Twalilileni Ukupikintika mu Mulimo wa kwa Shikulu

¹ Pamo nge Nte sha kwa Yehova, twaliba abapamfiwa. Twaba ‘abapikintika mu mulimo wa kwa Shikulu’ kabili twalikwata ukucetekela kwa kuti, ilyo tulesungilila ukukuntwa kwesu ukwa mulimo ukwasanguluka kabili ukwashimpwa pa kutemwa, ‘ukucucutika kwesu te kwa fye muli Shikulu.’ (1 Kor. 15:58) Tulaalika bambi aba nko shonse ukwakana na ifwe mu mulimo wesu uushaiwamina uwa kubilisha imbila nsuma iya Bufumu bwa kwa Lesa. Pa kuba abasekelela mu kulunduluka kwa uyu mulimo wa Bufumu, tulasunga icalembwa ca mibombele yesu, ica maawala ayapooswa mu kushimikila ne fya kufumamo ifisangwamo.

² Cili ca kukoselesha ukumona ukuti mu myeshi ya nomba line muno Zambia, impendwa ya bakasabankanya abalecita lipoti umulimo wabo uwa mwi bala naingilishiwako. Nangu cibe fyo, kucili kuliko incende ishingi ishilekabila ukuwamyako. Kuliko ukukabila kwa kwingilishako imibombele yesu mu kwakana mu butumikishi bwa ku mwinshi no mwinshi, mu kutungulula amasambililo ya Baibolo aya mu ŋanda na mu kushalika bamagazini. Icilonganino cimo na cimo cilingile ukumona kuli cene ukuti nabakwata imitantikile ya mibombele ya lyonse iya Bushiku bwa Magazini pamo nge Fibelushi, pamo fye nga fintu cakomailwepo mu Ulupungu lwa kwa Kalinda ulwa January 1, 1994, ibula 24, paragrafu 17. Bushe icilonganino cenu calikwata iyi mitantikile? Nga te ifyo, mulandu nshi uwa kukanatampila nomba?

³ Nga fintu cilumbwilwe muli paragrafu ya kubalilapo, ukucita lipoti umulimo wesu uwa mwi bala cintu cimo ico ifwe bonse tulingile ukulanguluka nge cakatama. Cili ica kulengo buseko ukumona ukuti ifilonganino ifingi nomba filetuma amalipoti ya fiko aya cila mweshi pa nshita. Tulefwaya ukumutasha pali ici. Lekeni kasabankanya umo na umo atwalilile ukukonka ifya kucinkulako pa malipoti yacelwa ifipeelwa ku filonganino libili libili ukupitila mu Ubutumikishi Bwesu Ubwa Bufumu. Ukucinkulako kutila: ‘Nga ca kuti mwafuma pa cilonganino cenu pa ciputulwa ca nshita icipi ukucepako pa myeshi itatu, mulekabila ukutwalilila ukutuma amalipoti ya mulimo wenu uwa mwi bala ku cilonganino ca ku mwenu. Nga mwatuma ukucila pali lipoti umo pa nshita imo ine tumeni lipoti umo ku mweshi umo na umo. MWISAKAANYA amalipoti ya myeshi yapusanapusana pali slipi wa lipoti umo.’—Moneni Ubutumikishi Bwesu Ubwa Bufumu ubwa December 1993, ibula 4.

⁴ Ulubali na lumbi ululekabila ukusakamana kwa bakasabankanya bonse mulimo wa bupainiya bwa kwafwilisha. Impendwa ya abo abaleakana muli iyi mibombele ili inono nga nshi lintu yalinganishiwa ku cipimo ca pa muulu ica mwaka wapwa. Cinshi cingaba e mpika? Bamo aba ifwe twalikwata imilandu ya cine cine. Nangu cibe fyo, tatulingile kulaba ukuti Satana ne micitile yakwe iya fintu bakongamina ku kupikanya ubumi no kutusungilila abalabikilwa mu kukumanina pa kuti twingakwata inshita inono nelyo ukukanakwata fye ne nshita iya mabuseko ya Bufumu. (Mat. 6:33) Bushe iwe pa lobe, kuti wateulula imibombele yobe pa kuti imimwene yobe, amabuyo yobe, no bumi bobe fingaba ifyacilapo kwanguka, ifishapikana nga nshi?

⁵ Baeluda na babomfi batumikila balingile ukubuula ubutungulushi mu mulimo wa bupainiya bwa kwafwilisha. Ukukwata bakasabankanya abengi ukwakana muli bupainiya bwa kwafwilisha kuti kwaleta ubunonshi bwa ku mupashi ubwingi ku cilonganino pamo fye nga fintu ifya kumwenako fyakonkapo filelangilila. Eluda umo acitile lipoti ukuti caliba “ca kukoselesha nga nshi ku cilonganino kabili calyafwa bumupashi capamo ne mpendwa ya basangwa ku kulongana.” Eluda uyo umwine wine alembesheko aali uwasekelela nga nshi: “Abengi nabailunda kuli ifwe . . . ilintu bambi, abashalembeshako, na bo bene balingilishako icipimo cabo ica mulimo apakalamba nga nshi.” Ukulumbulula kwapalako ukwingi kulangilila ukuti iyi mitantikile yalisangwilako apakalamba ku buseko na bumupashi bwa filonganino mu kulunda ku kucincimusha umulimo wacilapo kubamo kupimpa kabili uwafumamo cimo.

⁶ Bushe kuti wayakanamo mu mulimo wa bupainiya bwa kwafwilisha mu myeshi ileisa? Bushe nukwata inshita ya kubomba muli ici cifulo? Bushe kuti wateulula imibombele pa kuti wingakwata inshita? Peelako itontonkanyo lyabamo ipepo ku mibele ya pa lobe. Bupainiya bwa kwafwilisha pa kutanukila ukwingila mu mulimo wa bupainiya bwa nshita yonse. Mulandu nshi te kulaalikilako bambi mu cilonganino abakumanisha ififwaikwa fya mulimo wa bupainiya bwa kwafwilisha ukubomba na iwe?

⁷ Bomfya ukufunda Paulo apeele Timote ukulenga ‘ukulunduluka kobe ukumoneka’ no ‘kufishapo bukapyunga bobe.’ Pepa ukuti Yehova engapaala ukubombesha kobe na kulya ukwa bantu bakwe mu cifulo icili conse na bo bene abaletukuta ‘ukufishapo bukapyunga bwabo.’ Shi imibombele yesu iyaikatana ingamucindika.—1 Tim. 4:15; 2 Tim. 4:5.