Bushe Kuti Mwaingila pa “Mwinshi Uukalamba uwa Kubombeshamo”?
1. ‘Mwinshi nshi uukalamba uwa kubombeshamo’ uwaisuka?
1 Ilyo Paulo amwene ukuti “umwinshi uukalamba uwa kubombeshamo” nawisuka, taikete na ku cani ukutendeka ukubombesha mu mulimo wa kubila Ubufumu te mulandu na bantu abengi abalemukaanya. (1 Kor. 16:9) Pali lelo ukucila pali bakabilisha ba Bufumu 642,000 isonde lyonse balingila pa mwinshi ukalamba uwa kubombeshamo pa kutendeka umulimo wa bupainiya bwa nshita yonse.
2. Mulandu nshi cawamina cila nshita ukumona nga kuti twabomba bupainiya?
2 Ifintu Filaluka: Nangu ca kutila ifyo tubomba pali ino nshita teti fibe fimo fine ne fibomba Abena Kristu banensu, imibele yesu nalimo kuti yayaluka. E ico, caliba bwino limo limo ukulamona nga natukwata inshita na maka ukucila ukulolela inshita imbi iyo tulemona ukuti e lyo ifintu fikaba bwino. (Luk. Mil. 11:4) Bushe uli mulumendo nangu umukashana uuli mupepi no kupwisha isukulu lya ku sekondari? Bushe abana benu mwe bafyashi balatendeka ukuya ku sukulu nomba line? Bushe nomba line mwalapoka penshoni? Ifintu nga fyayaluka nge fi kuti fyalenga mwakwata inshita ya kutendeka bupainiya bwa nshita yonse. Nkashi umo uwalelwalilila apingwilepo ukutendeka bupainiya lintu ali ne myaka 89. Mulandu nshi? Pantu tabamutekelepo mu cipatala ukucila pa mwaka umo, kanshi amwene ukuti kuti abomba bupainiya.
3. Bushe bamo bayalula shani ifintu pa kuti balebombako bupainiya bwa nshita yonse?
3 Ico Paulo alefwaisha sana, kutandalila bamunyina mu Korinti. Mu nshita ya kuti acite ci, ayalwile ifyo alefwaya no kuya mu kubila imbila nsuma. Abengi abalebomba bupainiya pali ino nshita nabo bene balyalula ifyo balefwaya ukucita pa kuti balebomba bupainiya. Bamo nabo balyangusha imikalile ica kuti babomba incito iilenga balekwata inshita ya kubomba bupainiya. Balisanga insansa mu mulimo wa bupainiya. (1 Tim. 6:6-8) Abaupana bamo balipingulapo ukuti abalume fye ebo balebomba incito, pa kuti abakashi balebombako bupainiya.
4. Cinshi twingacita nga ca kuti tuletwishika ukutila te kuti tufishepo amaawala yafwaikwa?
4 Mwisondwelela bwangu ukutila te kuti mubombe bupainiya pantu muletiina ukuti te kuti mufishepo amaawala yafwaikwa. Cila bushiku maawala fye yabili nangu ukucilapo fye panono e yakabilwa epela. Nga ca kuti muletwishika, esheniko ukubomba bupainiya bwa kwafwilisha pa mweshi umo nangu ibili, ilyo mulebomba mukabombe kwati ni filya fine bapainiya ba nshita yonse babomba amaawala 70. Ici cikalenga mwasonda insansa shaba mu mulimo wa bupainiya. (Amalu. 34:8) Landeni na balebomba bupainiya pali ino nshita. Napamo nabo balemona kwati te kuti batendeke bupainiya. (Amapi. 15:22) Lombeni ukuti Yehova amupaale ukusandulula umulimo wenu uwa Bwina Kristu.—1 Yoh. 5:14.
5. Mulandu nshi bupainiya bwa nshita yonse bwabela umulimo uusuma nga nshi?
5 Bupainiya Mulimo Uusuma Nga Nshi: Mu mulimo wa bupainiya bwa nshita yonse mwaliba mapaalo ayengi. Uyu mulimo ulenga mwaba ne nsansa ishingi ishaba mu kupeela. (Imil. 20:35) Umulimo wa bupainiya ukalenga mukalelungika bwino icebo ca cine. (2 Tim. 2:15) Bupainiya bukalenga mukamone ifyo Yehova afwa abantu bakwe. (Imil. 11:21; Fil. 4:11-13) Bupainiya na kabili bukalenga mukabe ne mibele ya bukapepa, pamo nga ukushipikisha, kabili bukalenga mukapalame kuli Yehova. (Yako. 4:8) Bushe kuti mwaingila pali uyu mwinshi uukalamba uwa kubombeshamo no kutendeka bupainiya bwa nshita yonse?