Bushe Ukwikala Pamo Ukwabula Ukuupana ni Ntendekelo Isuma iya Cupo?

ULUPAPULO lwa kuti Journal of Marriage and Family lwatile: ukwikala pamo umwaume no mwanakashi ukwabula ukuupana mu fyalo fyalunduluka “nakuseeka nga nshi mwi isonde lyonse.” “Mupepi na hafu wa bekala pamo ukwabula ukuupana bamona ukwikala fye pamo nge nshila ya kwishibana bwino nga nabalingana imibele ilyo tabalaupana.” Ulu lupapulo lwatile ukupekanya kwa musango yu kanshi kulingile “kwafumyapo ukukanalingana mu cupo no kulenga ifyupo fili ku ntanshi ukuwama.”

Ulupapulo lwalundilepo ati: “Lelo ubushininkisho bulanga fimbi. Bamo abaupana, abatampa ukwikala pamo ilyo tabalaupana tabamoneka ukuipakisha sana mu cupo, tabamoneka ukubombela pamo inshita iikalamba, kulaba sana ukuumana mu cupo, takuba ukwafwana, takuba kubombela pamo mu kupwisha ubwafya, [kabili] kulaba amalipoti ayengi pa lwa bwafya bwa mu cupo. Ukulundapo, nga mwalinganya abopana mu mucinshi ku babalilapo ukwikala pamo ilyo tabalaupana, ababalilapo ukwikala pamo balakwata ubwafya ubukalamba ubwa kufwaya [ukulekana].”

Nge fyo ili isambililo lyalangilila, icingamoneka ica mano ukucita ukulingana no kutontonkanya kwa bumuntu, kuti casangwa ukuba icabipa. Ici cishinka cikosha bucine bwa mashiwi yasangwa pali Yeremia 10:23 aya kuti: “Te kwa muntunse ukwenda kwakwe; te kwa muntu uuleya ukushikimika amatampulo yakwe.” Ifyo caba ica mano nga nshi ukulolesha ku Cebo ca kwa Lesa, Baibolo, icipeela ukufunda ukusuma ukwingi pa lyashi lya cupo! (2 Timote 3:16) Ku ca kumwenako, ukulosha ku kwampana kwa mu cupo, Baibolo itila: “Ni pali ici umwaume alekela wishi na nyina, alambatila na ku mukashi wakwe, na bo babo mubili umo.”—Ukutendeka 2:24; Mateo 19:5.

Ukumfwila ubutungulushi ubufuma kuli Lesa, ukucila ukulakonka amafunde ayashimpwa pa kutontonkanya kwa buntunse ayalukaaluka kabili ilingi line ayashaishibikwa bwino bwino kuti kwawamyako nga nshi isubilo lya nsansa shine shine ne cupo cibelelela.—Amapainda 3:5, 6.