Abafyashi Abasamwa!

¹ Nga ca kuti uli wacaice uwikala mu ŋanda ya Bwina Kristu, kwalibako inshila yaibela iyo wingalengelamo abafyashi bobe ukuba aba nsansa. Nga ca kuti wasupila inshila yalungama, ‘wiso na noko bakanga.’ (Amapi. 23:22-25) Mu cifyalilwa fye abafyashi bobe bafwaya iwe ukukwata ifyawamisha. Tapali icingabasekesha ngo kukumona walenga icine ukuba icobe no kupeela ubumi bobe kuli Yehova.

² Kuti watasha pa kukwata abafyashi ababa mu cine. Ukutula pa kufyalwa kobe, balikuliisha, ukukufwika, no kukusunga pamo pene no kukusakamana lintu walwele. Ne cacilapo kucindama, balitukuta ukukusambilisha pa lwa kwa Yehova ne nshila shakwe ishalungama; uku kwaba kukansha ukwingafumamo umweo wa muyayaya kuli iwe. (Efes. 6:1-4) Ni shani fintu wingalangisha ukutasha?

³ Lenga Icine Ukuba Icobe: Abafyashi bobe balyesha ukukusambilisha ukukatamika icine, ukulunduluka lwa ku mupashi, no kupalama ku kuteyanya kwa kwa Yehova. Kuti walangisha ukutasha pa kuba uwasekelela mwi sambililo lya lupwa ukwabulo kuti balekupatikisha. Langisha ukuti ulafwaisha ukusangwa ku kulongana, ukuitendekelako we mwine ukuipekanya pa kuti ulupwa lwingafika mu nshita. Ikala na bafyashi bobe mu kulongana, kabili peepekesha ukupitila mu kulakonka mu mpapulo shilesambililwamo. Tinamina ukwakana mu kulongana pa kwasukapo. Ilangishe we mwine ukuba umusambi waitemenwa uwa mwi Sukulu lya Butumikishi bwa Teokrasi, ukupokelela imbali no kucita apo wingapesha ukufikilisha shene. Itemenwe ukwaafwa ukubombako utumilimo twa pa Ŋanda ya Bufumu, uko ukwaafwa kobe kwingakabilwa. Ukuibimba mu mibombele ya musango yo kuti kwaafwa umutima obe ukutontomesha pa cikuwamine lwa ku mupashi.

⁴ Imika Amabuyo ya Kulunduluka: Tinamina ukwakana mu mulimo wa mwi bala mu kukumanina, ukulangisha ukufwaisha ukufikapo nga kasabankanya. Endela pamo no kubelenga kwa Baibolo ukwa cila mulungu nelyo, icacilapo no kuwama, ibelengele Baibolo onse we mwine. Pingulapo mu muntontonkanya obe ukuti uli no kukumanishe fifwaikwa fya kuipeela no lubatisho. Abafyashi bobe kuti bakwaafwa ukuteyanya amasambililo ya ku sukulu mu kusakamanishisha, mu kuba ne cilolwa ca kunonka ukukansha uko kukakupangasha ukwakanamo mu kukumanina mu mulimo wa kwa Yehova. Tontomesha pa kulundulula ukushimikwa ukwingacincisha bambi ukukutasha ku mashuko ya mulimo ayaibela pamo nga bupainiya nelyo umulimo wa pa Bethel. (Imil. 16:1, 2) Ukufika pa mabuyo kuti kwakwaafwa ‘ukusuminisha ifyacilamo, ukuti . . . wisulemo ifisabo fya bulungami.’—Fil. 1:10, 11.

⁵ Ubwaice ni nshita ya kusambilila, ukunonka ukubelesha, no kunonka ukulamuka mu fya kubomba na bambi. Ni nshita ilyo wingaipakisha ubumi ukwabula ukutitikisha konse ne fishingamo fya mu bukalamba. Solomone atile: “Samwa mu bulumendo bobe, we mulumendo, no mutima obe ukusekeleshe mu nshiku sha bulumendo bobe.” (Luk. Mil. 11:9) Nga ca kuti wapampamina pa kubombela Yehova mu bwaice bobe, ukalobolola amapaalo ayabelelela.—1 Imila. 28:9.

⁶ Nga ca kuti ‘wakonkelela ubulungami’ mu cifulo ca “lunkumbwa lwa bulumendo,” ukelululako abafyashi bobe icisendo cishaifinina ica masakamika no kukalipwa umutima. (2 Tim. 2:22) Ukalenga umutima obe wine ukusamwa. (Amapi. 12:25) Ne cacilapo pali fyonse, ukalenga Kabumba obe, Yehova Lesa ukusamwa.—Amapi. 27:11.