Laalika Bambi Ukukonka Umuntu Wakulisha

¹ Nga fintu calembwa pali Mateo 5:14, Yesu aebele abasambi bakwe ukuti: “Imwe muli lubuuto lwa pano isonde.” Abakonshi ba kwa Yesu baali no kweba abantu mpanga yonse pa lwa Bufumu bwa kwa Yehova no kupayanya Kwakwe ukwabamo kutemwa ukwe pusukilo ukupitila muli Yesu. Mu kuba no ko kutumwa mu muntontonkanya, mu mweshi wa December tulelolesha ku ntanshi ku kutambika icitabo Umuntu Wakulisha Uwabalile Abako Uwa Mweo. Pano palipo imitubululo imo iyo wingatemwa ukubomfya.

² Pa numa ya kuilondolola, kuti pambi wabika ifyakonkapo mu mashiwi yobe yene:

◼ “Abengi balilanguluka pa fintu Yesu aali lintu aikeleko ngo muntu pano isonde. Ni mu nshila nshi muletontonkanya apuseneko ukufuma kuli bambi? [Leka asuke.] Ici citabo ca kucebusha, Umuntu Wakulisha Uwabalile Abako Uwa Mweo, cishimika ifishinka fikalamba ifya bumi bwakwe no butumikishi, kabili cipayanya ukushilimuka mu musango wa muntu aali. Pa numa ya kubelenga cene, bamo bayumfwa kwati fye bacikwata ishuko lya mu nshita ilya kubishanya na wene pa lwabo, ukwakana ukuyumfwa kwakwe, no kuimwena abene ubutumikishi bwakwe.” Losha ku cikope ca kubalilapo mu citabo, icilangisha umutwe. Lyene alukila ku mitendekele, kabili belenga paragrafu walenga bubili pe samba lya kamutwe kanono “Mwenamo pa Kusambilila pa lwa Wene.” Tambika icitabo pa musangulo wa K2,400.

³ Nelyo kuti pambi wasosa icapale fi:

◼ “Muli cino ciputulwa ca mwaka abantu baletontonkanya pa lwa kwa Yesu. Nangu cibe fyo, pa mulandu wa kuti ifintu fyabipa ifingi nga nshi filecitika ukushinguluka icalo conse, bamo kuti pambi batwishika nga Yesu mu cituntulu alatusakamana. Ni shani fintu muyumfwa pa lwa ico?” Leka asuke. Alukila ku cipandwa 24 ica citabo ca Umuntu Wakulisha, kabili mu kwipifya lanshanyeni umulandu Yesu aishile kwi sonde. Lyene belenga Yohane 15:13, ukukomaila pa kutemwa kwa kwa Yesu ukwa kufuma ku mutima ukulola kuli bambi. Ibukisha ukukwata bamagazini ba nomba line, broshuwa, nelyo trakiti walinga uwa kutambika nga ca kuti icitabo tacipokelwe.

⁴ Moneni imitubululo na imbi pano:

◼ “Abacaice abengi balefwailisha abantu basuma abo bengapashanya, lelo calyafya pa kubasanga. Yesu Kristu aimikile uuli onse ica kumwenako capwililika. [Belenga 1 Petro 2:21.] Ubumi bwakwe bonse bwashingulwike pa kupepa Wishi wa ku muulu. Cinshi muletontonkanya cingaba e ca kufumamo nga ca kuti abantu bafulilako baesha ukupashanya wene?” Leka asuke. Losha kuli paragrafu yalenga butatu pe bula lyalenga bubili ukufuma ku lya kulekelesha, iilondolola imibele yakwe iyaibela. Londolola fintu icitabo ca Umuntu Wakulisha cingaafwa ifwe bonse ukuba Abena Kristu bawaminako.

⁵ Kuti pambi wafwaya ukubomfya icapale ci:

◼ “Lintu umo alumbula Yesu Kristu, abantu abengi batontonkanya wene atemwa nga akanya nelyo ngo muntu uulecula uuli mupepi no kufwa. Itontonkanyo lyabo pa lwa kwa Yesu lisanshamo ukufyalwa kwakwe ne mfwa yakwe epela. Ifintu fya kusungusha asosele no kucita mu nshita yakwe iya bumi ilingi line tafimonwa. Cintu apwishishishe cilambukila umuntu onse uwabala abako uwa mweo pano isonde. E mulandu wine cabela icakatama ukuti tusambilile ukufika pantu twingapesha pa lwa fintu fya kusungusha ifyo acitile mu kutwimininako.” Belenga Yohane 17:3. Alukila kwi bula lya kubalilapo ilya mitendekele ya citabo ca Umuntu Wakulisha, kabili belenga paragrafu yalenga bune. Londolola fintu icitabo cingaba cakwe na fintu cingabomfiwa kwi sambililo lya pa lwakwe.

⁶ Shininkisha ukusunga icalembwa ca buseko ne fishalikwe pa kuti wingabwelelako ukupitila mu fipempu fya kubwelelamo. Ilyo kuciliko inshita, lekeni mu kupimpa tufwaye abantu ba mitima ya bufumacumi no kubaafwa ukuba abakonshi ba Mupusushi wesu, Yesu Kristu.—Mat. 16:24.