Shimikileni Ubufumu

¹ Pa AbaHebere 10:23, twacincishiwa ‘ukwikatisha ukulumbula kwa kucetekela kwesu.’ Kabili cintu twacetekelamo Bufumu bwa kwa Lesa. Yesu mu kulungatika akambishe ukuti imbila nsuma iya Bufumu ifwile ukushimikilwa ku nko shonse. (Marko 13:10) Tulekabila ukulaibukisha ici lintu tuli mu butumikishi.

² Lintu twakumana na bantu, twesha ukutendeka ukulanshanya na bo pa lwa cintu cimo icilebaletela ubuseko nelyo icilebakuma. Ilingi line tulanda pa fintu ifyo beshibe bwino, pamo nga imisoka mu bwina mupalamano, amafya abacaice balekumanya, amasakamika ya mikalile, nelyo intulubundi sha mu calo. Apantu imintontonkanya ya bantu abengi yalilemenenwa ku “masakamika ya bwikashi buno,” lintu twalangisha ukuti tuli abayangwako kabili abalangulukila, ilingi line abantu bali no kufumya ifili ku mukoshi wabo. (Luka 21:34) Ici kuti caisula inshila ya kuti tulondolole ico twacetekelamo.

³ Nangu cibe fyo, nga ca kuti tatucenjele, ukulanshanya kuti kwatontomesha pa fintu fimbi fimbi fye ica kuti twafilwa no kupwishishisha imifwaile ya kutandala kwesu iili kushimikila pa lwa bukombe bwa Bufumu. Nangu cingati tulalanda ku bantu pa lwa mibele yabipa iibombomanika nga nshi, ubuyo bwesu bwaba kukomaila sana pa Bufumu, ubo mu kupelako buli no kupwisha amafya yonse aya mutundu wa muntu. Mu cine cine twalikwata isubilo lishaiwamina ilyo abantu balekabila nga nshi ukumfwa. E co ilintu pa kubalilapo kuti twalanshanya ulubali lumo ulwa shino “nshita ishayafya,” mu kwangufyanya tufwile ukutontomesha pa bukombe bwesu ubukalamba, “imbila nsuma ya muyayaya.” Muli iyi nshila tuli no kufishapo bukapyunga bwesu.—2 Tim. 3:1; 4:5; Ukus. 14:6.