Shi Twikwinda no Konaika!
“Ifwe tatuli abakwinda no konaika.”—ABAHEBERE 10:39.
1. Cinshi calengele ukuti umutumwa Petro abe no mwenso?
ABATUMWA bafwile balipapile lintu Yesu, Shikulu wabo uwatemwikwa, abebele ukuti bali no kusalangana no kumukaana. Ni shani ica musango yu cingacitika mu nshita lintu alebakabila sana? Petro apampamine fye pa kuti: “Nelyo bonse baleipununa, lelo ine iyo.” Na kuba, Petro ali mwaume washipa. Lelo lintu Yesu bamufutwike no kumwikata, abatumwa ukusanshako na Petro balisalangene. Ilyo Yesu balemwipusha mu ng’anda ya kwa Shimapepo Mukalamba Kayafa, Petro ali mu lubansa ninshi nasakamikwa. Lintu bwailile kwaleya kuletalala, Petro afwile atendeke ukutiina ukuti Yesu no uli onse uwalebishanya nankwe pambi balaipaiwa. Ilyo abalipo bamo batile Petro, alibishenye sana na Yesu, alitiinine. Imiku itatu atile tabombelepo na Yesu. Petro alikeene no kuti tamwishiba!—Marko 14:27-31, 66-72.
2. (a) Mulandu nshi umwenso Petro akwete bulya bushiku lintu Yesu aiketwe ushamulengele ukuba ‘uukwinda no konaika’? (b) Cinshi tulingile ukupampaminapo?
2 Ico calengele Petro ukubipilwa, ukwabula no kutwishika camuletele ubulanda mu bumi bwakwe bonse. Lelo bushe filya Petro acitile bulya bushiku fyamulengele ukuba kuuwe? Bushe ico acitile camulengele ukuba nga bantu umutumwa Paulo aishilelondolola lintu alembele ukuti: “Lelo ifwe tatuli abakwinda no konaika”? (AbaHebere 10:39) Abengi kuti basuminisha ukuti ifyo Paulo alandile tafyakumine Petro. Mulandu nshi? Pantu umwenso wa kwa Petro wali fye wa pa kashita, icilubo ica muntu waishibikwe ngo washipa kabili uwa busumino. Fwe bengi na ifwe twalicitapo fimo mu bumi ifyo twibukisha ne nsoni, inshita lintu umwenso waishile mu kupumikisha ica kuti twafilwa ukushipa pa cine nga fintu twingatemwa ukushipa. (Linganyeniko Abena Roma 7:21-23.) Kuti twashininkisha ukuti ifilubo fya pa kashita ifya musango yu tafitulenga ukuba abakwinda no konaika. Nalyo line, tulingile ukupampamina pa kukanaba aba musango yo. Mulandu nshi? Kabili kuti twasengauka shani ukuba aba musango yu?
Umwalola Ukukwinda no Konaika
3. Ni shani fintu bakasesema Eliya na Yona baishileba no mwenso?
3 Lintu Paulo alembele pa lwa “bakwinda,” talelanda pa bengafilwa ukushipa pa kashita kanono. Paulo afwile alishibe pa lwa fyo Petro acitile ne fyo bambi bacitile ifyapalileko. Eliya, kasesema washipa kabili uwalelandilapo, inshita imo alitiinine no kupoola pa mulandu wa kuti balefwaya ukumwipaya kuli Yesebele Namfumu wabipa. (1 Ishamfumu 19:1-4) Kasesema Yona alikwatishe umwenso. Yehova amutumine ukuya ku Ninebe uwali umusumba umwali ulukaakala nga nshi no bubifi. Mu kwangufyanya Yona aninine ubwato bwaleya ku Tarshishi—amakilomita 2,200 mu ntunga yapuseneko na intu atuminweko! (Yona 1:1-3) Lelo, aba bakasesema ba busumino nelyo umutumwa Petro tabengalondololwa nga bakwinda. Mulandu nshi?
4, 5. (a) Ni shani fintu ilyashi Paulo alelandapo pa AbaHebere 10:39 litwafwa ukwishiba umo aloseshe pa kusosa ukuti “ukonaika”? (b) Paulo aloseshe mwi lintu atile: “Tatuli abakwinda no konaika”?
4 Moneni amashiwi Paulo abomfeshe ati: “Lelo ifwe tatuli abakwinda no konaika.” Aloseshe mwi lintu atile “ukonaika”? Ishiwi lya ciGriki abomfeshe inshita shimo lilanda pa bonaushi bwa ciyayaya. Ubu bulondoloshi bumfwana ne fyo Paulo alelandapo. Paulo ali nasoka ukuti: “Nga twaba ababembuka itolo apo twapokelelo kwishibe Cine, takwashala na kabili ilambo lya pa membu, lelo kwashala fye ukulolela kwa kulengo mwenso kwa bupingushi, no kuluma kwa mulilo uukapwishe fibambe.”—AbaHebere 10:26, 27.
5 E co lintu Paulo aebele abasumina banankwe ukuti, “Ifwe tatuli abakwinda no konaika,” aloseshe mu kuti wene na bakabelenga bakwe Abena Kristu ba busumino bapampamine pa kukanafuma kuli Yehova na pa kukanaleka ukumubombela. Ukucite ci kuti kwalenga fye umo ukonaulwa ku ciyayaya. Yuda Iskariote ali ni umo uwakwindile no konaika, nga fintu abalwani bambi aba cine bacitile abalwishishe ku mufulo umupashi wa kwa Yehova. (Yohane 17:12; 2 Abena Tesalonika 2:3) Abantu ba musango yu baba pali “bakuuwe” abonaulwa ku ciyayaya muli bemba wa mulilo uwa mampalanya. (Ukusokolola 21:8) Tatulefwaya ukuba aba musango yo!
6. Ni nshila nshi Satana Kaseebanya afwaya ifwe ukukonka?
6 Satana Kaseebanya afwaya ukuti tukwinde no konaika. Pamo nga kalapashi mu “micenjelo,” alishiba ukuti ilingi icintu ca musango yu icabipa citendekela mu tuntu utunono. (Abena Efese 6:11, utulembo twa pe samba, NW) Nga ca kuti ukupakasa kwafilwa ukupwishishisha ifyo alefwaya, esha ukonaula icitetekelo ca Bena Kristu ba cine ukupitila mu kubabeleleka. Afwaya ukumona Inte sha kwa Yehova ishashipa kabili ishapimpa shatalala. Natumone imingalato abomfeshe ku Bena Kristu ba ciHebere abo Paulo alembeele.
Ifyalelenga Abena Kristu Ukukwinda
7. (a) Bushe icilonganino ca mu Yerusalemu cashimikwe shani? (b) Cali shani lwa ku mupashi kuli bakabelenga ba kwa Paulo bamo?
7 Ubushinino bulangilila ukuti Paulo alembele kalata ku baHebere nalimo mu 61 C.E. Icilonganino ca mu Yerusalemu caishibikwe nge ca cimfulumfulu. Ilyo Yesu afwile, Abena Kristu balitendeke ukupakaswa icabipisha icalengele no kuti abengi mu musumba basalanganishiwe. Lelo, kwaishileba inshita ya mutende, iyalengele ukuti impendwa ya Bena Kristu ikulileko. (Imilimo 8:4; 9:31) Ilyo imyaka yalepita, amesho yambi na mafya fyaleisa no kuya. Cimoneka kwati pa nshita Paulo alelembela abaHebere kalata, icilonganino na kabili caliko mu mutende. Nalyo line, kwali amafya. Imyaka nalimo 30 yali naipita ukutula apo Yesu asobelele pa lwa bonaushi bwa Yerusalemu. Kufwile kwali bamo abaletontonkanya ukuti impela yakokwesha no kuti napamo ikesa ninshi balifwa. Bambi, na kucilisha abapya mu citetekelo, bali tabalapakaswa icabipisha kabili baishibe fye ifinono pa lwa kushipikisha amesho. (AbaHebere 12:4) Satana alefwaya ukwingilila pa mibele ya musango yu. “Micenjelo” nshi abomfeshe?
8. Mibele nshi abaYuda abengi bakwete ku cilonganino cipya ica Bwina Kristu?
8 AbaYuda ba mu Yerusalemu na Yudea basuulile icilonganino cipya ica Bena Kristu. Ku fyali muli kalata wa kwa Paulo, kuti twamona ifyo bashimapepo ba ciYuda aba cilumba na bakonshi babo bapontele Abena Kristu. Napamo baletila: ‘Twalikwata itempele ilikalamba mu Yerusalemu, ilya myaka iingi! Twalikwata shimapepo mukalamba uwalumbuka uubombela kulya, pamo na bashimapepo banono. Amalambo yatuulwa cila bushiku. Twalikwata Amalango, ayo bamalaika bapeele Mose kabili ayaishile ne fishibilo fikalamba pa Lupili lwa Sinai. Ici cakaniko catendeka fye, aba Bena Kristu, abasangukila ubuYuda, tabakwata fyonse fi!’ Bushe imiponto ya musango yu yalibombele? Abena Kristu ba ciHebere bamo balicushiwe kuli iyi miponto. Kalata wa kwa Paulo aishile fye pa nshita iyalinga ku kubafwa.
Umulandu Bashilingile Ukukwinda no Konaika
9. (a) Lyashi nshi lyaandatila kalata wa ku baHebere? (b) Ni mu nshila nshi Abena Kristu babombele mwi tempele lyacilile ilya mu Yerusalemu?
9 Natubebete imilandu ibili iyo Paulo apeele bamunyina na bankashi mu Yudea iya kukanakwindila no konaika. Umulandu wa ntanshi—ukupepa kwa Bwina Kristu kwalicila imipepele yonse—e wayandatila kalata wa ku baHebere. Muli kalata wakwe onse, ici e co Paulo alelandapo. Itempele mu Yerusalemu lyali fye cimpashanya ca cintu cacilapo, itempele lya ku mupashi ilya kwa Yehova, icikuulwa ‘icishacitilwe ku minwe.’ (AbaHebere 9:11) Balya Bena Kristu bakwete ishuko lya kubombela muli kulya kutantika kwa ku mupashi ukwa kupepa kwa cine. Balebombela mu cipingo cacilapo ukuwama, icipingo cipya icalaiwe kale, icakwete Kawiikishanya uwacila Mose, Yesu Kristu.—Yeremia 31:31-34.
10, 11. Mulandu nshi umutande wa kufyalwa uwa kwa Yesu ushamulengele ukukanaba Shimapepo Mukalamba uwa mwi tempele lya ku mupashi? (b) Ni mu nshila nshi Yesu abelele Shimapepo Mukalamba uwacilile uwalebombela mwi tempele mu Yerusalemu?
10 Na kabili abo Bena Kristu, balikwete Shimapepo Mukalamba Yesu Kristu, uwacilile uwa baYuda. Tafumine kuli Aarone. Lelo ali ni Shimapepo Mukalamba ukulingana no “musango wa kwa Melkisedeke.” (Amalumbo 110:4) Melkisedeke uo bashalumbula uko afuma, ali ni mfumu ya ku Salemu wa pa kale kabili shimapepo mukalamba uwa uko. E co, ali cimpashanya ca mu kusesema icalinga ica kwa Yesu, uo bushimapepo bwakwe bushashintilile pa fikolwe fya buntunse ifishapwililika, lelo pa cintu icikalamba—umulapo wa kwa Yehova Lesa umwine. Ukupala Melkisedeke, Yesu ni Shimapepo Mukalamba kabili Imfumu, iishakafwe.—AbaHebere 7:11-21.
11 Na kabili, ukupusana na shimapepo mukalamba uwa pe tempele mu Yerusalemu, Yesu tali na kulapeela amalambo cila mwaka. Ilambo lyakwe lyali mweo wakwe uwapwililika, uo atuulile limo fye. (AbaHebere 7:27) Yonse yalya amalambo ayaletuulwa pe tempele yali fye fimpashanya fya co Yesu atuulile. Ilambo lyakwe ilyapwililika lyalengele bonse aba citetekelo ukulaelelwa. Ica kusansamusha na cimbi mashiwi ya kwa Paulo ayalangilila ukuti uyu Shimapepo Mukalamba ni Yesu umo wine uushaluka uo Abena Kristu ba mu Yerusalemu baishibe. Ali uwaicefya, uwa cikuuku, kabili ‘uwingatusakamana ku kunaka kwesu.’ (AbaHebere 4:15; 13:8) Balya Bena Kristu basubwa balikwete isubilo lya kuba bashimapepo banono aba kwa Kristu! Ni shani fintu bengatontonkanya pa lwa kukwinda no kupilibukila “ku mipashi ya kapona iyanaka” iya mipepele yabipa iya buYuda?—Abena Galatia 4:9.
12, 13. (a) Mulandu nshi uwa cibili uwa kukanakwindila uo Paulo alandilepo? (b) Mulandu nshi ukushipikisha kwabo kwingakoselesesha Abena Kristu ba ciHebere ukukanakwinda no konaika?
12 Kwati nalimo ubo bushinino tabwakumene, Paulo apeele abaHebere umulandu wa cibili uwa kukanakwinda no konaika—ukushipikisha kwabo. Alembele ukuti: “Ibukisheni inshiku sha ntanshi, ilyo, pa numa ya kukupulukwa kwenu, mwashishimishe ku bwafya bwa fya kucula.” Paulo abacinkwileko ukuti bali “abatambwatambwa” mu kuseebaniwa ne fya bucushi. Bamo balibikilwepo mu fifungo, bambi basakamene no kutungilila abali mu fifungo. Balangile icitetekelo cisuma no kushipikisha. (AbaHebere 10:32-34) Lelo mulandu nshi Paulo abebele ukuti ‘baleibukisha’ amesho yatapata ifyo? Bushe ico tacali no kubafuupula?
13 Iyo, ‘ukwibukisha inshiku sha ntanshi’ kwali no kucinkulako abaHebere ulwa fyo Yehova abakoseshe ilyo baleeshiwa. Pa mulandu wa bwafwilisho bwakwe, kale kale bali na bacincintila ukusansa kwa kwa Satana ukwingi. Paulo alembele ukuti: “Lesa tali uushalungama; takalabe umulimo wenu, no kutemwa uko mwalangile kwi shina lyakwe.” (AbaHebere 6:10) Yehova aleibukisha imilimo yabo yonse iya busumino, mu cibukisho cakwe ica ciyayaya. Tulacinkulwako pa lwa kukonkomesha kwa kwa Yesu ukwa kulonganika ifyuma mu muulu. Takuli umupuupu wingeba ifi fyuma; kabili icipelebesha nangu ni ndalawa te kuti fyonaule. (Mateo 6:19-21) Na kuba, ifi fyuma kuti fyaonaulwa fye lintu Umwina Kristu akwinda no konaika. Ico kuti caonaula ifyuma fyonse ifyo ailonganikila mu muulu. Mwandi uyo wali mulandu usuma uo Paulo apeele Abena Kristu ba ciHebere uwa kukanakonka inshila ya musango yu! Mulandu nshi uwa konawila imyaka yabo yonse iya mulimo wa busumino? Kuti caba icalungama no kucilapo ukuwama ukutwalilila ukushipikisha.
Umulandu Tushilingile Ukukwinda no Konaika
14. Mafya nshi tupitamo ayapalana na yapitilemo Abena Kristu ba mu mwanda wa myaka uwa kubalilapo?
14 Abena Kristu ba cine ilelo na bo balikwata imilandu isuma iya kukanakwindila. Intanshi, natwibukishe ishuko twakwata mu kupepa kwasanguluka uko Yehova atupeela. Ukupala Abena Kristu ba mu mwanda wa myaka uwa kubalilapo, tuleikala mu nshita lintu aba mu mipepele yaishibikwa sana batupumya no kutupontela, cilumba cilumba ukulalanda pa fikuulwa fyabo ifya mipepele ifikalamba no bukokole bwa fishilano fyabo. Lelo Yehova alenga twashininkisha ukuti alipokelela ukupepa kwesu. Na kuba, ilelo twalikwata amashuko ayo Abena Kristu ba mu mwanda wa myaka uwa kubalilapo bashakwete. Kuti mwapapa ukuti, ‘Ni shani cingabe fyo?’ Na kuba, baikele pa nshita lintu itempele lya ku mupashi lyatendeke ukubomba. Kristu aishileba Shimapepo Mukalamba uwa ili tempele lintu abatishiwe mu 29 C.E. Bamo pali bene balimwene Umwana wa kwa Lesa uwalecita ifipesha mano. Na pa numa fye ya mfwa yakwe, kwali ifipesha mano na fimbi. Lelo, nga fintu casobelwe ifya bupe fya musango yu fyasukile fyapwa.—1 Abena Korinti 13:8.
15. Bushe kusesema nshi kulefishiwapo muli ino nshita Abena Kristu baleikala, kabili ici citukumine shani?
15 Lelo, tuleikala mu nshita lintu ukusesema kukalamba ukwe tempele ukwa muli Esekiele ifipandwa 40-48 kulefikilishiwa apakalamba.a E co, twalimona ukubweshiwa kwa kutantika kwa kwa Lesa ukwa kupepa kwasanguluka. Ilyo itempele lya ku mupashi lyalisangululwa ku kukoweshiwa konse ukwa mipepele no kupepo tulubi. (Esekiele 43:9; Malaki 3:1-5) Tontonkanyeni pa lwa busuma bwafuma muli uku kusangulula.
16. Cinshi cafuupwile Abena Kristu ba mu mwanda wa myaka uwa kubalilapo?
16 Mu mwanda wa myaka uwa kubalilapo, ifintu tafyalemoneka bwino mu cilonganino cateyanishiwe ica Bena Kristu. Yesu ali nasobela ukuti cali no kuba kwati ibala ilipya umo batanda ingano batandamo na mankumba ica kuti bafilwa ukulekanya ingano ku mankumba. (Mateo 13:24-30) Kabili e fyo cali. Ilyo umwanda wa myaka uwa kubalilapo walepwa, lintu umutumwa Yohane ali ngo wa kulekelesha uwalekanya ububifi, ubusangu bwali ninshi nabutendeka ukufula. (2 Abena Tesalonika 2:6; 1 Yohane 2:18) Ilyo fye abatumwa bafwile, ibumba lya bashimapepo limbi lyalitendeke, ilyalecusha umukuni no kufwala ifya kufwala fyaibela. Ubusangu bwasalangene icabipisha. Fintu ico cafuupwile Abena Kristu ba busumino! Balimwene abengi batendeka ukukonka ukupepa kwa bufi ukucila ukutantika kupya ukwa kupepa kwasanguluka. Ici cacitike ninshi ne myaka 100 tailakumana ukutula apo Kristu atendekele icilonganino.
17. Ni mu nshila nshi umo icilonganino ca lelo ica Bwina Kristu cakokwela ukucila icibiye ica mu mwanda wa myaka uwa kubalilapo?
17 Nomba, moneni ubupusano. Ilelo, ukupepa kwasanguluka kwalitwalilila pa nshita iitali ukucila imyaka abatumwa baikele. Ukutula pa nshita lintu luno lupapulo lwafumine umuku wa kubalilapo mu 1879, Yehova alitwalilila ukulasangulula ukupepa kwesu. Yehova na Yesu Kristu baingile mwi tempele lya ku mupashi mu 1918 pa kuti balisangulule. (Malaki 3:1-5) Ukutula 1919, ukutantika kwa kupepa Yehova Lesa kwaliya kulesangululwa. Twaliya tuleumfwikisha ukusesema ne fishinte fya mu Baibolo. (Amapinda 4:18) Ni bani tutasha? Te bantunse abashapwililika. Ni Yehova fye eka, no Mwana wakwe pamo ngo Mutwe wa cilonganino, e bengacingilila abantu Bakwe ku bubi muli shino nshita shabipa. E co, twilafilwa ukutasha Yehova pa kutusuminisha ukuba no lubali mu kupepa kwasanguluka ilelo. Kabili natupampamine pa kukanakwinda no konaika!
18. Mulandu nshi twakwata uwa kukanakwinda no konaika?
18 Ukupala balya Bena Kristu ba ciHebere, twalikwata umulandu wa cibili uwa kukanabela bakuuwe, atemwa ukukwinda, uyo waba fintu twashipikisha. Nampo nge lyo twatendeke ukubombela Yehova nelyo ni kale twatendeka ukumubombela mu busumino, twalikwata imilimo ya Bwina Kristu. Abengi pali ifwe balipakaswa, ukukakwa, ukubindwa, ukucushiwa, no kulufya ifikwatwa. Abengi balibalwisha kuli balupwa, ukupontelwa, ukupumiwa, no kukanapooswako amano. Ifwe bonse twalishipikisha, twalitwalilila mu mulimo wesu uwa busumino kuli Yehova te mulandu na mafya ya mu bumi na mesho. Mu kucite co, twaishibikwa nga bashipikisha icintu ico Yehova ashakalabe, twaliilonganikila ifyuma mu muulu. E co, ukwabula no kutwishika, ino te nshita ya kubwelela ku bwikashi bwabipa ubwa kale ubo twasha! Mulandu nshi uwa kubombele busha? Maka maka ilelo, lintu kushele “nshita inononono fye” pa kuti impela ise.—AbaHebere 10:37.
19. Cinshi cikalandwapo mu cipande cikakonkapo?
19 Natupampamine pa ‘kukanaba abakwinda no konaika’! Lelo, natube “abakwate citetekelo.” (AbaHebere 10:39) Ni shani fintu twingashininkisha ukuti twalinga ubo bulondoloshi, kabili ni shani twingafwa Abena Kristu banensu ukucita cimo cine? Icipande cikakonkapo cikasuka ifi fipusho.
[Futunoti]
Bushe Muleibukisha?
◻ Ukukwinda no konaika fyalola mwi?
◻ Mafya nshi yalefuupula Abena Kristu ba ciHebere abo Paulo alembeele?
◻ Milandu nshi iya kukanakwindila no konaika Paulo aebele abaHebere?
◻ Milandu nshi twakwata iya kupampamina pa kukanakwinda no konaika?
[Ifikope pe bula 15]
Umwenso wa kwa Petro tawamulengele ukuba ‘uukwinda no konaika’