Mulandu Nshi uwa Kupeelela Yehova?

MUKAMFWILWA aaliineme alekumbilila utukuni uku ninshi akasuba nakalotokela pe tauni linono ilya bena Sidone ilya Sarefati. Aalefwaya ukukosha umulilo pa kuti engepikapo aka kulya ka kumyangula fye—nakalimo ica kulya ca kupelako cintu wene no mwana mwaume wakwe umunono baali no kulya. Aali nashomboka ukuti wene na kalume wakwe bengapula abomi mu cilala catantalila ne cipoowe, nomba casukile cabafisha na kuli kapeleko wa bulanda. Baalecula ne nsala.

Umwaume alimupaleme. Ishina lyakwe aali ni Eliya, kabili mukamfwilwa mu kwangufyanya alimwene ukuti uyu mwaume aali ni kasesema wa kwa Yehova. Cilemoneke fyo alyumfwile pa lwa uyu Lesa. Yehova alipuseneko kuli Baali, uo imipepele yakwe iyakaluka, iyapaasuka yayanene mu calo cakwe ica Sidone. E co lintu Eliya amulombele amenshi ya kunwa, alifwaishe ukumwaafwa. Nakalimo ayumfwile ukuti ukucite fyo kwali no kumunonkela ukusenamina kwa kwa Yehova. (Mateo 10:41, 42) Lelo lyene Eliya alombeelepo na cimbi—aka kulya. Umwanakashi alondolwele ukuti akwete fye ifya kulya ifya kulya fye umuku umo epela. Lelo, Eliya alikooseshe, ukumwebekesho kuti Yehova aali no kumupayanishisha ifya kulya mu cipesha amano mpaka na lintu icilala cali no kupwa. Cinshi cintu umwanakashi acitile? Baibolo itila: “Awe ailecita nge cebo ca kwa Eliya.” (1 Ishamfumu 17:10-15) Aya mashiwi yayanguka yalondolola umulimo ukalamba uwa citetekelo—icikalamba nga nshi, na kuba, ica kuti Yesu Kristu atashishe ulya mukamfwilwa ninshi palipita mupepi fye ne myaka ikana!—Luka 4:25, 26.

Nangu ni fyo, kuti pambi caba icayafya ukumfwikisha umulandu Yehova engalombela icakule fyo ku mwanakashi uwali no twacepe fyo. Ici cilacilapo kwafya ilyo twalanguluka ipepo pa nshita imo ilyapepelwe no muntu walumbuka nga nshi. Ukulonganika kwa Mfumu Davidi ica musangulo ico Solomone umwana wakwe aali no kubomfya mu kukuula itempele kwabalamwine bukapekape ubukalamba. Mu fipendo fya muno nshiku, ifya bupe ifyasangwilwe fyafikile ku mabilioni ya madola! Davidi, nangu ni fyo, atile mwi pepo kuli Yehova: “Lelo ni ne ani, kabili ni bani abantu bandi, ukuti twingaba na maka aya kupeela ku kuitemenwa ifya bupe nge fi? pantu fifuma kuli imwe fyonse, kabili ifyafuma mu kuboko kwenu e fyo tupeelako kuli imwe.” (1 Imilandu 29:14) Nga fintu Davidi asosele, icili conse caba ca kwa Yehova. E co ilyo lyonse tupeela ku kulundulula ukupepa kwasanguluka, tupeela fye Yehova icaba kale kale icakwe. (Ilumbo 50:10) Muli fyo, icipusho cilemako ica kuti, Mulandu nshi kanshi Yehova afwaila ukuti tulepeela ubupe?

Ulubali Lwakatama Ulwa Kupepa kwa Cine

Icasuko cayangukisha cili ca kuti ukufuma fye na ku kale Yehova alilenga ukupeela ukuba ulubali lwakatama ulwa kupepa kwasanguluka. Umwaume wa busumino Abele apeele ilambo ifya mu fitekwa fyakwe ifyawamisha kuli Yehova. Ifikolwe Noa, Abrahamu, Isaki, Yakobo, na Yobo bapeele ifya kuninika fyapalako.—Ukutendeka 4:4; 8:20; 12:7; 26:25; 31:54; Yobo 1:5.

Ifunde lya kwa Mose lyaimike icipoope kabili lyaleceeceeta fye no kupeela kwa misangulo kuli Yehova. Ku ca kumwenako, abena Israele bonse bakambishiwe ukupeele ca pe kumi, nelyo ukuleta ica pe kumi ica cibwesha ca mu mushili ne casandulwike mu fitekwa fyabo. (Impendwa 18:25-28) Imisangulo imbi tayaleceeceetwa sana. Ku ca kumwenako, umwina Israele umo umo aalefwaikwa ukupeela kuli Yehova ifya ntanshi fya fisabo ne fya ntanshi ifya mu mushili. (Ukufuma 22:29, 30; 23:19) Lelo, Ifunde lyashiliile ku muntu umo umo ukwimika ubwingi bwa fisabo fya ntanshi ifya kupeela, kulila fye nga alepeela ifyawamisha. Ifunde na kabili lyapayanishishe lambo lya ca kutootela ne lambo lya mulapo, ayali ya kuitemenwa umupwilapo. (Ubwina Lebi 7:15, 16) Yehova akoseleeshe abantu bakwe ukupeela ukulingana na fintu abapaalile. (Amalango 16:17) Nga fintu caali na ku bukuule bwe hema na pa numa ubukuule bwe tempele, umo umo apeele cintu umutima wakwe wamukuntile ukupeela. (Ukufuma 35:21; 1 Imilandu 29:9) Mu kushininkisha imisangulo ya musango yo iya kuitemenwa yali iya kutemuna nga nshi kuli Yehova!

Pe samba lye ‘funde lya kwa Kristu,’ ukupeela konse kwali no kuba kwa kuitemenwa. (Abena Galatia 6:2; 2 Abena Korinti 9:7) Ico tacalepilibulo kuti abakonshi ba kwa Kristu balilekele ukupeela nelyo ukuti balicefesheko kupeela. Icapusanako e cacitike! Ilyo Yesu na batumwa bakwe baleshimikila mu Israele, ibumba lya banakashi balebakonka no kulabapyungila ku fyo bakwete. (Luka 8:1-3) Umutumwa Paulo mu kupalako alepokelela ifya bupe ifyalemutungilila mu mulimo wakwe uwa bumishonari, na mu kukonkapo akoseleshe ifilonganino ukupeelako indalama kuli bambi ababulishe. (2 Abena Korinti 8:14; Abena Filipi 1:3-5) Ibumba litungulula ilya mu Yerusalemu lyasontele abaume bacetekelwa ukushininkisho kuti ubukumu bwasangwilwe bwalisalanganishiwe ku babulishe. (Imilimo 6:2-4) Cili icaumfwika, Abena Kristu ba mu kubangilila bacilangulwike ukuti lishuko ukutungilila ukupepa kwasanguluka mu nshila sha musango yo.

Nalyo line, kuti twatwishika umulandu wine wine uo Yehova afwaila ukuti ukupeela kube lubali lwa kupepa kwakwe. Langulukeni imilandu ine.

Umulandu Tupeelela

Ica ntanshi, Yehova alenga ukuti ukupeela kube lubali lwa kupepa kwa cine pa mulandu wa kuti ukucite fyo kulatucitilo busuma. Kulangilila ukuti tulatasha pa busuma bwa kwa Lesa. Ku ca kumwenako, nga ca kuti umwana munono ashitila umufyashi nelyo amupeela ica bupe, mulandu nshi umufyashi acelebukila pa menso ne cimwemwe? Bushe ico ca bupe cilakumanisha ukukabila kwakakala uko umufyashi ashingakumanishisha mu nshila imbi? Nakalimo iyo. Mu cifulo ca ico, umufyashi alabekwa pa kumona umwana alelundulula umupashi wa kutasha kabili uwa kupeela. Pa milandu yapalako e po Yehova atukoselesesha ukulapeela kabili alacankwa lintu twacite fyo. Ifyo e fyo tumulango kuti mu cituntulu tulatasha pa cikuuku cakwe icishapeleela na bukapekape bwakwe kuli ifwe. Wene e kapeela wa “ca kupeelwa conse icisuma ne ca bupe conse icafikapo” e co imilandu ya kumutashishapo yalifulisha. (Yakobo 1:17) Pali fyonse, Yehova apeele Umwana wakwe wine uwatemwikwa, ukumuleka ukufwa pa kuti twingekala kuli pe na pe. (Yohane 3:16) Bushe tukatala atucitapo cimo pa kufishapo kumutootela?

Ica cibili, nga twacipanga icibelesho ukulapeela, e lyo tusambilila ukupashanya Yehova no Mwana wakwe, Yesu Kristu, mu lubali lwacindamisha. Yehova taleka kupeela, lyonse aba fye ni kapekape. Nga fintu Baibolo isosa, apeela ifwe “umweo, no kupema, na fyonse.” (Imilimo 17:25) Kuti mu kulingisha twamutasha lyonse lintu twakulo mupu, pa kamokolwa konse aka ca kulya tuipakisha, ne nshita ya nsansa iili yonse iya mu bumi iya kwikusha. (Imilimo 14:17) Yesu, ukupala Wishi, alangishe umupashi wa kupeela. Aipeele ukwabulo kuishako. Bushe mwalishibe ukuti lintu Yesu alecite fipesha mano, aleipusulapo icintu cimo? Ukucila pa muku umo Amalembo yatwebo kuti lintu aposeshe abalwala, amaka ‘yalefuma muli wene.’ (Luka 6:19; 8:45, 46) Yesu aali kapekape nga nshi ica kuti apongolwele fye no mweo wakwe wine, ubumi bwakwe, ukufika fye na ku mfwa.—Esaya 53:12.

E co lintu twapeela, nampo nga ni nshita yesu, amaka yesu, nelyo ifikwatwa fyesu, tupashanya Yehova no kulenga umutima wakwe ukusamwa. (Amapinda 27:11; Abena Efese 5:1) Na kabili tukonka icipasho capwililika ica fyo imyendele ya bantunse ifwile ukuba ico Yesu Kristu atushiliile.—1 Petro 2:21.

Ica citatu, ukupeela kulekusha ukukabila kwa cine cine kabili ukwacindama. Ca cine ukuti, Yehova mu kwanguka fye kuti akumanisha ifikabilwa ku mabuseko ya Bufumu ukwabulo kuti twafwilisheko, nga fintu fye engalenga amabwe ukubilikisha mu cifulo ca kutubomfya ukuti tushimikile cebo. (Luka 19:40) Lelo alisalapo ukutucindamika na ya mashuko. E co lintu twapeela ubukumu bwesu ku kulundulula amabuseko ya Bufumu, tulekushiwa nga nshi pa kwishibe fyo tulebombo lubali lukalamba mu mulimo wacindamisha uulebombwa muli cino calo conse.—Mateo 24:14.

Caliilanga apabuuta ukuti indalama shilafwaikwa mu kupayanishishe fipooswa pa mulimo wa mu kusaalala kwa calo uwa Nte sha kwa Yehova. Mu kati ka mwaka wa mulimo uwa 1995, Sosaite yapoosele mupepi na madola amamilioni 60 pa kusakamana fye bapainiya baibela, bamishonari, na bakangalila benda mu mulimo wabo uo bapeelwa ukubomba mwi bala. Nangu cibe fyo, ifyo fipooswa mu kulinganyako fili fye finono ukufilinganya ku makuule ne mibombele ya pa misambo ne fifulo fya kupulintilamo ukushinguluke calo. Lelo, fyonse ifi fibombwapo ne misangulo ya kuitemenwa!

Abantu ba kwa Yehova mu cinkumbawile tabatontonkanyo kuti nga tabali bakankaala, kuti balekela fye bambi ukusende co cisendo. Imibele ya mutima iya musango yo kuti yatungulula ku kuipusula ulu lubali lwa kupepa kwesu. Ukulingana na cintu umutumwa Paulo alandile, Abena Kristu mu Makedonia balepita mu “bubusu . . . ubukalamba.” Lelo nalyo line, balombele ishuko ilya kuti bapeele. Kabili cintu bapeele, Paulo abele nte ukusoso kuti, ‘calicilile amaka yabo’!—2 Abena Korinti 8:1-4.

Ica bune, Yehova alilenga ukupeela ukuti kube lubali lwa kupepa kwa cine pa mulandu wa kuti ukupeela kuti kwatwaafwa ukuba aba nsansa. Yesu umwine atile: “Mwalibe nsansa shafulilako mu kupeela ukucila ishaba mu kupokelela.” (Imilimo 20:35, NW) E fyo Yehova atupangile. E mulandu na umbi uo pambi twingayumfwila ukuti te mulandu na cintu twingamupeela, tacingalingana no kutasha uko tuyumfwa pa lwa wene ukufuma ku mitima. Mu nsansa, nangu ni fyo, Yehova tenekela ifyacila pa cintu twingapeela. Kuti twacetekela ukuti alacankwa lintu mu kusekelela twapeela ukulingana na papelele amaka yesu!—2 Abena Korinti 8:12; 9:7.

Mulafuma Amapaalo mu Kulangisha Umupashi wa Kupeela

Ukubwelela ku ca kumwenako cibangilileko, elenganyeni nga cali ulya mukamfwilwa wa ku Sarefati apelulwile ukuti umuntu umbi aali no kutangata Eliya ku ca kulya. We paalo lintu aali no kupanya!

Takuli kutwishika ukuli konse ukwa kuti Yehova apaala abo abalanga umupashi wa kupeela. (Amapinda 11:25) Mukamfwilwa wa ku Sarefati takabile ukucula pa kulekako cintu atontonkenye nge ca kulya cakwe ica kupelako. Yehova amulambwile ne cipesha amano. Nga fintu Eliya alaile, impakwilo sha bunga na mulongwe wa mafuta tafyapwililile ukufikila icilala caishilepita. Lelo apokelele ipaalo ilyacilanapo bukulu. Lintu umwana wakwe umwaume alwele no kufwa, Eliya, umuntu wa kwa Lesa wa cine, alimubweseeshe kuli wene. Fintu ico cifwile camukuulilile lwa ku mupashi!—1 Ishamfumu 17:16-24.

Ilelo tatusubila ukupalwa mu kuba ne fipesha amano. (1 Abena Korinti 13:8) Lelo Yehova alatwebekesha ukuti akekasha abo abamubombela no mweo onse. (Mateo 6:33) E co kuti twapala ulya mukamfwilwa wa ku Sarefati muli yo nshila, ukupeela mu kufusha, ukucetekelo kuti Yehova akatusakamana. Mu nshila imo ine, kuti twaipakisha ifilambu fya ku mupashi ifikalamba. Nga ukupeela kwesu kwaba kwa lyonse, ukucila ukuba ukwa kucilaukila, ukwa kukuntwa fye pa kashita kamo, kukatwaafwa ukusungilila ilinso lyesu ilituntulu kabili ilyatonta pa mabuseko ya Bufumu, nga fintu Yesu atashishe. (Luka 11:34; linganyeniko 1 Abena Korinti 16:1, 2.) Uko kupeela na kabili kukatwaafwa ukuyumfwa abapalamina kuli Yehova na Yesu nga fwe balebombela pamo na bo. (1 Abena Korinti 3:9) Kabili kukatwala pa ntanshi umupashi wa kupeela muli bukapekape, uyo kale kale wishibisha bakapepa ba kwa Yehova mu kusaalala kwa calo.

[Akabokoshi pe bula 31]

INSHILA ISHO BAMO BASALAPO UKUPEELELAMO

IMISANGULO KU MULIMO WA MU KUSAALALA KWA CALO

Abengi balabika pa mbali atemwa ukutantika icipimo ico babika mu tubokoshi twa misangulo utwalembwapo ati: “Imisangulo ya Mulimo wa mu Kusaalala kwa Calo uwa Sosaite—Mateo 24:14.” Cila mweshi ifilonganino fituma ishi ndalama napamo ku maofesi yakalamba aya calo conse mu Brooklyn, New York, nelyo kwi ofesi lya musambo ilyabela mupepi.

Imisangulo ya kuitemenwa iya ndalama kuti yatumwa mu kulungatika ku Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, nelyo kwi ofesi lya Sosaite ilibombele calo cenu. Ifibekobeko nelyo ifikwatwa fimbi na fyo fine kuti fyasangwilwako. Kalata umwipi uwa kulondolola ukuti ica musango yo cili bupe bwa mu kulungatika alingile ukwendela pamo ne yi misangulo.

UKUTANTIKA KWA MUSANGULO WA CIPANGANO

Indalama kuti shapeelwa ku Watch Tower Society ukusungwa mu kuseekeshiwa ukufikila imfwa ya ulepeela, mu kuba no kupayanya kwa kuti nga kwabako ukukabila kwa pa lwakwe, shikabweshiwa ku wapeele. Ku fyebo fyalundwako, twapaapaata lembeleni ku Treasurer’s Office, Watch Tower Bible and Tract Society of Pennsylvania, Box 33459, Lusaka 10101, nelyo kwi ofesi lya Sosaite ilibombele calo cenu.

UKUPEELA KWAPEKANISHIWILWA LIBELA

Mu kusansha pa kupeele ndalama ukwa kulungatika no musangulo wa cipangano uwa ndalama, kwalibako inshila na shimbi isha kupeelelamo ku busuma bwa mulimo wa Bufumu mu kusaalala kwa calo. Ishi nshila shisanshamo:

Inshuwalansi: Watch Tower Society kuti yalumbulwa nga kapokelela wa ndalama sha mibombele yatantikwa iya inshuwalansi iya bumi nelyo mu mapange ya kuleka incito nelyo penshoni. Sosaite ilingile ukwishibishiwa ulwa mitantikile iili yonse iya musango yo.

Amaakaunti ya ku Banki: Amaakaunti ya ku banki, amasetifiketi ya ndalama shili ku banki, nelyo amaakaunti ya muntu umo umo aya kuleke ncito kuti pambi yabikwa mu kuseekeshiwa nelyo ukulipilwa pa mfwa ku Watch Tower Society, mu kumfwana ne fifwaikwa fye banki lya cikaya. Sosaite ilingile ukwishibishiwa ulwa mitantikile iili yonse iya musango yo.

Ama Stock na ma Bond: Ama stock na ma bond kuti pambi fyasangulwa ku Watch Tower Society atemwa ngo bupe bwa mu kulungatika nelyo pe samba lya kusuminishanya uko indalama sha malipilo shatwalilila ukulipilwa ku ulepeela.

Icikwatwa ca Mpanga ne Fikuulwa: Icikwatwa ca mpanga ne fikuulwa ifingashitishiwa kuti pambi fyasangulwa ku Watch Tower Society atemwa ukupitila mu kupeela ubupe bwa mu kulungatika nelyo pa kusungilila impanga ku ulepeela, uyo uwingatwalilila ukwikala mulya mu kati ka nshita ya bumi bwakwe. Umo alingile ukwipusha Sosaite pa ntanshi talalembesha ifipepala fya nsambu sha mwi funde isha kupeelelapo icikwatwa ca mpanga icili conse ku Sosaite.

Ifya Cishale no Kuseekesha: Ifipe nelyo indalama kuti fyashiilwa ku Watch Tower Society mu nshila ya cishale iyacitwa mwi funde, nelyo Sosaite kuti yalumbulwa nga kapokelela wa kusuminishanya ku kuseekesha. Ukuseekesha ukunonsha ukuteyanya kwa mipepele kuti pambi kwapayanya ubusuma bumo ubwa misonko. Kope wa kulemba ifya cishale nelyo ukuseekesha alingile ukutumwa ku Sosaite.

Bonse abali abasekelela mu kuli konse ukwa uku kupeela kwapekanishiwilwa libela balingile ukulembela kwi ofesi lya Sosaite ilibombele calo cenu. Sosaite ilingile ukupokelelako kope wa fipepala fyalinga ifikumine kuli yonse iya muli iyi mitantikile.