, icapokelelwa kabili icapwililika.”—Rom. 12:1, 2.

14. Fintu nshi fimo ifyo abantu bacita pa kupupa imipashi ifyo Lesa akaanya?

• “Ekasangwa muli imwe onse uoca umwana wakwe umwaume nelyo umwana wakwe umwanakashi mu mulilo, onse uubuka imbuko, uucita ifinjelengwe nelyo onse uusobela ifya ku ntanshi nelyo ing’anga, nelyo uulowa nelyo uwipusha ku umfwana ne mipashi nelyo ku waishibisha ifya kusobela nelyo onse uwipusha ku bafwa.”—Amala. 18:10, 11.

15. Cinshi uwacita ulubembu ulukalamba afwile ukucita bwangu bwangu nga ca kuti alefwaya ukubwelela kuli Yehova?

• “Nasukile nayebelela ulubembu lwandi kuli imwe, kabili nshafishile ubupulumushi bwandi. Natile: ‘Nalayebelela imembu shandi kuli Yehova.’”—Amalu. 32:5.

• “Bushe umo pali imwe nalwala? Ete abakalamba ba cilonganino, kabili bamupepeleko, bamusubile amafuta mwi shina lya kwa Yehova. No mulwele akapola pantu abamupepelako bali ne citetekelo, na Yehova akamwimya. Kabili, nga alicita imembu, imembu shakwe shikelelwa.”—Yako. 5:14, 15.

16. Cinshi mulingile ukucita nga ca kuti namwishiba ukuti Umwina Kristu munenu nacita ulubembu ulukalamba?

• “Umuntu nga ni kambone nelyo alimweneko nelyo naishibapo fimo, kabili ilyo aumfwa imbila akana no kusokolola ulubembu ulo umuntu umbi acitile, ninshi uyu muntu nabembuka kabili akaba no mulandu pa cilubo cakwe.”—Lebi 5:1.

17. Bushe tufwile ukulamona shani umuntu uo batamfya mu cilonganino?

• “Mwila-ampana no wa bwananyina onse nga aba uwa bulalelale nelyo uwa lunkumbwa nelyo uupepa utulubi nelyo uutukana nelyo cakolwa nelyo umupuupu, kabili te ca kwesha no kulya nankwe.”—1 Kor. 5:11.

• “Umuntu nga aisa kuli imwe ne sambilisho ilyaibela, mwimupokelela mu mwenu nangu kumuposha.”—2 Yoh. 10.

18. Mulandu nshi mulingile ukukwatila ifibusa ifyatemwa Yehova?

• “Uule-enda na ba mano akaba uwa mano, lelo uwangala na bawelewele akacula.”—Amapi. 13:20.

• “Mwilufiwa. Ukwampana pamo na babi kulonaula imibele isuma.”—1 Kor. 15:33.

19. Mulandu nshi Inte sha kwa Yehova bashi-itumpila mu fikansa fya calo?

• “Te ba muli ici calo, ifyo na ine [Yesu] nshili wa muli ici calo.”—Yoh. 17:16.

20. Mulandu nshi mulingile ukulaumfwila ubuteko?

• “Umuntu onse alenakila ubuteko, pantu bukateka bwafuma kuli Lesa; imitekele iilipo ni Lesa e wasuminisha ukuti ibeko.”—Rom. 13:1.

21. Kuti mwacita shani nga bamweba ukukonka amafunde ayashumfwana na mafunde ya kwa Lesa?

• “Tufwile ukunakila Lesa ukucila ukunakila abantu.”—Imil. 5:29.

22. Malembo nshi yengamwafwa ukusala incito iingalenga mwatwalilila ukukanaba ulubali lwa calo?

• “Uluko talwakemishe uluko lunankwe ulupanga, nangu ukusambilila inkondo na kabili.”—Mika 4:3.

• “Fumenimo muli ena [Babiloni Mukalamba], mwe bantu bandi, nga tamulefwaya ukuwila mu membu shakwe, kabili nga tamulefwaya ifinkunka fyakwe ukwisa pali imwe.”—Ukus. 18:4.

23. Fya kuleseshamo icitendwe nshi ifyo mwingasala, kabili ni fiisa ifyo mushifwile ukusala?

• “Onse uwatemwa ubunkalwe, [Yehova] alimupata.”—Amalu. 11:5.

• “Patisheni icabipa, ikatisheni icisuma.”—Rom. 12:9.

• “Muletontonkanya pali fyonse ifya cine, pali fyonse ifya mucinshi, pali fyonse ifyalungama, pali fyonse ifyasanguluka, pali fyonse ifyatemwikwa, pali fyonse ifyawama, pali conse icisuma icabako na pali conse ica kutasha icabako, twalilileni ukutontonkanya pali fi fintu.”—Fil. 4:8.

24. Cinshi Inte sha kwa Yehova bashisankanishisha ifya mapepo na ba mu mipepele imbi?

• “Te kuti mulelya ‘ifya kulya fya kwa Yehova’ e lyo ne fya kulya fya fibanda.”—1 Kor. 10:21.

• “‘E ico fumenimo muli bena, no kuipaatulako,’ e fyasosa Yehova, ‘kabili mwi-ikatako ku cishasanguluka’; ‘na ine nkamupokelela.’”—2 Kor. 6:17.

25. Mashinte nshi aya mafunde ya mu Baibolo ayengamwafwa ukwishiba ukusefya uko mwingasefyako?

• “Batobenkene ne nko shimbi. No kusambilila imicitile ya shiko. Kabili balebombela utulubi twa shiko, no tu twaishileba iciteyo kuli bena.”—Amalu. 106:35, 36.

• “Abafwa, tabaishiba akantu nangu kamo.”—Luk. Mil. 9:5.

• “Te ba muli ici calo, ifyo na ine nshili wa muli ici calo.”—Yoh. 17:16.

• “Pantu inshita mwalecitamo ukufwaya kwa bantu ba ici calo ilyo mwale-enda mu mibele ya kuilekelesha, mu lunkumbwa, mu kunwensha umwangashi, mu kuwowota, mu kukolwakolwa na mu kupepa utulubi ukwabindwa, ikalamba sana.”—1 Pet. 4:3.

26. Malyashi nshi aya abantu abalembwa mu Baibolo ayengamwafwa ukwishiba nampo nga mulingile ukulasefya inshiku sha ku fyalwa nelyo iyo?

• “Nomba ubushiku bwalenga shitatu bwali bushiku bwa kufyalwa kwa kwa Farao, kabili acitiile ababomfi bakwe bonse umutebeto no kufumya umukalamba wa balepeela imfumu ifya kunwa no mukalamba wa balepanga umukate mu kati ka babomfi bakwe. Umukalamba wa balepeela imfumu ifya kunwa amubweseshe pa cifulo cakwe ica kuba umukalamba wa balepeela imfumu ifya kunwa . . . Lelo umukalamba wa balepanga umukate alimukulike.”—Ukute. 40:20-22.

• “Lelo ilyo kwali ukusefya ubushiku bwa kufyalwa kwa kwa Herode, umwana mwanakashi wa kwa Herodia alicindile kabili asekeshe Herode nga nshi ica kuti amulaile no kulapa ukuti ali no kumupeela conse ico ali no kulomba. Awe na o akonkele ifyo nyina amwebele, kabili atile: ‘Mpeeleni nomba line umutwe wa kwa Yohane Kabatisha pa mbale.’ E lyo yatumine bamo kabili baileputula Yohane umutwe mu cifungo.”—Mat. 14:6-8, 10.

27. Mulandu nshi mulefwaila ukulakonka ifyo baeluda bamweba?

• “Umfwileni abalemutungulula no kubanakila, pantu balinda imyeo yenu nga bantu abakalubulula; pa kuti bacite ici ne nsansa, te mu bulanda iyo, pantu nga caba ifi kuti camubipila.”—Heb. 13:17.

28. Cinshi cacindamina ukulapaatulako inshita ya kubelenga no kulaisambilisha Baibolo lyonse no lupwa lwenu?

• “Asekelela mu mafunde ya kwa Yehova, kabili abelenga amafunde yakwe no kulayatontonkanyapo akasuba no bushiku. Kabili akaba ngo muti uo balimba mupepi no tumilonga twa menshi, uutwala ifisabo mu nshita ya fiko. Na mabula ya uko tayabonsa, kabili conse ico acita cikatunguluka.”—Amalu. 1:2, 3.

29. Cinshi mwatemenwa ukulongana no kuisanshamo?

• “Nkalumbula ishina lyenu kuli bamunyinane; Mu lukuta e mo nkamulumbanishisha.”—Amalu. 22:22.

• “Tutontonkanye pa banensu ku kucincishanya ku kutemwa kabili ku kubomba imilimo iisuma, twilapuswa ku kulongana, filya waba umusango wa bamo, lelo tulekoseleshanya, maka maka apo mulemona ubushiku bulya bulepalama.”—Heb. 10:24, 25.

30. Mulimo nshi uwacindama sana uo Yesu atupeela?

• “E ico kabiyeni, kalengeni aba nko shonse ukuba abasambi, mulebabatishisha mwi shina lya kwa Tata ne lya Mwana ne lya mupashi wa mushilo, mulebasambilisha ukulakonka fyonse ifyo namwebele.”—Mat. 28:19, 20.

31. Mibele nshi Yehova afwaya twaba na yo ilyo tulesangwilako ku mulimo wa Bufumu nelyo ilyo tuleafwa bamunyinefwe na bankashi?

• “Cindika Yehova ku fyuma fyobe.”—Amapi. 3:9.

• “Onse acite umo apangile mu mutima wakwe, te kupeela na mutimako nangu mu kupatikishiwa, pantu Lesa atemwa uupeela ne nsansa.”—2 Kor. 9:7.

32. Mafya nshi Abena Kristu benekela ukukwata?

• “Balipaalwa abo bacusha pa mulandu wa bulungami, pantu ubufumu bwa mu muulu bwabo. Abantu nga bamupontela no kumucusha no kumubepesha ubufi bwalekanalekana pa mulandu wandi, ninshi mwalipaalwa. Sekeleleni no kwanga, pantu icilambu cenu cikalamba mu muulu; pantu e fyo bacushishe na bakasesema abamutangilile.”—Mat. 5:10-12.

33. Mulandu nshi ukubatishiwa no kuba Inte ya kwa Yehova kwabela lishuko nga nshi?

• “Amashiwi yenu yanenga ukutemwa no kusekelela mu mutima wandi; pantu nainikwa ishina lyenu, mwe Yehova Lesa.”—Yer. 15:16.

Ilingi line abantu babatishiwa pa kulongana kwa muputule no kwa citungu. Pa mpela ya lyashi lya lubatisho, kalanda akeba abali pa kubatishiwa ukwimininako no kwasuka amepusho yakonkapo yabili mu kupongomoka:

1. Bushe mwalilapila ku membu shenu no kuipeela kuli Yehova, kabili bushe mwalisumina ukuti Yehova abomfya Yesu Kristu pa kupususha abantu?

2. Bushe namwishiba ukuti ifi mwalabatishiwa mwalaba Inte ya kwa Yehova, kabili mwakulabombela pamo ne cilonganino cakwe?

Abali pa kubatishiwa nga basumina, ninshi ‘baisosela pa cintubwingi’ ukuti baliba ne citetekelo mu cilubula kabili nabaipeela no mweo onse kuli Yehova. (Rom. 10:9, 10) Kanshi abalefwaya ukubatishiwa bafwile ukutontonkanyapo sana pali aya amepusho no kupepelapo pa kuti bakasuke no mutima onse ku kulangilila ukuti baliba ne citetekelo.

Bushe mwali-ipela kuli Yehova mwi pepo no kumulaya ukuti e o mukalapepa fye eka, kabili mukalabika sana amano ku kucita ifyo afwaya ukucila ukubika amano ku fintu fimbi?

Bushe nomba namushininkisha ukuti mufwile ukubatishiwa pa kulongana ukuleisa?

Bushe abalebatishiwa balingile ukufwala shani? (1 Tim. 2:9, 10; Yoh. 15:19; Fil. 1:10)

Tufwile ukulafwala “ifyalinga kabili ifya mucinshi” pa kuti tulelanga ukuti ‘tulatiina Lesa.’ Kanshi abalebatishiwa tabalingile ukufwala ifya kufwala ifyabengela nelyo ifyapapatila, kabili tabafwile no kufwala ifya kufwala ifyo balembapo amashiwi ayasabankanya fimo.Lelo bafwile ukufwala ifya busaka kabili ifya mucinshi, pantu ulubatisho lwalicindama.

Finshi ifyo uulebatishiwa ashifwile ukucita? (Luka 3:21, 22)

Abena Kristu bapashanya Yesu ilyo balebatishiwa. Yesu alishibe ukuti ulubatisho lwalicindama sana. Ifyo acitile ilyo alebatishiwa e filanga ukuti alicindamike ulubatisho. Kanshi apo balebatishisha te pa kucitila umusamwe, te pa kwangalila, te pa kusambila, nelyo ukucita ifintu fimbi ifingalenga abantu bamona kwati ulubatisho talwacindama. Na kabili uulebatishiwa tafwile ukusamwa nga filya abacimfya mu fyangalo basamwa.Nangu ca kuti inshita ya kubatishiwa ni nshita ya nsansa, abalebatishiwa balingile ukulanga insansa bakwete no mucinshi.

Bushe ukutwalilila ukulongana kuti kwamwafwa shani ukwikala ukulingana ne fyo mwaipeela kuli Yehova?

Mulandu nshi cawamina ukutwalilila ukuisambilisha ifya kwa Lesa na pa numa ya kubatishiwa, e lyo no kulabila imbila nsuma lyonse?

IFYO BAELUDA PA CILONGANINO BAFWILE UKUCITA

Nga ca kuti kasabankanya uushabatishiwa alefwaya ukubatishiwa, baeluda bafwile ukumukoselesha ukupituluka mu “Amepusho ya Kwipusha Abalefwaya Ukubatishiwa,” ayaba pa mabula 185 ukufika ku 207. Bafwile ukumweba no kubelenga ifyebo “Kuli Kasabankanya Uushabatishiwa,” ifyatendekela pe bula 182, ifilondolola ifyo engaipekanya ukulanshanya na baeluda. Nga fintu balondolola muli ici cipande, uulefwaya ukubatishiwa kuti alemba ne fyebo fimo ifyo engabomfya ilyo alelanshanya na baeluda, kabili kuti alebomfya na cino citabo ilyo balelanshanya. Lelo takufwile ukuba uwa kupituluka nankwe mu mepusho ilyo ashilakumana na baeluda.

Uulefwaya ukubatishiwa afwile ukweba kampanya we bumba lya baeluda. Uulefwaya ukubatishiwa nga abelenga “Amepusho ya Kwipusha Abalefwaya Ukubatishiwa,” kampanya we bumba lya baeluda akamwipusha nga ca kuti ali-ipela kuli Yehova mwi pepo ukuti akulacita ukufwaya kwakwe. Nga ca kuti ali-ipela kuli Yehova mwi pepo, kampanya we bumba lya baeluda akapekanya ukuti baeluda babili bakalanshanye nankwe “Amepusho ya Kwipusha Abalefwaya Ukubatishiwa.” Eluda umo afwile ukulanshanya no ulefwaya ukubatishiwa icipande cimo fye. Tamufwile ukulolela babilisha ilyo kukaba ukulongana kwa muputule nelyo ukwa citungu, e lyo mwatampa ukulanshanya nankwe.

Ilingi line kuba ukulanshanya ifipande fibili mu fiputulwa fibili, kabili cila kulanshanya kupwisha nalimo iawala limo, lelo ili te funde, limo kuti kwapulamo nga nacilinga. Mufwile ukupepa pa kutendeka ukulanshanya e lyo na lintu mwapwisha. Baeluda e lyo no ulefwaya ukubatishiwa tabafwile ukukwankwanya pa kupituluka mu mepusho. Baeluda abo bapeela umulimo wa kulanshanya na balefwaya ukubatishiwa, bafwile ukubalilapo ukubomba uyu umulimo ukucila imilimo imbi iyo bakwete.

Caliwamapo ukulanshanya amepusho na kasabankanya fye umo uulefwaya ukubatishiwa ukucila ukulanshanya na bengi pa muku umo. Nga ca kuti baeluda baleleka uulefwaya ukubatishiwa aleasuka amepusho yonse, kuti calenga baishiba nga kasabankanya nalinga ukubatishiwa nelyo iyo. Na kabili, ukulanshanya no ulefwaya ukubatishiwa umo fye, kuti kwalenga alelanda fyonse fye ukwabula umwenso nelyo insoni. Abalefwaya ukubatishiwa nga balyupana, nalimo eluda kuti alanshanya amepusho ya lubatisho na bonse babili pa muku umo.

Nga ca kuti uulefwaya ukubatishiwa ni nkashi, eluda no yu nkashi bafwile ukwikala apa kuti abantu balebamona ilyo balelanshanya, lelo tabafwile ukulaumfwa ifyo balelanda. Nga ca kuti ilyo mukalalanshanya na nkashi mulefwaya ukuti pakabe umuntu na umbi, kuti mwaya na eluda munenu nelyo umubomfi utumikila ukulingana ne cipande mulelanshanya, nge fyo balandile muli paragrafu yakonkapo.

Mu filonganino umo baeluda bacepa, ababomfi batumikila abafikapo abengeshiba umuntu nga nafikapo ukubatishiwa nelyo iyo, kabili abeluka, kuti bababomfya ku kulanshanya amepusho yaba mu Ifyo fwe Bena Kristu Twasuminamo.” Lelo baeluda fye e bafwile ukulanshanya na balefwaya ukubatishiwa Icipande 2 icitila, “Ifyo Umwina Kristu Afwile Ukuba.” Nga ca kuti mu cilonganino tamwaba bamunyinefwe abafikapo, kuti mwaeba kangalila wa muputule pa kuti amone nga bamunyinefwe ababa mu cilonganino cabela mupepi kuti bamwafwa.

Nga ca kuti uulefwaya ukubatishiwa mwana umunono, abafyashi bakwe Abena Kristu bafwile ukubapo ilyo mulelanshanya nankwe. Nga ca kuti abafyashi bakwe te kuti basangweko, ninshi baeluda babili e bafwile ukulanshanya nankwe (nelyo eluda no mubomfi utumikila, ukulingana ne cipande mulelanshanya nankwe.)

Baeluda bafwile ukushininkisha ukuti uulefwaya ukubatishiwa naishiba amasambililo ya mu Baibolo aya kutendekelako ayalinga. Bafwile no kwishiba nga ca kuti alibika sana amano ku cine kabili alicindika icilonganino ca kwa Yehova. Nga ca kuti uulefwaya ukubatishiwa taishiba amasambililo ya mu Baibolo aya kutendekelako, baeluda bakapekanya ukuti bakamwafwe ukuyeshiba pa kuti akafikepo ukubatishiwa ku ntanshi. Bambi nabo abalefwaya ukubatishiwa kuti babapeelako inshita ya kulanga apabuuta tuutu ukuti balibika amano ku mulimo wa kubila imbila nsuma, nelyo ukulanga ukuti balanakila ifyo Lesa ateyanya ifintu mu cilonganino. Ilyo baeluda balelanshanya icipande ca mepusho no ulefwaya ukubatishiwa, bafwile ukwakanya bwino inshita pa kuti baishiba bwino nga ca kuti nafikapo ukubatishiwa nelyo iyo. Nangu ca kuti pa mepusho yamo kuti bapoosapo inshita iikalamba ukucila pa mepusho yambi, baeluda bafwile ukulanshanya no ulefwaya ukubatishiwa amepusho yonse fye.

Baeluda bonse nga bapwa ukupituluka mu mepusho no muntu uulefwaya ukubatishiwa, bakakumana no kulanshanya pa kuti bapingule nga ca kuti kasabankanya nalinga ukubatishiwa nelyo iyo. Baeluda bafwile ukutontonkanya pa nkulilo ya muntu uulefwaya kubatishiwa, amaka ya kwishiba ifintu ayo akwata, e lyo ne fintu fimbi. Twalibika sana amano ku bantu abapalama kuli Yehova kabili abaishiba amasambililo ya mu Baibolo aya kutendekelako. Nga muleafwa abalefwaya ukubatishiwa, bakaipekanya bwino ukubomba umulimo uwacindama nga nshi uwa kubila imbila nsuma.

Pa numa, eluda umo nelyo bonse babili abalanshenye no ulefwaya ukubatishiwa bafwile ukumonana nankwe no kumweba nga nalinga ukubatishiwa nelyo iyo. Nga ca kuti nafikapo ukubatishiwa, baeluda bakalanshanya nankwe ifyebo fyaba pa mabula 206 ukufika ku 207 apaba umutwe utila: “Ukulanshanya kwa Kulekeleshako na Balefwaya Ukubatishiwa.” Nga ca kuti uulefwaya ukubatishiwa tapwisha ukusambilila icitabo citila Kuti Mwaba ne Nsansa Umuyayaya! baeluda bafwile ukumukoselesha ukuti pa numa ya kubatishiwa, akapwishe ukusambilila ici citabo. Mufwile ukweba uulefwaya ukubatishiwa ukuti mukalemba ubushiku akabatishiwa pa Icalembwa ca Bukasabankanya ica Cilonganino apaba ishina lyakwe. Mufwile ukumucinkulako ukuti ico baeluda bapokela ifyebo pali ena, ni co icilonganino ca Nte sha kwa Yehova cilafibomfya pa kuti citwalilile ukutungulula umulimo wa Nte sha kwa Yehova mwi sonde lyonse na pa kuti baeluda balemwafwilisha mu fya kwa Lesa. Na kabili, baeluda kuti bacinkulako bakasabankanya abapya ukuti ifyebo pali bena ifyo bapoka, bafibomfya ukulingana na mafunde yaba pa jw.org ayalanda pa fyo babomfya no kusunga ifyebo, ayo beta ukuti Global Data Protection Policy of Jehovah’s Witnesses. Uku kulanshanya kufwile ukuba fye amamineti 10 nelyo ukucepako.

Nga papita umwaka umo ukutula apo kasabankanya abatishiwilwe, baeluda babili bafwile ukuyamukoselesha no ku mupandako amano muli fimo pa kuti atwalilile ukulunduluka. Umo pali aba baeluda afwile ukuba kangalila we bumba umo uyu kasabankanya aba. Nga ca kuti kasabankanya uwabatishiwa mwaice, abafyashi ba Nte balingile ukubapo ilyo baeluda balelanshanya nankwe. Ilyo balelanshanya nankwe balingile ukuba ne nsansa kabili bafwile ukulanda amashiwi ya kukoselesha. Baeluda bakalanda pa fyo kasabankanya alelunduluka, bakamwebako ne fyo engacita pa kuti atwalilile ukuisambilisha ifya kwa Lesa, ukulabelenga Baibolo cila bushiku, ukulakwata amapepo ya lupwa cila mulungu, ukulaya mu kulongana lyonse no kula-asukapo, e lyo no kulabombako umulimo wa kubila imbila nsuma cila mulungu. (Efes. 5:15, 16) Nga tapwisha ukusambilila icitabo icitila Kuti Mwaba ne Nsansa Umuyayaya! kabili nga takwata uumusambilisha, baeluda bafwile ukusala uwa ku musambilisha mpaka akapwishe ukusambilila ici icitabo. Baeluda bafwile no kumutasha sana pa fyo alelunduluka mu fya kwa Lesa. Ilyo balemukoselesha, kuti bamwebako fye cimo nelyo fibili ifyo engawamyako.

Icishibisho: Amanambala ayali ku mpela ya mashiwi yalelangilila apo mwingasanga ifyebo ifikumine ayo yene mashiwi, inambala ya kubalilapo, ya cipandwa e lyo iikonkelepo ya paragrafu. Ku ca kumwenako, pe samba lye shiwi “Abana,” pali amashiwi ya kuti “ukwafwa abafyashi abalwalilila: 12:14.” Ici cilepilibula ukuti ifyebo filelanda pa fyo abana bengafwa abafyashi abalwalilila fili mu Cipandwa 12, paragrafu 14.

Ababa ne mibele iisuma

ifyo cipilibula: 6:9

Ababomfi batumikila

abafwaya ukubombako: 6:14

imilimo babomba: 6:7-12; 11:14

imilingo: 6:3-6

ukutasha pa fyo babomba: 6:1-2, 15

Abana

abafwaya ukubombako imilimo mu cilonganino: 6:14

nga bacita ulubembu: 14:37

ifyo bacita ku sukulu: 13:22-24

ukulongana: 7:2; 11:13-14

ukulunduluka mu fya kwa Lesa: 8:13-15; 10:26; amabu. 179-181

ukwafwa abafyashi abalwalilila: 12:14

Abapiina: 12:12-15

Abena Kristu abaleka ukushimikila: 8:26; 14:32

Amabumba ya mulimo

bakangalila: 5:29-34

ififulo fya kubombelamo: 9:31, 33

imilimo ya batumikila: 6:12

ukukumana kwa kuya mu mulimo: 7:20-21

ukupeelwa ibumba: 5:35

ukuwamya Ing’anda ya Bufumu: 11:7

Amakomiti ya bupingushi: 14:21-28, 34-37

Amalipoti

bakangalila wa muputule: 5:46, 50; 9:44

bakasabankanya: 5:34; 8:10, 23-29

ifyo yacindamina: 8:19-22, 31-36

nga tamuli pa cilonganino cenu: 8:30

Amasambililo ya Baibolo

ifyo cacindamina: 9:16-17

ukukoselesha umusambi ukulaebako abantu ifyo alesambilila: 8:5

ukutuma lipoti: 8:26

ukutungulula abasambi ku cilonganino: 9:20-21

Amenga: 11:10-11

Amesho: 13:4-5; 17:4-19

Baeluda

abakalamba nelyo abalwalilila: 5:23-24

amabumba no tumabumba: 9:42-44

bakacema: 5:1-3; 14:7-12

basontwa no mupashi: 4:8

ifyo tulingile ukubamona: 3:14; 5:38-39

imilimo babomba: 5:25-36, 40

imilingo: 5:4-20

ukubombela pamo: 5:21

ukufwaya ukubombako: 5:22

ukulongana: 5:37

ukusunga icilonganino icasanguluka: 14:19-40

Bakangalila

(Moneni Baeluda)

Bakapyunga: 11:14

Bakasabankanya abashabatishiwa

abana: 8:13-15

acita ulubembu: 14:38-40

ififwaikwa: 8:6-12

ilyo kuli ukukuula nelyo ukuwamya ifyaonaka ku Ng’anda ya Bufumu: 11:17

Bakasabankanya mu Cilonganino

(Moneni na bakasabankanya abashabatishiwa)

abacaice: 8:13-14

abalwalilila: 8:29

abapya: 8:5-6

ififwaikwa: 8:8

ukubafwa: 5:28-29, 33; 7:21; 9:7, 15, 19

ukukuuka: 8:30

Bankashi

amasukulu ya buLesa: 10:17-18

nga tapali bamunyina abafikapo: 6:9; 7:23

umulimo wa makuule: 10:21

Bapainiya: 10:11-14

Bapainiya baibela: 10:11, 14, 17-18

Bapainiya bakwafwilisha: 10:11-12

Bumishonari: 10:15, 18

Incende umo balanda indimi ishingi: 9:35-44

amabumba no tumabumba: 9:42-44

nga ca kuti mwine ng’anda alanda ululimi lumbi: 9:38-41

amasukulu ya kusambililamo ululimi lumbi: 10:10

Bumutwe

bakateka: 15:11

mu cilonganino ca kwa Yehova: 1:9-10; 2:5, 9-10; 15:1-2

mu cilonganino: 3:14; 4:15; 15:7

mu lupwa: 15:9-10

Ibumba Litungulula

ukulanga ukuti twalilicetekela: 3:12-15

ukulishiba: 3:1-6

umulandu wa kulinakila: 3:9-11; 4:9-11