Ino ni Nshita ya Kubila!

1. Cinshi ino nshita ibelele ni nshita ya kubila?

¹ “Tiineni Lesa no kumucindika.” Ubu bukombe bulebilwa ku “luko lonse no mutundu no lulimi na bantu,” na baletungulula ni bamalaika. Cinshi bulebililwa? ‘Pantu naiise nshita ya bupingushi bwa kwa Lesa.’ Tuleikala muli iyo ‘nshita ya bupingushi,’ iikapwa ilyo buno bwikashi bukonaulwa. Abantu bafwile “[ukupepa] Uwabumbile umuulu ne sonde na bemba no tumfukumfuku twa menshi.” Takwaba umulimo umbi uwacindama nelyo uulekabilwa ukubombwa sana ukucila umulimo wa kubila “imbila nsuma ya muyayaya.” Cine cine, ino ni nshita ya kubila!—Ukus. 14:6, 7.

2. Cinshi ababomfi ba kwa Yehova balecita ku kulanga ukuti balishiba ukuti ino tulimo ni nshita ya kubila?

² Imyaka 10 iyapita, ababomfi ba kwa Yehova balibomba amaawala mupepi na mabilioni 12 ukubile mbila ya Bufumu no kupanga abasambi. Abengi balyalula imikalile yabo pa kuti fye balebombako sana umulimo wa kulobolola kwa ku mupashi. (Mat. 9:37, 38) Ku kulangilila, umwaka wapwile, cila mweshi kwaleba bakasabankanya 850,000 abalebombako bupainiya. Bapainiya ba nshita yonse bafwile ukupoosa amaawala 70 mu kubila imbila cila mweshi. E lyo bapainiya ba kwafwilisha, bena bafwile ukubomba amaawala 50.

3. Finshi bakasabankanya ilingi line bacita pa kuti balebomba bupainiya?

³ Ifyo Mwingacita pa Kuti Mube Bapainiya: Apo bapainiya balishiba ukuti “naipipe nshita iyashalako,” balesha apapela amaka yabo ukwangusha imikalile yabo. (1 Kor. 7:29, 31) Balafwayafwaya inshila ya kucefeshamo indalama bakabila pa kuti tabalepoosa sana inshita ku kubomba incito ya malipilo. Ku ca kumwenako, bamo balikuukila mu mayanda ayanono. Bambi na bo balicefyanyako ifipe bakwata ifyo bashikabila. (Mat. 6:19-21) Ilingi line bafwile no kucefyanyako ne fyo batemwa ukucita. Ico bacitila fyonse fi kufwaya ukubomfya inshita iikalamba no kubika amano ku mulimo wa kubila. (Efes. 5:15, 16) Bakasabankanya abengi ababa no mukoosha, abaipeelesha, kabili abacetekela Yehova, baliteyanya bwino ifya kucita ica kuti balabomba bwino bupainiya.

4. Finshi mwingacita nga mulefwaya ukubombako bupainiya?

⁴ Bushe na imwe kuti mwabomba bupainiya? Kuti mwaipushako abacili bapainiya icalenga balebomba. Bombeni na bo mwi bala, pa kuti na imwe mube ne nsansa bakwata muli uyu mulimo. Belengeni ifipande filanda pali bupainiya ifyaba mu mpapulo shesu. Pangeni ukucita fimo ifyo mwingaba na maka ya kubomba pa kuti mutendeke bupainiya. Nga ca kutila pali ubwafya ubulelenga mufilwe kubombako bupainiya, pepeni kuli Yehova, no kumulomba ukuti amwafwe ukupwisha ubo bwafya.—Amapi. 16:3.

5. Bushe bupainiya butwaafwa shani ukuba abacenjela sana mu mulimo wesu?

⁵ Amapaalo ne Nsansa: Bupainiya bulenga twaishiba bwino sana ifya kubomfya Icebo ca kwa Lesa, ne cikonkapo ni nsansa. Nkashi wacaice painiya atile: “Ukulungika ukusosa Icebo ca cine ica kwa Lesa lipaalo icine cine. Bupainiya bulalenga umuntu ukubomfya sana Baibolo. Pali ino nshita nga naya ku ng’anda ne ng’anda, ndeshiba amalembo ya kubelengela abantu balekanalekana abo nsanga pa mayanda.”—2 Tim. 2:15.

6. Bushe bupainiya butusambilisha cinshi?

⁶ Bupainiya bulalenga umuntu acenjela na mu fintu fimbi ifingi ifyacindama. Kuti bwayafwa abacaice ukwishiba ifyo bengabomfya bwino inshita, ifyo bengabomfya indalama shabo mano mano, ne fyo bengalaumfwana na bantu bambi. Abengi ababombako bupainiya, balacindika sana Lesa muli fyonse ifyo bacita. (Efes. 4:13) Kabili bapainiya balikwata ishuko lya kumona ifyo amaka ya kwa Yehova yabaafwa mu fyo balekabila.—Imil. 11:21; Fil. 4:11-13.

7. Bushe bupainiya butwafwa shani ukupalama kuli Yehova?

⁷ Napamo icacila fyonse ifyo tumwenamo muli bupainiya ca kuti tulapalama kuli Yehova. Ukupalama kuli Yehova kuti kwatwafwa ilyo tuleeshiwa. Nkashi umo uwapitile mu bwafya ubukalamba atile: “Bucibusa bwandi na Yehova ubwafuma muli bupainiya bwangafwile ukushipikisha amesho yonse. Kabili ndasekelela pantu inshita ya bukalamba bwandi naibomfya mu kubombela Yehova umulimo wa nshita yonse. Ubu bucibusa bwalingafwa ukubomba ne milimo iyo nalemona kwati teti mombe.” (Imil. 20:35) Shi na ifwe natulepaalwa ilyo tulebombesha mu mulimo wacindamisha uwa kubila.—Amapi. 10:22.