Mabuyo Nshi Mwaimikila Abana Benu?

¹ Ukutunguluka mu bumi kwashintilila pa kwimika no kufikilisha amabuyo yene yene. Abakonkelela amabuyo yanono nelyo ayashashininkishiwa mu kupelako balalengwe nsoni no kukanaikushiwa. Cifwaya amano pa kwiluka imilimo ya kusupila nga tuli no ‘kwikata ku mweo uwabo mweo wine wine.’ (1 Tim. 6:19) Fintu twaba aba kutasha ukuti Yehova, ukupitila mu Cebo cakwe no kuteyanya, alatulanga mu kulungatika inshila ya kwendamo!—Esa. 30:21.

² Mu kupayanya ubutungulushi bwa musango yo ubwabamo kutemwa, Yehova emikila abafyashi ica kumwenako cisuma. Mu cifulo ca kulekela abana babo abashabelesha ukusala inshila ingabawamina, abafyashi ba mano balabakansha mu nshila iyo bafwile ukwendamo, na lintu bakula, ‘tabakafumemo.’ (Amapi. 22:6) Abafyashi ba Bwina Kristu balishiba pa mulandu wa kubelesha ukuti tabengashintilila pa kwiluka kwabo abene; bafwile ukushintilila pali Yehova. (Amapi. 3:5, 6) Abana balakabila ici mu kucilanapo, apantu ukwishiba kwabo no kubelesha finono nga nshi.

³ Abafyashi kuti baimikila abana babo amabuyo yene yene ayo yengabaafwa ukutontomesha pa “fintu fyacilapo kucindama.” (Fil. 1:10, NW) Kuti batendekela kwi sambililo lya lupwa, ukukoselesha abana ukutesekesha ubucindami bwa liko no kusambililako muli lyene. Cili bwino abana ukukwata icibelesho ca kusambilila libela ilyo bashilaya ku kulongana kwa cilonganino no kupekanya ukwasukapo mu mashiwi yabo yene. Ukwakana mu mulimo wa kushimikila lyonse kwalicindama. Abana banono kuti bacitako fimo ukupitila mu kutambika amatrakiti, ukubelenga amalembo, nelyo ukutambika bamagazini. Lintu baishiba ukubelenga, ukulembesha mu Isukulu lya Butumikishi bwa Teokrasi kuti kwalenga ukulunduluka kwabo ukwa ku mupashi ukwangufyanya. Ukufikapo nga kasabankanya uushabatishiwa nelyo ukusuminishiwa ukubatishiwa fyaba kulunduluka kukalamba nga nshi.

⁴ Ilyo abana babo balesungamina imyaka ya bupungwe, nelyo fye ilyo bashilati babe na bapungwe, abafyashi balingile ukulanda kuli bene pa lwa mabuyo mu kushininkishiwa. Ifiŋombe fya ku sukulu na bo basambilila na bo kuti babakoselesha mu kwanguka ukukonkelela ifikonkelelo fya ku calo, ifya kutemwa ifya ku mubili. Abafyashi balingile ukwafwilisha abana babo ukusala ifisambililo fya ku sukulu ifipayanya ukukansha kubomba, ukubapangasha ku kusakamana ifikabilwa fyabo ifya ku mubili ukwabulo kulekelesha amabuseko ya Bufumu. (1 Tim. 6:6-10) Kuti bakoseleshiwa ukusupila ‘ica bupe’ ca bushimbe, e lyo pa numa, nga ca kuti bapingulapo ukwingila mu cupo, bakaba na maka ya kusunse fishingamo fyafina ifya mu cupo. (Mat. 19:10, 11; 1 Kor. 7:36-38) Pa kulanda pa busuma bwa bupainiya, ukubomba ukuli ukukabila kwakulilako, umulimo wa pa Bethel, nelyo umulimo wa bumishonari, abafyashi kuti balimba mu bana nangu fye ni pa mushinku wa mu kubangilila ukufwaisha kwa kubomfya ubumi bwabo mu nshila iitemuna Yehova, iinonsha bambi, kabili iibaletela amapaalo.

⁵ Te kuli cela mushuke twakwatila abacaice abengi mu kuteyanya ilelo abekatilila ku fyakatamikwa fya Bwina Kristu no kukonkelela amabuyo ya teokrasi. Icalenga sana ukuti batunguluke bafyashi babo aba kutemwa. Nga ca kuti uli mufyashi, bushe abana bobe balemoneka nga balelola kwi? Bushe baleya balelunduluka ukulungama ku kubombela amabuseko ya Bufumu? Ibukisheni, cimo ica fintu fyacilishapo kucindama mwingacita caba kulimbe cine mu bana benu, no kulanda pa lwa cene cila bushiku. Kuti mwapaalwa pa kukwata aba mu ŋanda abali aba busumino mu kubombela Yehova.—Amala. 6:6, 7; Yosh. 24:15.