Ifipusho Ukufuma ku Babelenga

Bushe umukashi wa Bwina Kristu kuti anakila shani umulume wakwe uushasumina nga alesefya ubushiku bwa mwikalwe ubwa mipepele no kutwalilila uwa bucishinka kuli Lesa?

Pa kucite co akabila amano no kushilimuka. Lelo nga aletukuta ukupeela Yehova umucinshi wamulinga no mulume wakwe ifyo fine, ninshi alewamya. Yesu afundile ati: “E ico, peeleni ifya kwa Kaisare kuli Kaisare, ne fya kwa Lesa kuli Lesa.” (Mateo 22:21) Ca cine ukuti alelanda pa fyo Abena Kristu bafwile ukupeela ku buteko, ubo pa numa baebelwe ukunakila. (Abena Roma 13:1) Lelo, ukufunda kwakwe kuti kwaafwa no mukashi uufwile ukunakila Lesa no kwishiba umwa kupelela ilyo alenakila umulume nga fintu Amalembo yalanda, nangu line umulume tasumina.

Takuli uwaishiba Baibolo uwingatila taikomaila pa kuti Umwina Kristu alingile ukumfwila Lesa Wa maka yonse intanshi, no kuba uwa bucishinka kuli wene lyonse. (Imilimo 5:29) Lelo, limo kapepa wa cine kuti acita ifyo umulashi uushasumina amweba ukucita nga ca kuti ukucite co takuletoba amafunde ya kwa Lesa.

Tusanga ica kumwenako twingasambililako ica baHebere batatu icashimikwa muli Daniele icipandwa 3. Imfumu Nebukadnesari, yaebele bene na bambi ukuya ku nika ya Dura. Apo balishibe ukuti kwali no kuyaba ukupepa kwa bufi, aba baHebere batatu nalimo tabafwaile ukuyako. Napamo Daniele alilombele ukuti eyako, lelo aba batatu balifililwe ukucite co.a E co, baumfwilile ifunde no kuyamonekela kulya, lelo tabali na kucitako kabili tabacitileko icabipa nangu cimo.—Daniele 3:1-18.

Na mu nshiku sha mwikalwe isha kusefya umulume uushasumina kuti afwaya umukashi wakwe uwa Bwina Kristu ukucita fimo ifyo ashingatemwa ukucita. Moneni ifya kumwenako: Aeba umukashi wakwe ukwipika ifya kulya pa bushiku bwa mwikalwe ubo wene na bambi balesefya. Nelyo kuti atila ulupwa lwakwe (ukusanshako umukashi wakwe) batandalile ulupwa lwakwe pali bulya bushiku ku kulya ica kulya nelyo ku kwisha fye. Nelyo ilyo ubushiku bwa kusefya bushilafika, kuti atila ilyo umukashi wakwe aleya ku kushita fimo, amushitileko ifya kulya fyaibela ifyo balya pa bushiku bwa kusefya, ifya bupe, ifipepala fya kufungilamo ubupe, na bakardi ba kutumina pamo ne fya bupe.

Kwena umukashi wa Bwina Kristu afwile ukupampamina pa kukanacitako ificita aba mu mipepele ya bufi, lelo ni shani nga umulume amweba ukucita ifi twalandapo? E mutwe wa lupwa, kabili Icebo ca kwa Lesa citila: “Mwe bakashi, nakileni abalume benu, ifyo ciyene muli Shikulu.” (Abena Kolose 3:18) Bushe nga aebwa ukucita ifi kuti anakila pamo ngo mukashi no kutwalilila uwa bucishinka kuli Lesa? Afwile ukumona ifyo enganakila umulume wakwe no kutwalila ukumfwila Yehova.

Limo ilyo kushili ukusefya, umulume wakwe kuti amweba ukwipika ifya kulya fimo, nampo nga ni co alifitemwa sana nelyo alibelesha ukulya ifya kulya fya musango yo pali yo nshita ya mwaka. Akafwaya ukulanga ukuti alimutemwa no kunakila bumutwe bwakwe. Bushe kuti aipika ica kulya ca musango yo nga umulume amweba ukucite co pa bushiku bwa kusefya? Abakashi ba Bwina Kristu bamo kuti bacite co ukwabula ukucushiwa na kampingu, ukuumona fye ngo mulimo babomba lyonse uwa kwipika ica kulya cila bushiku. Kwena takuli Umwina Kristu uwingepikila ukusefya, nangu line umulume wakwe alacite co. Limo kuti afwaya umukashi wakwe ukuya nankwe ku kutandalila ulupwa lwakwe pa nshita shalekanalekana cila mweshi nelyo cila mwaka. Bushe kuti aya nankwe na pa bushiku bwa kusefya ubwa mwikalwe? Nelyo bushe kuti alamushitila ifyo alefwaya ukwabula ukubebeta ifyo alabomfya ifyo amushitila ilyo acilashita fimbi?

Kwena umukashi wa Bwina Kristu afwile ukutontonkanyapo pa fyo cintu alecita cilekuma bambi. (Abena Filipi 2:4) Takafwaye ukuleka bambi ukumona kwati na o alesefyako ubushiku bwa mwikalwe, nga fintu abaHebere balya batatu napamo tabafwaile bambi ukubamona pa kuya ku nika ya Dura. E co, kuti apelulushanya no mulume wakwe mano mano, ukumona nga kuti akonka ukuyumfwa kwakwe no kuicitila fimo ifikumine ukusefya pa kulangulukilako umukashi wakwe uwamutemwa no kumucindika. Napamo kuti aumfwikisha ifyo cingawama kuli bonse babili ukucincintila ukulengwe nsoni kwingabapo nga ca kuti umukashi akaana ukucitako ificitwa mu mipepele ya bufi. Ca cine, ukulanshanishisha kabela mu mutekatima kuti kwafumyapo ubwafya mu mutende .—Amapinda 22:3.

Kuli pele pele, Umwina Kristu wa busumino kuti abebeta ifishinka e lyo asalapo ica kucita. Afwile ukwangwa ukumfwila Lesa intanshi, nga fintu abaHebere batatu bacitile. (1 Abena Korinti 10:31) Lelo, pa kwishibe co, Umwina Kristu afwile ukwishiba fimo ifyo engacita nga ca kuti umutwe wa lupwa nelyo umulashi amweba ukucita no kutwalilila uwa bucishinka.

[Futunoti]