“Kuti Mwabomba Bwino Sana Bupainiya!”
1. Bushe nkashi umo aleumfwa shani ukubomba umulimo wa bupainiya?
1 Ba Kathe B. PaIm batile: “Takuli incito imbi iyo nali no kubomba iyali no kundetela insansa nelyo iyali no kunenga ukuba ne cibusa cisuma na Lesa.” Ba Kathe baliipeleshe ukubomba imyaka iingi nga nshi mu mulimo wa bupainiya ukushinguluka fye icalo conse ica Chile, icaba ku South America. Bamo nga batontonkanya pa fisuma ifingi ifyaba mu mulimo wa bupainiya bwa nshita yonse, nalimo kuti bamweba ukuti: “Kuti mwabomba bwino sana bupainiya!”
2. Londololeni ico tukwatila sana insansa nga tulebomba umulimo wa kwa Lesa.
2 Mulimo Uuleta Insansa: Yesu uo tupashanya, aleba ne nsansa sana mu kucita ifyo Wishi alefwaya. (Yoh. 4:34) Kanshi ilyo alesambilisha abasambi bakwe, alebasambilisha ukufuma pa nshi ya mutima ukutila insansa shine shine shifuma mu kubomba imilimo ya kwa Yehova. Tulaba ne nsansa nga ca kuti mu mikalile yesu tulebomba imilimo iilenga Yehova ukutupaala. E lyo, tulaba sana ne nsansa lintu tulebomfya inshita yesu, amaka, ne fyuma ku kwafwa bambi.—Imil. 20:31, 35.
3. Busuma nshi twingasanga nga tulebomba inshita iikalamba mu kushimikila?
3 Nga tulebomba inshita iikalamba ukulashimikila, e lyo tukalasanga ubusuma bwaba mu kutendeka amasambililo ya Baibolo no kulayatungulula. Nga e lyo twatampa ukushimikila, kuti twamona kwati abo tusanga pa mayanda bamoneka kwati nabakwata ifya kucita ifingi nelyo ifya kubapumfyanya, lelo mu kuya kwa nshita nga twaishiba bwino ifya kushimikila, kuti twasanga ukuti icifulo tushimikilamo cisuma nga nshi. Bapainiya nga babomba bupainiya pa mwaka umo uutuntulu, kuti basangwa kwi Sukulu lya Mulimo wa Bupainiya kabili kuti babomfya ifyo basambilile kwi sukulu ilyo baleshimikila. (2 Tim. 2:15) Nga twatwalilila, kuti twabyala bwino imbuto sha cine isha cebo ca kwa Lesa ishikatwala ifisabo mu kuya kwa nshita.—Luk. Mil. 11:6.
4. Finshi abacaice abali no kupwisha amasukulu balingile ukulatontonkanyapo?
4 Abacaice: Ilyo uli mupepi no kupwisha isukulu, bushe walitala autontonkanyapo pa fyo ukacita mu mikalile yobe ku ntanshi? Apo uli pa sukulu, amasambililo yalalenga ukuti ulefilwa ukubomba imilimo imbi. Nomba ilyo ukapwisha isukulu ukulabomfya shani inshita iyo walebomfya ku masambililo? Mu nshita ya kwingila incito no kulafola indalama, bushe te kuti utontonkanye na pa kubomba bupainiya bwa nshita yonse no kupepa kuli Lesa ukuti akakwafwe? Ifintu fisuma ifyo ukasambilila pamo nga, ukulashimikila abantu abakwata inkulilo shapusanapusana, ukucimfya amafya wakulakwata, ukwishiba umwakupelela, e lyo no kwishiba bwino ifya kusambilisha abantu, fyonse fikakwafwa mu bumi bobe bonse.
5. Bushe abafyashi pamo na baba mu cilonganino kuti bakoselesha shani bambi ukutendeka bupainiya?
5 Mwe bafyashi bushe muleafwa abana benu ukulatontonkanya pa kubomba umulimo wa nshita yonse? Amashiwi mulanda ne fyo mucita kuti fya-afwa sana abana benu ukulafwaya Ubufumu intanshi. (Mat. 6:33) Ray uuli ne myaka 18 uwatendeke bupainiya ilyo fye alepwisha isukulu, atile: “Bamayo lyonse balelanda ukutila umulimo wa bupainiya ulalenga umuntu ukuba sana ne nsansa.” Bonse mu cilonganino kuti bakoselesha bambi ukubomba bupainiya mu fyo balanda e lyo na mu kubafwilishako muli fimo fimo. Jose uwikala ku Spain, atile: “Mu cilonganino cesu, bonse bamona bupainiya ukuti e mulimo wacindamisha uo abacaice bengabomba. Ifyo balelanda ne fyo baletasha umulimo wa bupainiya, e lyo ne fyo balengafwa fyalengele ukuti cing’angukile ukutendeka bupainiya.”
6. Finshi twingacita nga ca kutila tatutontonkanyapo pa kubomba bupainiya bwa nshita yonse?
6 Ukucimfya Ifingamucilikila Ukubomba: Nomba, limbi kuti mwatila, ‘Nshitontonkanya pa kubomba bupainiya.’ Nga ca kutila e fyo na imwe mutontonkanya, ninshi mulekabila ukupepa kuli Yehova pa fyo mutontonkanya no kumweba amuti, ‘Nshishibe nga kuti nabomba bupainiya, lelo ndefwaya ukucita ifingamusekesha.’ (Amalu. 62:8; Amapi. 23:26) Lyena lekeni Lesa amutungulule ukupitila mu Cebo ca kwe na mu kuteyanya kwakwe. Abengi ababomba bupainiya bwa nshita yonse batalile “basonda” bupainiya bwa kwafwilisha, kabili ubusuma basangilemo e bwalengele ukuti batendeke bupainiya bwa nshita yonse.—Amalu. 34:8.
7. Kuti twacimfya shani ubwafya bwa kutontonkanya ukuti nalimo tatwakalekumanisha amaawala 70 ayafwaikwa kuli bapainiya?
7 Kuti mwacita shani nga muletwishika ukuti nalimo tamwakalekumanisha ama-awala 70? Mulandu nshi te kuti mulandile na bapainiya abali no bwafya ubo mukweteko? (Amapi. 15:22) Lyena tantikeni inshita ishapusanapusana isho mwingakwanisha ukubomba umulimo. Nga mwacita ifyo, nalimo mukasanga ukuti ukubomfya bwino inshita mu mulimo wa kushimikila ukucila ukuibomfya ku fintu ifishacindama sana, kukalenga mulekumanisha ukubomba ama-awala 70 ukucila ifyo mwaletontonkanya.—Efes. 5:15, 16.
8. Mulandu nshi mu nshita mu nshita cingawamina ukulatontonkanya pa fyo ifintu fili?
8 Tontonkanyenipo na Kabili: Ifintu mu mikalile ya muntu limo filaaluka. Caliwama cila nshita ukulatontonkanya pa fyo ifintu fili. Ku ca kumwenako, bushe muli mupepi no kuleka ukubomba incito? Ba Randy, abalekele incito ilyo inshita ya kulekelapo tailafika, batila: “Ukuleka bwangu incito kwalinenga ukutendeka bupainiya bwa nshita yonse pamo na bena mwandi, kabili ici calilenga twaya mu kubomba ku cifulo cimbi ukwaba ukukabila kukalamba. Lesa alimpaala mu nshila ishingi nga nshi pali ifi nasalilepo ukucita, lelo ipaalo likalamba pali fyonse, ni kampingu iisuma iyo nakwata.”
9. Finshi abaupana balingile ukulatontonkanyapo?
9 Abaupana bamo pa numa ya kutontonkanya pa fyo ifintu fili, basanga ukuti bonse babili tabalingile ukulabomba incito ya cila bushiku. Ca cine, pa kuti ulupwa lucite ica musango yu, abaupana bakabila ukucefyanyako ifya kucita mu mikalile yabo, lelo nga bacita ifya musango yu, bakanonkelamo nga nshi. Ba John, abo abena mwabo balekele ukubomba inshita yonse pa kuti balekwata inshita iikalamba iya kushimikila, batila: “Ndomfwa bwino sana ukwishiba ukuti abena mwandi akasuba konse fye balebombela Yehova.”
10. Cinshi maka maka cilenga Abena Kristu kubombako bupainiya?
10 Tulalanga Ukuti Twaliba no Kutemwa ne Citetekelo: Yehova alilenga ukushimikila ukuba e mulimo wacindamisha uo bonse twingabomba. Nomba line fye cino calo cili no konaulwa, lelo abalilila kwi shina lya kwa Yehova beka fye e bakapusuka. (Rom. 10:13) Ukutemwa Yehova no mutima wesu onse no kumutasha pa fyo atucitila kukalenga tuleumfwila ifunde atupeela ukupitila mu Mwana wakwe ilya kuti tulebombesha mu mulimo wa kushimikila. (Mat. 28:19, 20; 1 Yoh. 5:3) E lyo cimbi ca kutila, ukucetekela ukuti cine cine tuli mu nshiku sha kulekelesha, kukalenga tukalebombesha mu mulimo ilyo kucili inshita, ica kuti tatwakulabomfya ne calo ukucila mu cipimo.—1 Kor. 7:29-31.
11. Finshi tufwile ukwishiba nga ca kutila umo atweba ukutila kuti mwabomba bwino sana bupainiya?
11 Ukubomba bupainiya te kubomba fye amaawala ayengi ayafwaikwa iyo, lelo ni nshila ya kulangilamo ukuti twaiipeela kuli Lesa. E ico nga ca kutila umuntu umo amweba ukutila, kuti mwabomba bwino sana bupainiya, ishibeni ukuti alemutasha ukuti mwalifikapo ukubomba bupainiya. Kabili tontonkanyenipo no kupepelapo pa kuti na imwe mukatendeke ukubomba umulimo wa bupainiya uuleta insansa nga nshi.
[Amashiwi pe bula 4]
Mwe bafyashi bushe muleafwa abana benu ukulatontonkanya pa kubomba umulimo wa nshita yonse?
[Amashiwi pe bula 5]
Yehova alilenga ukushimikila ukuba e mulimo wacindamisha uo bonse twingabomba.