Insansa Shaba mu Mulimo wa Nshita Yonse

¹ Apo uli mwaice, ufwile walitontonkanyapo pa lwa nshita yobe iya ku ntanshi. Amapinda 21:5 yatweba ukuti “amapange ya wacincila yatwala ku kutuntumika.” Ni we wingamwenamo nga watontonkanya bwino pa fyo ufwaya ukucita ku ntanshi. Ilyo ulepanga ifya kucita ku ntanshi, tontonkanya na pa kubombako umulimo wa nshita yonse. Mulandu nshi?

² Ipusha abakalamba ababombeleko bupainiya ilyo bali abaice bakwebe ifyo bamona uyu mulimo kabili na cine balekweba fimo fine ukuti: “Ilya e nshita naipakishe sana ubumi!” Munyinefwe uwaipakishe insansa shaba mu mulimo wa nshita yonse ukutula ku bulumendo mpaka akota, atile: “Ndaba ne nsansa ishingi nga natontonkanya pa nshita nali umulumendo no kuicinkulako ne mwine ukuti nalyumfwilile ukupanda amano kusuma ukwa kuti: ‘Ibukisha Kalenga obe mu nshiku sha bulumendo bobe.’” (Luk. Mil. 12:1) Icikabilwa kuteyanya bwino nomba line, we mwine na bafyashi bobe, ukufwaya inshila ya kuti waipakishishamo ishi nsansa mu bulumendo bobe nelyo ubukashana.

³ Mwe Bafyashi, Koselesheni Abana Ukubombako Umulimo wa Nshita Yonse: Apo Yehova ni Wishi wa kutemwa, alamulanga bwino inshila ya kuyamo. (Esa. 30:21) Pa kumutungulula bwino , alanga ica kumwenako cisuma kuli imwe mwe bafyashi ba Bwina Kristu. Ukucila ukulekela abana benu ukuisalila inshila bengamona ukuti isuma ukuyamo, mano mano bakanshisheni mu nshila ingabawamina ukuyamo pa kuti bakapaalwe na Yehova. Lyena, lintu bakula, ukukansha kwenu kukabafwa “ukupaatululo busuma ukubulekanya no bubi.” (Heb. 5:14) Ifyo abakalamba bapitamo, fyabalenga ukwishiba ukuti teti bacetekele ukupingulapo kwabo, bafwile ukucetekela Yehova ku kutambalika inshila shabo. (Amapi. 3:5, 6) Abacaice e bakabila sana ifi, pantu tabalati beshibe ifingi.

⁴ Mwe bafyashi, cilya abana benu baya balefika mu myaka ya bupungwe, nelyo ilyo bashilafika, landeni na bo bwino pa fyo bapanga ukucita. Impanda mano sha ku sukulu, bakafundisha, na bana be sukulu banabo bakesha ukubasonga ukuti basale ifya mu calo, no kusupiila ifya ku mubili. Afweni abana benu ukusala amakosi ya ku sukulu ayengabafwa mu mikalile, ica kutila balaisakamana abene ukwabula ukulekelesha ifya Bufumu. (1 Tim. 6:6-11) Mu ncende ishingi, icikabilwa fye kupwisha isukulu lya ku secondari no kwishiba imilimo pa kuisakamana bwino ilyo ushilatendeka bupainiya bwa nshita yonse.

⁵ Koselesheni abacaice ukushukila ica bupe ca bushimbe. Nga ku ntanshi bafwaya ukuupa, bakaba nabaipekanya ukushingamwa ne milimo ya mu cupo. Nga mulelanda ifisuma pa lwa mulimo wa bupainiya, ukuyabombako ku ncende ukuli ukukabila, umulimo wa pa Bethel, no kushimikila, mukalenga abacaice nangu bacili abanono sana ukubomfya amaka yabo mu nshila isekesha Yehova, iinonsha bambi, kabili iibaletela abene insansa.

⁶ Mwe Bacaice, Bikeni Umulimo wa Nshita Yonse Intanshi: Mwe bacaice, tamufwile ukusakamikwa pa fyo umulimo wa bupainiya waba. Kuti mwaesha ukubombako bupainiya bwa kwaafwilisha lyonse ilyo mwatemwa pa nshita muli ku sukulu na lintu mwaisala amasukulu. Lyena cine cine mukeshiba ifyo umulimo wa bupainiya waba! Bushe kuti mwapekanishisha libela ukubombako umulimo wa bupainiya bwa kwaafwilisha mu myeshi ileisa?

⁷ Nga uli munyinefwe wacaice uwaba mu kuteyanya kwa kwa Lesa, tontonkanya sana na pa lwa kutinamina ukuba umubomfi utumikila. (1 Tim. 3:8-10, 12) Na kabili, pingwila libela nampo nga ilyo wafisha imyaka ifwaikwa, kuti waipushako umulimo wa pa Bethel nelyo ukusangwa kwi Sukulu lya Kukansha Ilya Butumikishi. Umulimo wa bupainiya ukakusambilisha ifintu ifyacindama, pamo nga ukutantika ifyo ulefwaya ukucita, ifyo wingawamyako ukuteyanya ifintu, ifya kumfwana na bantu bambi, ne fya kwangwa ku fintu. Ifi fyonse fikakuteyanishisha libela ku milimo iikalamba iya ku ntanshi.

⁸ Icifwaikwa sana pa kubomba bwino umulimo wa nshita yonse mutima wa kusakamana bwino fyonse ifyakuma umulimo wa kwa Lesa. Umutumwa Paulo akoseleshe ukuba no mutima wa musango yo, kabili alandile na mapaalo yafumamo, atile: “Conse ico mulecita, bombeni no mutima onse, nga kuli Shikulu, . . . mube abaishibo kuti ni kuli Shikulu mukapokelele cilambu.” (Kol. 3:23, 24) Shi Yehova namulambule nsansa ishingi ilyo mulebomba umulimo wa nshita yonse!