Bacincishe Ukusanguka Abakonshi Bakwe
1 Pali 1 Abena Korinti 3:6, Paulo alembele ukuti: “Ine nalilimbile, Apolo alitapilile, lelo ni Lesa e wameseshe.” Paulo abomfeshe uku kupelulula ku kwaafwa bamunyina ukumona ukukabila kwa kubomba mu kwikatana pe samba lya bumutwe bwa kwa Kristu. Muli iyi nshila na kabili alibaafwile ukutesekesha ulubali lwakatama balebomba mu mulimo wacindama uwa kulimba no kutapilila.
2 Ulya mulimo wa kupususho bumi uli no kuletwa kuli pelepele muli ino ine nshita. Pamo nga Abena Kristu baipeela, tulaakana icishingamo cakatama ica kwaafwa bambi ukusanguka abakonshi ba kwa Yesu. (Imil. 13:48) Ni shani fintu ukakonkelela ubuseko buntu wabimbwile pa kubomfya icitabo ca Umuntu Wakulisha Uwabalile Abako Uwa Mweo?
3 Nga ca kuti ulebwelela ku kutandalila umuntu uwapokele icitabo, kuti watila:
◼ “Lintu twalanshenye pa muku walekelesheko, twalandile pa fintu Yesu Kristu aali pamo ngo muntu. Namushilile fye ne citabo Umuntu Wakulisha Uwabalile Abako Uwa Mweo. Cinshi cimusekeshe sana pa lwa kusambilisha kwa kwa Yesu no buntu bwakwe?” Leka asuke. Alukila ku cipandwa 113, kabili lanshanyeni ica kumwenako cawamisha ica kwa Yesu ica kuicefya. Belengeni Abena Filipi 2:8 ku kulanga fintu umutumwa Paulo amwene imibele ya mutima iya kuicefya iya kwa Yesu. Lyene kuti walondolola fintu ifyafulilako fingasambililwa ukupitila mwi sambililo lya Baibolo ilya lyonse.
4 Kuti pambi wasalapo iyi mitendekele:
◼ “Twalanshenye pa lwa fintu Yesu acitile ilintu aali pe sonde ifyo filango kuti mu cine cine alatusakamana. Cinshi cintu muletontonkanya akacita mu kupelako ku kwilulula abo abacula apakalamba?” Leka asuke. Alukila ku cipandwa 133, kabili pitulukeni mu kulandapo kusangwa muli paragrafu yalenga busano. Alukila ku cikope pe bula lyakonkapo, kabili londolola fintu imibele ikaba lintu ukufwaya kwa kwa Lesa kwacitwa pe sonde nga mu muulu. Londolola ukumwenamo kukesako pa kusambilila ifyafulilako.
5 Nga ca kuti umuntu takwete ubuseko bwakumanina ica kuti engapoka icitabo pa kutendekelako, nakalimo kuti watampa ukulanshanya kobe muli iyi nshila:
◼ “Ndemona ifwe bonse babili tulesumino kuti abantu abengi ilelo bapashanya ubumi bwabo ku muntu uyo bamona nge cipasho cisuma. Yesu Kristu e cipasho cawamisha ico umo engabala akwata. Kuti natemwa ukumwebako isambililo lyacindama nga nshi ilyo nasambilile pa kubebeta ica kumwenako catwimikile Yesu. [Alukila ku cipandwa 40 mu citabo ca Umuntu Wakulisha, kabili alwila ukusakamana kwi sambililo lya kwa Yesu ilyabamo icikuuku pa lwa nkumbu.] Ici calincinkwileko mu maka fintu nakabile ukulangisha iyi mibele ukulola kuli bambi.” Belenga Mateo 5:7. Tambika icitabo nelyo broshuwa wa Bushe Lesa mu Cituntulu Alatusakamana?
6 Nelyo kuti pambi wafwaya ukwesha iyi mitununukile ya kulungatika:
◼ “Umuku walekelesheko namutandalile, twalanshenye ubucindami bwa kunonka ukwishiba pa lwa kwa Yesu. Yohane 17:3 itila ‘umweo wa muyayaya’ waba mu kukwata ukwishiba kwa musango yo. Ni shani fintu twingacite co?” Leka ankuleko. Twalilila pa kulondolola imitantikile yesu iya kusambilila Baibolo na fintu engamwenamo muli yene.
7 Paulo asosa ukuti umubomfi mu kulobolola “akapokelele cilambu cakwe cine umwabelo kucucutika kwakwe kwine.” (1 Kor. 3:8) Nga ca kuti twaibikilishako fwe bene mu kupambana ukwaafwa bambi ukusanguka abakonshi ba kwa Yesu, icilambu cesu mu kushininkisha cikaba icikalamba.