Ukuwa kwa Babiloni Kwasabankanishiwa mu Japan

“NAWA, nawa, [Babiloni, NW] mukalamba, uwanwensesheko abena fyalo fyonse umwangashi wa cipyu ca bulalelale bwakwe.” Uko kubilisha kwa bumalaika ukwa kukumbamo kwalyumfwikilwe pa muku wa kubalilapo ku mutumwa Yohane ku numa mu mwanda wa myaka uwa kubalilapo uwa Nshita yesu Iyaishibikwa. Mu kati ka nshita yesu, nangu cibe fyo, “mu bushiku bwa kwa Shikulu,” calibilishiwa ne Nte sha Bwina Kristu isha kwa Yehova mu matwi ya mutundu wa muntu onse—Ukusokolola 1:10; 14:8.

Babiloni Mukalamba aba micitile ya mu kusalala kwa calo iya butotelo bwa bufi, mu intu Kristendomu abo wacilishapo ukubo wa mulandu. Ukupulinkane “nshita ya ku mpela,” amapingushi ya kwa Yehova kuli wene mu kukosa yalisabankanishiwa ne Nte sha kwa Yehova ukushinguluke calo. (Daniele 12:4) Ku ca kumwenako, Ulupungu lwa kwa Kalinda ulwafumine ulwa April na May umwaka wapwile lwasendele ifipande fya maka ukusansalika ukupeelwo mulandu ukwa butotelo bwa bufi no bonaushi bwakwe ubuleisa. Ukucila pa mamilioni 50 aya ayo amakope aya shafumine yalyananishiwe mu kusalala kwa calo—ukubilisha kwa maka ukwe shamo lya kwa Babiloni Mukalamba!

Japan Yapambana

Ica kumwenako ica kucincimuka kwa Nte sha kwa Yehova kuli sho shafumine ishaibela calimwenwe mu Japan, icamba ca cakaniko ca buBuddha bwa ciShinto ica Babiloni Mukalamba. Mu Japan ubwafumine Ubutumikishi Bwesu Ubwa Bufumu ubwa December 1988 bwaishibishe filonganino ulwa kampeini waibela uwa mulimo wa mwi bala uwapekanishiwilwe imyeshi ya April na May 1989. Ubwite ku kwafwilisha imibombele ya uyu magazini waibela bwalifumine mu kukonkana mu bwafumine Ubutumikishi Bwesu Ubwa Bufumu, pamo pene na mu makalata ku filonganino na ku mabumba ya baeluda.

Ukwankulako kwali ukwapulamo. Mu kuba no kwaafwa kwa kwa Yehova, mu kati ka iyo myeshi ibili iya mwaka wapwile, Japan yapokelele ubunte ubushabalile abucitika kale lyonse.

Umulimo wa Bupainiya bwa Kwafwilisha

Ukubilisha kwa mu December 1988 kwasanshishemo aya mashiwi ya kuti: “Twakukoselesha ukukwato buyo ubwa kuipakisha bupainiya bwa kwafwilisha mu kati ka April na May, ukucilisha April.” Ili tontonkanyo lyalibwekeshiwepo mu Ubutumikishi Bwesu Ubwa Bufumu ubwa February 1989 ubwafumine, ubwacincishe bamunyina ‘ukuteulula ukutantika kwabo ukwa cila bushiku pa kuti bengakwata abengi abatumikishi baipeelesha ukufika pantu bengapesha ukulembesha nga bapainiya ba kwafwilisha mu April.’

Inte balisakamene apakalamba uku kucinkulako. Ica kufumamo? Icipimo ca pa mulu icapulilemo mu mpendwa iya bapainiya ba kwafwilisha. Mu March 1989 impendwa iya bapainiya ba kwafwilisha kale kale yali naifika pa cipimo ca pa mulu icipya ica 24,115. Lelo mu April ico cipendo cali mupepi ne miku ibili ukufika kuli 41,055. Mu cine cine kubombesha kwa kupapusha!

Mu filonganino ifingi, bonse nelyo bakasabankanya abengi bayakene mu mbali shimo isha mulimo wa nshita yonse mu kati ka myeshi ibili iya mulimo waibela. Ici ilingi line casendele ukupekanya ukwingi. Namayanda umo atwishike ukuti akakanako, apantu ekala mupepi na mamita 900 pa mulu pa mpili uko kushaba mibombele ya fya kwendelamo. Nangu cibe fyo, mu cituntulu alefwaisha bupainiya bwa kwafwilisha. E co baeluda bapekenye ukumwaafwa mu fya kwendelamo, kabili wena, pamo na bakasabankanya bambi bonse mu cilonganino, baipakishe umweshi wa bupainiya.

Ubutungulushi busuma ubwa baeluda bwalilangishiwe mu Prefecture (Cifulo ca Balashi) mu Osaka, Umusumba wa Takatsuki, Icilonganino ca Otsuka icakwata bakasabankanya 77, umo baeluda na babomfi batumikila bali pa kati ka ba 73 abayakene mu musango umo uwa mulimo wa bupainiya. Abo bapainiya na kabili basanshishemo bakasabankanya bonse abacaice ababatishiwa abacili balesangwa ku sukulu. Umupashi wa bupainiya uwalangishiwe ne shi Nte shacaice walipalene no yo umoneka mu filonganino ifingi. Ku ca kumwenako, pa ba myaka yacile kumi ababatishiwe mu Cilonganino ca Heiwadai Prefecture mu Tokyo, 11 ni bapainiya ba nshita yonse, kabili 11 balibombeleko bupainiya bwa kwafwilisha mu April. Muli cilya cilonganino, ubwingi bonse ubwa bakasabankanya 93 balicitileko bupainiya mu mweshi ulya umo wine.

Ubushiku Bwaibela ubwa Mulimo

Ubwafumine Ubutumikishi Bwesu Ubwa Bufumu ubwa January ukulembwa kwa mu ciJapanese bwakoseleshe bamunyina mu kuba naya mashiwi ukuti: “Umulimo wa magazini walikoseleshiwa te pa Fibelushi fyalenga bubili na bune fye lelo Icibelushi conse ica mweshi. Ukupimpa bamunyina balelangisha kuletashiwa. Mu April umulimo wa magazini nautantikwa pa Cibelushi conse, lelo twapapata pangeni ukubombesha kwaibela ku kubika pa mbali April 8 ku bushiku bwa magazini pa kuti uuli onse engakana mu mulimo wa magazini pali bulya bushiku. Pa kuti twingabilisha ukusoka kuli bonse abali no kumfwa, cili cakabilwa ku kwananya ishi mpapulo sha mu nshita.”—Esaya 61:2; Ukusokolola 18:4, 5.

Mu February Ubutumikishi Bwesu Ubwa Bufumu ukulembwa kwa mu ciJapanese na kabili bwakomaile pali uyu mulimo wacindama. Bwasosele ukuti: “Pa Cibelushi ca bubili, April 8, lekeni uuli onse uwa Nte sha kwa Yehova mu Japan—nomba abali mu mpendwa 130,000—bakane mu mulimo wa magazini.” Baeluda bakoseleshiwe ukutantika imisango yapusanapusana iya mibombele ya magazini ukufimba akasuba konse pa kuti abengi nga fintu cingacitikako bengabuulamo ulubali. Kutasha ku kwankulako kwashininkishiwa ukwa baeluda no kwafwilisha kwa mutima onse ukwa bakasabankanya bonse, akasuba kali akatunguluka apakalamba. Kuti twasosa ukuti pali ubo bushiku ukwingilishiwako kwalifikilwepo mu Japan mu kubilisha kwa mapingushi ya kwa Yehova pali Babiloni Mukalamba.

Ku ca kumwenako, mu Cilonganino ca Ushioda mu Musumba wa Yokohama, baeluda batantike umulimo uwali no kutwalilila pa maawala 13, ukufuma 7:00 a.m ukufika ku 8:00 p.m. Icasanshiwepo cali fiputulwa fya nshita fibili ifya bunte bwa pa musebo, pamo pene ne nshita sha kutandalila abantu abo ku numa bashali pa ŋanda no bunte bwa lyonse ubwa ku ŋanda ne ŋanda. Abengi bakasabankanya bali na maka ya kwakanamo muli shimo imbali isha mulimo ishatantikwe, kabili impendwa ikalamba bayakene mupepi na mu lubali ululi lonse ulwapekanishiwe.

Umulimo watwalilila na o wine walitantikwe mu Cilonganino ca Jonan, mu Musumba wa Fukuoka. Kulya, ukutantika kwalicitilwe ukufimba amaawala ukufuma 8:00 a.m ukufika ku 9:00 p.m, mu kuba fye no kutusha kunono pa kati ka kasuba. Icasanshiwepo cali bunte bwa ku ŋanda ne ŋanda, ukutandalila ififulo fya bukwebo ne fya kushitako, ukutandalila apo uushili onse ashabala akumanishiwa pa kutandala kwafumineko. Inte shimo muli cilya cilonganino bacitile lipoti ukufika ku maawala cinekonsekonse iya mibombele ya kushimikila iya kasuba!

Ukwankulako kwa mutima onse ukwa bamunyina kwalimwenwe mu Prefecture mu Wakayama, uko bakasabankanya bonse 55 mu Cilonganino ca Kainan bayakene mu mibombele ya bushiku bwaibela. Nkashi umo kulya, painiya wa nshita yonse, apaapile pa April 7. Bushe co calimukenye ukucitilo bunte pa April 8? Iyo. Atambike bamagazini mulya mwine mu cipatala! Ukulangilila umupashi umo wine, munyina ukufuma ku Prefecture ku Osaka apatikishiwe ku kusakamana imilandu pa cifulo cakwe ica mibombele ica lyonse pa April 8. Ni shani fintu aali na maka ya kwakana mu mibombele yaibela? Apangile incende ya ncito yakwe ukuba icifulo ca kubombelamo cakwe kabili apokele ukulembesha kusano.

Nkashi mu Prefecture mu Saitama afulwike ukwakanamo mu mibombele yaibela iya kasuba, lelo ali no kwenda amakilomita 640 ukuya ku Musumba wa Asahikawa no mulume wakwe uushasumina. Tanenwike, nangu ni fyo. Mu Asahikawa, aile na bana bakwe abanono babili ku citesheni ca musebo wa ku nyanji, kabili kulya, pa nse ya citesheni, asangile cintu asubile: ibumba lya bakasabankanya ukufuma pa cilonganino ca pa mwabo balepekanya ukuya mu mulimo wa mwi bala. Aali na maka ya kwakana mu mibombele ya kasuba.

Ubunte bwa pa Musebo

Ubutumikishi Bwesu Ubwa Bufumu ubwa mu Japan ukucilisha bwakoseleshe baeluda ukutantika ubunte bwa pa musebo ubwa pa April 8, kabili ici cabele ulubali lukalamba ulwa ako kasuba kaibela. Nga fintu cacitike, kwaliko imiloke icalo conse, lelo ico tacabweseshe pa numa ubukose bwa bamunyina. Abengi balangishe umupashi umo wine ngo yo wamwenwe muli bankashi batatu aba cikalamba mu Cilonganino ca Minamata, Prefecture mu Kumamoto. Te mulandu ne mishinku yabo—75, 80, na 85—bashipikishe umwela wabipa kabili bali ca kukoselesha kusuma ku cilonganino conse; kabili bacebwishe ukusakamana kwa bapita nshila abengi.

Ilintu balecitilo bunte bwa pa musebo, nkashi umo mu Musumba wa Kashiwa pa Cilonganino ca West aipwishe umwaume ukuti: “Bushe walibala aumfwapo pa lwa Babiloni Mukalamba?” Lintu atambike bamagazini abafumine aba April, umwaume asosele ukuti: “Nshili uwasekelela” no kufumapo. Nangu cibe fyo, lintu afikile apa kucilukile nyanji kabili ukwiminina, aleisosha, “Cinshi caba Babiloni Mukalamba?” Munyina uwalecita ubunte bwa pa musebo mupepi alimumfwile kabili aendele mu musebo pamo na o, ukulondolola cintu Babiloni Mukalamba aba. Umwaume alipokele bamagazini.

Ifilonganino fimo tafyabalile aficita ubunte bwa pa musebo. Lelo ukutula pa April 8, balicipanga ulubali lwa mibombele yabo iya lyonse. Kabili te ca kupapa! Ubunte bwa pa musebo ni nshila yacilishapo ukutunguluka iya kufwailamo abantu abo mu mano yambi tushisanga. Nkashi umbi mu Musumba wa Naha, Okinawa, aibimbile mu bunte bwa pa musebo ku nse ya cikuulwa ce ofesi cintu Nte sha kwa Yehova shishasuminishiwa ukwingilamo ku mifwaile ya bunte. Ashalike bamagazini 12 pe awala limo pa kutununuka abo abaleingila no kufuma pa cikuulwa.

Nkashi mu Musumba wa Muroran, Hokkaido, aibimbile mu bunte bwa pa musebo ku nse ya matuuka yakalamba pa kati ka musumba. Aebele umwaume uwapokele bamagazini ukuti: “Nga ca kuti ulefwaya ukusambilile ifyafulilako, kuti twakutandalila ku mobe.” Abapeele adresi yakwe, inambala ya lamya, mapu wa ku ŋanda yakwe, ne nshita shintu engaba pa mwakwe! Umulungu wakonkelepo, wena na munyina balimutandalile no kusango kuti aleikala mu muputule uyo ushasuminishiwe ku kutandala kwa butumikishi ukwa lyonse ukwa Nte sha kwa Yehova. Umulumendo aali nashininwa ku kubelenga kwa pa lwakwe ukwa Baibolo ukuti Kristendomu takwata kusenamina kwa kwa Lesa. Alesapika ubuKristu bwa cine kabili ali uwa nsansa pa kutendeka isambililo lya lyonse ilya pa ŋanda ilya Baibolo.

Kasabankanya mu Musumba wa Kawasaki ayakene mu bunte bwa pa musebo pa cungulo ca April 8. Pa mpela ya nshita apeelwe, alandile ku muntu wakushalikishako, umukashana uwalandile ukuti kale alesambilila Baibolo ne Nte sha kwa Yehova. Lelo akumenye ukukaanya ukufuma ku bafyashi bakwe kabili pa numa aingile pa universiti kabili akukile mu ŋanda ya minkulinkuli. E co alilekele isambililo lyakwe. Nangu cibe fyo, ca kutasha ku bunte bwa pa musebo, mu nsansa alitendeke isambililo lyakwe ilya Baibolo cipya cipya kabili kale kale alesangwa ku kulongana.

Ukwananya kwa Magazini

Nge ca kufumamo ca ba kwafwilisha abengi aba mibombele yaibela, ukushalika bamagazini—ukucilisha abo basendele ubukombe bwa bupingushi ukulwisha Babiloni Mukalamba—kwali ukwa kucincimusha. Kasabankanya mu cilonganino mu Prefecture mu Osaka ashalike bamagazini 205 mu April. Mu Musumba wa Kagoshima, Icilonganino ca East, bakasabankanya 14 bashalike ukucila pali bamagazini umwanda umo umo, ilintu ibumba lyapaatuka ilya bakasabankanya 12 mwi Tauni lya Ogawa, Prefecture mu Ibaraki, baanenye ubwingi bonse pamo ubwa bamagazini 1,388 mu kati ka April.

Mu cituntulu, mu Japan mu cinkumbawile, 3,293,266 bamagazini balishalikwe mu April wa mwaka wapwile—92 peresenti ukucila April wa 1988! Fintu ubukombe bwa Bupingushi bwa kwa Yehova bwaumfwikilwe mu kukosa ukulwisha Babiloni Mukalamba!

Amaka Ukucila Pa Ya Lyonse

Mu cishinka, nga mu mbali shimbi shonse isha calo, Inte sha kwa Yehova mu Japan bali abashininkisha kabili abapimpa mu mupepo wa 1989. Icakukumanya cabo capeele ubushininkisho bwa kuti Yehova alipaalile ukupimpa kwabo kabili ayafwilishe amaka yabo ku kusabankanya amapingushi yakwe ukulwisha ukupepa kwa bufi. Kuli bamo, tacali icayanguka ukwakanamo; nalyo line, balefwaisha, kabili Yehova apaalile ukupimpa kwabo. Abengi bekala mu cifulo icibombelwamo lyonse, lelo bonse balangile umupashi umo wine uwa kwangufyanya no wa maka nga bamunyinabo mu fifulo fimbi. Mu milandu iili yonse, amashiwi aya kwa Esaya yashininkishe ukuba aya cine ukuti: “Apeela amaka ku wapomponteka, no kufusho kucincila ku ushakosoboka.”—Esaya 40:29.

Te ca kupapa icakukumanya cabo cabebukisheko ulwa mashiwi ya mutumwa Paulo ukuti: “Tuli ne cuma ici mu fipe fye bumba, ukuti [amaka ukucila pa ya lyonse yabe ya, NW] kwa Lesa, kabili te kuntu kwafuma kuli ifwe.” (2 abena Korinti 4:7) Ee, ilintu umuntu abika ubutumikishi bwa Bwina Kristu, “icuma ici” intanshi mu bumi bwakwe, akumanya “amaka ukucila pa ya lyonse” ayapeelwa na Lesa. Shi Yehova natwalilile ukubomfya ababomfi bakwe mu Japan na mu mpanga shimbi ku kupeela ubunte bwakumanina pa ntanshi impela tailaisa.—Mateo 24:14.

Uno mwaka, ishikafuma isha April na May isha Ulupungu lwa kwa Kalinda shikalanga ukukonkana kwa fipande pa nkupo “Ni Ani Akatungulula Umutundu wa Muntu ku Mutende?” “Umutende wa Calo—Cinshi mu Cituntulu Ukapilibula?” “Amamilioni Abali Abafwa Nomba Bakaba no Mweo na Kabili,” na “Armagedone—Lilali?” Mulandu nshi te kupekanishisha ukwakana ifi fyebo na bena mupalamano bobe? Bo washininkisho kuti abengi ukufika pantu wingapesha balengwo kwibukila ulwa mbila nsuma yawamisha intu Lesa abakila muli Baibolo ku kasuba kesu.