Icifulo ca Kupepelamo Icawaminako

¹ Amayanda ya Bufumu yabili aya kubalilapo ukukuulwa pe samba lya bwangalishi bwa Dipartimenti wa Makuule ya Mayanda ya Bufumu uwa pe ofesi lya musambo yatendeke ukubomfiwa mu 1995. Ubukuule pa ŋanda ya kubalilapo, mu Emmasdale, Lusaka, bwatampile mu June 1994 kabili iyi Ŋanda ya Bufumu yapeelwe pa July 15, 1995. Iya bubili, mu Chilenje South, Lusaka, yatampilwe ku kupwa kwa July umwaka wapwa kabili yapwishishiwe mu kati ka myeshi fye itatu. Uku kwali kuwamyako nga nshi apantu ubukuule bwa Ŋanda ya Bufumu iya kubalilapo bwasendeleko mupepi no mwaka umo. Nga cingacitika, ukulingana na fintu cilemoneka, ifilonganino fyafulilako mu Zambia fikakwata Amayanda ya Bufumu ayapalako.

² Iŋanda ya Bufumu iya ku Emmasdale, iingisha abantu 200, yalepa amamita 19.17 mu butali na mu bwipi amamita 10.65 kabili yakwata umutenge wa nshimbi. Ifipuna fya mbao ifyayemba ifyatantikwa bwino bwino mu mitande filalundako ku busuma bwa mu kati ka ŋanda umushapikana. Pa mulandu wa kukabila, palibapo iŋanda ya kwikalamo aba kusunga Iŋanda ya Bufumu iyakuulwa fye lwa mupepi. Ulubansa lwalishingulukwako icibumba casumbuka ukufika ku mamita 2.4 kabili icalepa amamita 138.

³ Ukupala Iŋanda ya Bufumu iya mu Emmasdale, iya mu Chilenje na yo yalikwata ulupango lwa cibumba ukushinguluka ulubansa. Kuti yaingisha abantu 250 kabili na yo ine yakwata ifipuna fya mbao ifyalinga ukwikalapo ifyo fyapoopelwa pa nshi. Yalikwata umuputule wa kucitilamo ikalasi lya bubili ilya Isukulu lya Butumikishi bwa Teokrasi no muputule umbi uwa fitabo na bamagazini. Ifimbusu fyakuulwa fyeka, mupepi na mamita yabili ku numa ya Ŋanda ya Bufumu. Akashila kabumbililwa na konkili kasuntinkanya Iŋanda ya Bufumu ne fimbusu.

⁴ Amayanda ya Bufumu yakuulilwe ukubomfya inceshi na mapanelo. Inceshi na mapanelo fipangilwa libela ukubomfya konkili. Pa numa ya kupwisha ukukuula shilabu, inceshi shilemikwa ukushinguluka yene kabili lyene amapanelo yalafyantikwa muli ishi nceshi.

⁵ Iŋanda ya Bufumu iipya mu Chilenje South yalisungwishe nga nshi abekashi muli ilya ncende. Pa myaka iingi bamunyina kulya babomfeshe icipaka icapangilwe ukubomfya amalata. Abantu ba muli iyi ncende balesaalula nga nshi ici cipaka. Nangu cibe fyo, nomba ifintu nafyaluka kabili apantu icifulo cabela mupepi no musebo mupita abantu abengi, Iŋanda ya Bufumu ilamonwa kuli bonse abapita. Mu nshita ya bukuule abalepita abengi baleiminina ku kumona icalecitika. Umwaume umo, pa kupeshiwa amano ku mulimo ushaiwamina uyo amwene, aile kuli ici cifulo ku kwipushako fimo. Pa kutontonkanya ukuti akampani ka makuule kalibimbilwemo muli ulya mulimo, aipwishe abaali ako kampani. Alefwaya ukumfwana na bakakuula pa kuti bengamukuulilako na o. Fintu aali uwasunguka pa kwishiba ukuti takwaliko akampani ka makuule akabimbilwe muli ulya mulimo!

⁶ Tulesekelela capamo na bamunyina mu Chilenje na Emmasdale apo nomba balelonganina mu Mayanda ya Bufumu ayo yasumbula ukupepa kwa kwa Yehova. Cali ca kukoselesha ukumona ukuti bamunyina ukufuma ku filonganino fimbi balibombeshe ukutandalila aya Mayanda yapya ukumona ico na bo bengakwata nga ca kuti balepanga ukukuula Iŋanda ya Bufumu nelyo ukuwamya iyo bakwata kale.

⁷ Cilesubilwa ukuti ukupwishishiwa kwa aya Mayanda, kuletampa iciputulwa ca nshita umo tuli no kumona ukwingilishiwako kwa bwingi bwa Mayanda ya Bufumu ayayemba ayakuulwa mu kusaalala kwa cino calo. Ukukuma ku Mayanda ya Bufumu, icitabo ca Abateyanishiwa ku Kupwilikisha Ubutumikishi Bwesu, ibula 61, cisoso kuti: “Iŋanda ya Bufumu, nge cifulo ca kupepelamo, tacifwile kuba cikuulwa ca makukumya cateyanishiwa ukukopeka bambi. Lintu imikuulile ingapusana ukufuma ku cifulo ne cifulo, imifwaile ya iko kubomfiwa. (Linganya Imilimo 17:24.) Cifwile ukuba icifulo cabamo ukutauluka no kulinga ku kutungulwilamo ukulongana kwa bwina Kristu ukutwafwilisho kukula lwa ku mupashi no kusambilila ulwa kwa Yehova, ukutukoselesho kwakana mu mulimo wakwe uwa Bufumu.” Ukupepa Yehova kwawaminwa umucinshi, e ico, Amayanda yesu aya Bufumu yafwile ukuba ayasuma lelo aya mutengo walinga.

⁸ Tatufwile ukuleka imibele ya Mayanda yesu aya Bufumu ukufuupula abalesekelela ku kusangwa ku kulongana. Nangu cingati Iŋanda yesu iya Bufumu kuti yaba iyalinga, tatufwile ukuileka ukutotobela ukufikila yaonaika kabili yaba iya fiko. Tailingile ukupusana no bukombe bwayemba ubwa Bufumu ubo twasenda. Ilingile ukukatamika ukupepa kwa kwa Yehova.

⁹ Icishinka cili ca kuti ifilonganino fimo tafyakwata icifulo cawama ica kupepelamo pa mulandu wa mafya mu kusange mpanga nelyo ifipepala fya title deed. Nangu cibe fyo, Amayanda ya Bufumu yamo yalibotelela pa mulandu wa kuti ifilonganino tafyaba ifyateyanishiwa.

¹⁰ Ubuyo bwa Dipartimenti wa Makuule ya Mayanda ya Bufumu: Lintu kwaliko ukubilisha kwa kuti iofesi lya musambo lyalimikeko Dipartimenti wa Makuule ya Mayanda ya Bufumu, cilemoneka kwati bamo bacumfwilile mu kuti icishingamo ca kukuula amayanda ya Bufumu nomba cilefuma pa filonganino no kuya kwi ofesi lya musambo. Tacaba mifwaile ya musambo ukupokolola icishingamo ca kukuula Amayanda ya Bufumu. Ifilonganino e fyashingamwa ukukuula amayanda yabo yene aya Bufumu. Tabalingile ukulekela uyu mulimo kuli Dipartimenti wa Makuule ya Mayanda ya Bufumu. Uyu dipartimenti abelako, te ku kukuula amayanda ya Bufumu, lelo ku kwaafwa ifilonganino ukuikuulila Amayanda yabo abene. Ukulanda pa lwa bashingamwa, icitabo ca Ubutumikishi Bwesu pa mabula 61-2 cisoso kuti: “Iŋanda ya Bufumu imo na imo ipekanishiwa, ukwafwilishiwa mu fya ndalama no kusungwa ku cilonganino (ifilonganino) fya pa mwabo ifya Nte sha kwa Yehova. Bamunyina bafwile ukucilanguluko kube shuko te kwafwilisha fye Iŋanda ya Bufumu mu fya ndalama lelo na kabili ukuitemenwa umulimo wabo mu kuisunge ya busaka, iyapempenkana ne yawamishiwa bwino.” E ico, ifilonganino tafilingile ukwikala fye no kwenekela Dipartimenti wa Makuule ya Mayanda ya Bufumu ukubakuulilako.

¹¹ Kufika ku cipimo nshi kuntu Dipartimenti wa Makuule ya Mayanda ya Bufumu akabimbwamo mu fya makuule? Dipartimenti aimikweko ku kubomba nga mpanda mano nelyo kangalila ku kwaafwa ifilonganino ukupoka ifipepala fya title deed, ukubapandako amano pa fya kupoka loni ku Sosaite nga ca kuti icilonganino cafikapo, ukwaafwako muli tumo tumo utwa bukuule, no kupayanya bamunyina aba kwangalila ubukuule. Uyu dipartimenti na kabili ali no kupanda ifilonganino amano ukukuma ku mpanga iili no kukuulwapo nga ili bwino nelyo iyo.

¹² Te mpanga yonse yaba bwino ku fya makuule. Icifulo kuti pambi caba icasululuka nga nshi nelyo cakwata iloba lyatelela nelyo amabwe pa nshi. Ilyo ubukuule bwine bwine bushilatendeka pa cifulo ca musango yo, indalama shafulilako kuti shapooswa pa kupekanya fye icifulo. Icifulo icaba menshi menshi nelyo icabomfiwa ngo kwa kupoosa ifisooso kuti casanshamo ukuwamya ukupinda indalama ishingi ukwa kutendekelako pamo ngo lubali lwa mulimo wa kupekanishisha icifulo. Uyu dipartimenti kuti afwaya ukwishiba nga ca kuti impanga ilemoneka iyalinga ukukuulapo kabili nga ca kuti ifya kusangwilako fimbi fyalilangulukwapo pamo nga imyendele ya cintubwingi na menshi. Bushe icifulo cabela lwa pa kati ka cifulo ca kubombelamo ica cilonganino? Bushe ubukulu bwa cifulo bwalilangulukwapo mu kusakamanishisha? Nga ca kuti calikulisha, icilonganino icinono kuti casanga cene ukuba icayafya ukuwamya cene, kabili nga ca kuti icifulo cinono nga nshi, kuli no kuba impika shimbi. Ku ca kumwenako, nga ca kuti abantu bafulilako balikwata bamotoka mu cilonganino, bushe kuli no kubako incende ya kwimikako bamotoka iyakumanina?

¹³ Mu fyalo fimo, bamunyinefwe balipangako Bakomiti ba Makuule aba mu Fitungu (Regional Building Committees). Aba bakomiti tababa ni dipartimenti ya pa musambo, lelo bapangwa na bamunyina balamuka ukufuma mu filonganino fyalekanalekana. Imibombele yabo ishimpwa pa butungulushi bwa Sosaite. Nga cakabilwa, ifilundwa fya Bakomiti ba Makuule ya mu Fitungu filakanshiwa mu kulundapo kuli Sosaite. Ukubako kwa bakomiti ba musango yu kwalilenga ifilonganino ukukuula Amayanda ya Bufumu mu kwangufyanya, ayo yapwishishiwa mu nshiku shibili nelyo shitatu. Bakomiti ba Makuule ya mu Fitungu bapayanya ubutungulushi bwabamo kulamuka no butungulushi bwashininkishiwa. Bangalila bakabomba no kutantika bene ukwabula ukube cisendo ku uuli onse nelyo ukuumya ulupaka pa uli onse. Ukupangwa kwa Bakomiti ba Makuule ya mu Fitungu kufwaya umupashi wa bukapekape kabili uwa kuitemenwa pa kati ka abo abalamuka kabili ababelesha mu butukushi bwalekanalekana ubwa fya makuule.—Ilu. 110:3.

¹⁴ Baeluda na Babomfi Batumikila: Mulimo nshi uyo baeluda na babomfi batumikila abashalamuka mu fya makuule balingile ukubomba mu fya kukuulakuula? Ukukuma kuli baeluda, Baibolo isoso kuti e “balemutungulula.” (Heb. 13:7, 17) Abaume ba bumupashi ababomba nga baeluda na babomfi batumikila kuti baangalila amadipartimenti ayashibimbilemo ifya makuule. Pa bukuule ubuli bonse, lyonse fye palaba imilimo iishili ya bukuule pamo nga ukwimika bamotoka, ukupekanya ifya kulya, ukulonda, ukusunge fipe, ukucingilila amasanso, ukupekanya ifya kupekanyapekanya, ukushita, ukupende ndalama, na kacipatala kanono. Utu tonse utumilimo tunono tulalenga umulimo wa bukuule ukutunguluka. Baeluda balishingamwa ukubomba umulimo wasakamanishisha kabili uwa kuitemenwa uyo ulingile ukukunta bambi ukuipakisha ukwakana mu mibombele ya teokrasi—ukusanshako ukukuula Amayanda ya Bufumu. Baeluda balekabila ukwimika ica kumwenako cisuma na muli fyo ukuba na maka ya kulanda nga Paulo uwatile: “Mube abampashanya, ifyo na ine mpashanya Kristu.” (1 Kor. 11:1) Paulo aebele bambi ukumupashanya pa mulandu wa kuti alishibe ifyo aleimika ica kumwenako cisuma.

¹⁵ Ukucingililwa kwa Fipe: Cinshi cintu ifilonganino filingile ukucita pa lwa kucingililwa kwa fipe ne fisolobelo ifisungilwa pa cifulo mu nshita ya bukuule? Cilemoneka kwati mu ncende shimo kuti cakabilwa ukubikako aba kulonda ukupulinkana iciputulwa ca nshita ica bukuule. Kuti caba bwino, kanshi, kuli baeluda ukutantika aba kulonda pa kuti takuli ifileluba pa mulandu wa bapuupu. Ilyo Iŋanda ya Bufumu iya ku Emmasdale, mu Lusaka yalekuulwa, ifintu fimo fyalibilwe lintu kushali nangu umo pa cifulo ca bukuule.

¹⁶ Bakabomba ba Kuitemenwa Abafulilako Balekabilwa: Kuliko ukukabila kukalamba ukwa bakabomba ba kuitemenwa ukwakanamo mu bukuule bwa Mayanda ya Bufumu. Ukuteyanya kwa kwa Yehova kuletwalilila ukutanunuka. Cili ica cine ukukuma ku butumikishi bwesu ukuti “ukulobolola kwena kukalamba, lelo ababomfi nabacepa.” (Mat. 9:37, 38) Ifya kufumamo fya mulimo wa kupanga abasambi fyalilenga ifilonganino fyafulilako ukupangwa, kabili ici mu kukonkapo, calenga ukukabila kwa Mayanda ya Bufumu ayalundwako ukwingilishiwako. Ilintu bamunyina banono bali no kupayanya ubwangalishi, ifwe bonse kuti twaipeela pamo ngo lubali lwa bakabomba ba ncito shalekanalekana lintu icilonganino cesu nelyo ica mupepi cilekuula. Tatulefwaya imimonekele ukwimako umo bamunyina banono abalamuka babomfiwa mu mulimo wa bukuule ku cipimo ca kuti balekelesha indupwa shabo, umulimo wa mwi bala, no kusangwa ku kulongana. Ukuli bakabomba ba kuitemenwa abengi, umulimo ulanguka, kabili bakabomba kuti batantikwa pa kuti bonse bayakanamo ukwabula uuli onse uwa kufinininwa. Pa mbali ya ico, cili ni pa kati ka bakabomba ba musango yo aba kuitemenwa e po bamo bakanshiwa pa kuti bengapayanya umulimo wabamo kulamuka no kubelesha mu makuule ya ku ntanshi.

¹⁷ Nga ca kuti imibele tailetusuminisha ukuti tuitemenwe ukubombako, nalyo line kuliko inshila na imbi umo twingakaninamo mu bukuule bwa Mayanda ya Bufumu. Iyi nshila ni mu kutungilila umulimo lwa mu fya ndalama. Nga ca kuti twacite co, tukalacindika Yehova ku fyuma fyesu. (Amapi. 3:9) Amayanda ya Bufumu ayalinga, ayamoneka bwino yakacitilo bunte bushaiwamina. Bamo kuti pambi baseshiwa no kusosa abati: “Tuleya na imwe, pantu natuumfwo kuti muli na Lesa,” icili no kuleto bukata kuli Yehova.—Seka. 8:23.

[Icikope pe bula 4, 5]

Ing’anda ya Bufumu iya ku Emmasdale yaya ilepwa

[Icikope pe bula 4]

Ukutantika ifipuma mu ng’anda ya Bufumu iya ku Emmasdale

[Icikope pe bula 5]

Ing’anda ya Bufumu iya ku Chilenje yaya ilepwa

[Icikope pe bula 5]

Dipartment wa Makuule ya Mayanda ya Bufumu uwa Sosaite aleafwilisha ukukuula Amayanda ya Bufumu ayapya

[Icikope pe bula 5]

Ing’anda ya Bufumu iya ku Chilenje yalikwata ulupango lwa cibumba ulusuma ulwa kucingilila

[Icikope pe bula 5]

Ing’anda ya Bufumu iya ku Emmasdale.

Ifitabo na bamagazini kuti fyashitwa ukwabula ukupumfyanya abalelongana