Mwipusa Imifwaile ya Buntungwa Bwapeelwa na Lesa
“Ukuli umupashi wa kwa [Yehova, “NW”], e kuli ubuntungwa.”—2 ABENA KORINTI 3:17.
1. Mulandu nshi Esaya 65:13, 14 abombela ku Nte sha kwa Yehova?
YEHOVA ni Lesa wa buntungwa. Kabili fintu bwaba lipaalo ubuntungwa bwapeelwa na Lesa! Pa mulandu wa kuti ababomfi bakwe abaipeela balikwata ubuntungwa bwa musango uyo, aya mashiwi ya kwa Shikulu Mulopwe Yehova yalabomba kuli bene: “Moneni, ababomfi bandi bakalya, na imwe mukaba ne nsala; moneni, ababomfi bandi bakanwa, na imwe mukaba ne cilaka; moneni, ababomfi bandi bakasamwa, na imwe mukaba ne nsoni; moneni, ababomfi bandi bakaanga ku kubuuta ku mutima, na imwe mukakuuta ku kukalipwa kwa mutima, no kuweleshe misowa ku kuputuko musana.”—Esaya 65:13, 14.
2. Mulandu nshi abantu ba kwa Yehova bakwatila ulubanda lwa ku mupashi?
2 Abantu ba kwa Lesa balaipakisha iyi mibele ya lubanda lwa ku mupashi pantu batungululwa no mupashi wakwe, nelyo amaka yabomba. Umutumwa Paulo asosele ukuti: “[Yehova, NW] e mupashi: kabili ukuli umupashi wa kwa Yehova, e kuli ubuntungwa.” (2 Abena Korinti 3:17) Mifwaile nshi iya buntungwa bwapeelwa na Lesa? Kabili cinshi cili icafwaikwa kuli ifwe pa kubomfya bwene mu kukumanina?
Ubuntungwa Lesa Akwata
3. Musango nshi uwa buntungwa Lesa akwata, kabili mulandu nshi?
3 Yehova eka e wakwata ubuntungwa bwapwililila. Takuli nangu cimo ica mu fibumbwa fyakwe icingapelesha ubuntungwa bwakwe pantu ni Lesa Wa maka yonse kabili Mulopwe wa Kubumbwa konse. Nga fintu umuntu wa busumino Yobo asosele, “ni ani engamulesha? Ni ani engatila kuli wene, Cinshi ulecita?” (Yobo 9:12) Mu kupalako, imfumu ya cina Babiloni Nebukadnesari apatikishiwe ukusumino kuti: “Takuli uwingalesho kuboko [kwa kwa Lesa], no kutila kuli wene, Cinshi ico ulecita?”—Daniele 4:35.
4. Ni shani fintu caba ukuti Yehova asungilila ubuntungwa bwakwe mu kati na nkati ka mipaka?
4 Nangu cibe fyo, ifishinte fyalungama ifya kwa Yehova fiine fisungilila bulya buntungwa bwapwililila mu kati na nkati ka mipaka. Ici calangililwe lintu Abrahamu alumbulwile ukwangwako pa lwa bekashi ba mu Sodomu no kwipusho kuti: “Bushe Kapingula wa pano isonde ponse takacite icalungama?” Ukwankulako kwa kwa Lesa kulangilila ukuti alishiba icishingamo ca kucita icalungama. Nga taonawile Sodomu nga ca kuti abekashi balungama abali bonse bashele mulya. (Ukutendeka 18:22-33) Lesa na kabili alasungilila ubuntungwa bwakwe mu kati na nkati ka mipaka pantu ukutemwa kwakwe na mano fimulenga ukukokola ukukalipa kabili alabelesha ukuilama.—Esaya 42:14.
Ukupelebela kwa Buntungwa bwa Buntunse
5. Fya kusangwilako nshi fimo ifipelesha ubuntungwa bwa buntunse?
5 Nangu cingati Yehova alikwata ubuntungwa bwapwililila, bonse bambi babomba mu kati na nkati ka mwa kupelela mwaimikwa ne cifyalilwa cabo, amaka, ne cintengulusha ca bwikalo, pamo pene ne fya kusangwilako pamo nge cipimo ca bumi icapelela ica ino nshita ica bantunse ba lubembu. Lesa abumbile umuntu mu kuba no buntungwa bwapwililika ku kubomba mu kati na nkati ka cintengulusha cintu Yehova amwimikile. Kwalibako imilandu yafulilako umulandu ubuntungwa bwa buntunse bwabo bwapelela, tabwaba ubwapwililila.
6. Ukulubulula kuli Lesa kwakwata kwampanako nshi ku buntungwa bwesu?
6 Uwa kubalilapo, ubuntungwa bwa buntunse bwalibo bwapelela pantu Lesa abumbile umuntu ku kubombele mifwaile Yakwe. Yehova ‘aliwaminwa ukupokelela ubukata no mucinshi na maka pantu alengele ifintu fyonse kabili pa mulandu wa kufwaya kwakwe fyabeleleko no kulengwa.’ (Ukusokolola 4:11) E co umuntu ali no kulubulula kuli Kabumba wakwe, uwapanga mu kulungama amafunde yantu abantunse bali no kutungulwilwako. Muli Israele wa pa kale pe samba lye Funde lya kwa Mose, Lesa afwaile ukuti abantu umo umo bepaiwe nga ca kuti babomfeshe bubi bubi ishina lyakwe nelyo nga batobele funde lye Sabata. (Ukufuma 20:7; 31:14, 15; Ubwina Lebi 24:13-16; Impendwa 15:32-36) Nangu cingati ifwe pamo nga Bena Kristu tatwaba pe samba lye Funde, ubuntungwa bwesu bwalibo bwapelela pantu tuli no kulubulula kuli Yehova, uuli Kapingula wesu, Kapeela wa fipope, kabili Imfumu.—Esaya 33:22; Abena Roma 14:12.
7, 8. (a) Ni shani fintu amafunde ya ku mubili yapelesha ubuntungwa bwa buntunse? (b) Mafunde nshi yambi aya kwa Lesa yapelesha ubuntungwa bwesu nga bantunse?
7 Uwa cibili, ubuntungwa bwa buntunse bwalibo bwapelela pa mulandu wa mafunde ya ku mubili aya kwa Lesa. Ku ca kumwenako, pa mulandu we funde lya maka yatinta, umuntu te kuti aciluke ukufuma pa cikuulwa ca ntunti ishitali ukwabula ukuicena nelyo ukuipaya umwine. Mu kumfwika, amafunde ya ku mubili aya kwa Lesa yalapelesha ubuntungwa bwa muntu ku kucita ifintu fimo fimo.
8 Uwa citatu, ubuntungwa bwa buntunse bwalibo bwapelela pa mulandu wa mafunde ya mibele isuma aya kwa Lesa. Mu kupalako nga nshi, walimona ukufikilishiwa kwa cintu Paulo alembele pa Abena Galatia 6:7, 8: “Mwilufiwa; Lesa tasentekwa; pantu ico umuntu abyala, e co akalobolola. Uubyala ku mubili wakwe wine, ku mubili akalobololako ukubola; lelo uubyala ku mupashi, ku mupashi wine akalobololako umweo wa muyayaya.” Icishingabikilwapo ifikansa, amafunde ya mibele isuma aya kwa Yehova Lesa na yo yene yalapelesha ubuntungwa bwesu, lelo ukuyomfwila kulakabilwa pa kuti tunonke ubumi.
9. Ni shani fintu ukuba kwesu ulubali lwa sosaite ya buntunse kupelesha ubuntungwa bwesu?
9 Uwa cine, ubuntungwa bwa muntu bwalibo bwapelela pa mulandu wa kuti alibo lubali lwa sosaite ya buntunse. E ico, alingile ukukwata ubuntungwa ukufika fye ku cipimo ca kuti tabucilime mu lufyengo ubo ubwa bambi. Abena Kristu bafwile ukunakila ku “mabulashi yacilamo” aya kamfulumende, ukuyomfwila cikulu fye tayapindile ukuti tutobe amafunde ya kwa Lesa. (Abena Roma 13:1, NW; Imilimo 5:29) Ku ca kumwenako, tulingile ukumfwila amafunde ukulosha ku kulipila imisonko, umusenselo twenseshapo motoka, na fimbipo. Icishinka ca kuti tufwile ukumfwila amafunde ya musango uyo aya kwa “Kaisare” cilanga mu kulundako kuti ubuntungwa bwesu ubwapeelwa na Lesa te buntu bwapwililila.—Marko 12:17; Abena Roma 13:7.
Mulandu Nshi Ubuntungwa Bwaampanako fye?
10, 11. Mulandu nshi Yehova apeelele abantunse ubuntungwa bwaampanako fye?
10 Mulandu nshi Lesa apeelele abantunse ubuntungwa bwaampanako fye? Umulandu umo wali wa kuti pa kuti Kabumba engakwata ifibumbwa fya mucetekanya pe sonde abali no kumuletela umucinshi ne lumbo ku mashiwi yabo ayawama ne myendele. Abantunse kuti bacite ci, ilintu ifinama te kuti ficite. Ifinama, ukutungululwa no mununsha, tafyaishiba kantu pa lwa myendele ya mibele isuma. Kuti wakansha imbwa ukukanabuula icili conse, lelo te kuti uisambilishe ukulubana kwa kwiba. Icinama mu kuba ne ncitilo sha ciko ishatantikilwa calimo, nga fintu cili, te kuti cipange ukupingulapo uko kulete lumbo no mucinshi kuli Lesa, ilintu umuntu kuti mu buntungwa asala ukubombela Kabumba wakwe ukufuma ku kutemwa no kutesekesha.
11 Lesa na kabili alapeela abantunse ubu buntungwa ku kumwenamo kwabo ne nsansa. Kuti babelesha ubuntungwa bwabo ubwaampanako pa kuba abakuletako imfundo kabili aba fya kwelenganya, aba kushukisha na ba kubombela pamo. Abantunse na kabili balikwata ubuntungwa bwa kusala mu milandu ya musango uyo pamo nge ncito ne cifulo ca bwikashi. Ilelo, ifya kusangwilako fya ndalama ne fya bupolitiki ilingi line filapelesha ubo buntungwa bwa kusala, lelo ici kuti pambi caba pa mulandu wa kufunuka kwa buntunse, te pa mulandu wa nshila Lesa abumbilemo umutundu wa muntu pa kutendeka.
12. Mulandu nshi icinabwingi ca mutundu wa muntu cabela mu busha?
12 Nangu cingati Yehova apeele abantunse ubuntungwa bukalamba, icinabwingi cikalamba ilelo baliba mu busha bwa kukalifya. Cinshi cacitike? Abaupana babili abantunse ba kubalilapo, Adamu na Efa, bapushile imifwaile ya buntungwa bwapeelwa na Lesa. Bacilile pa mipaka ya bulesa pa buntungwa bwabo kabili basonsombele imitekele yakwate nsambu iya kwa Lesa pali bene nga Shikulu Mulopwe, Yehova. (Ukutendeka 3:1-7; Yeremia 10:10; 50:31) Pa kukanaba abaikushiwa no kubomfya ubuntungwa bwabo ku kucindika Lesa, babubomfeshe mu kaso, ku kuipingwila icali icalungama ne cali icalubana, muli iyo nshila ukuilunda kuli Satana mu kupondokela kwakwe Yehova. Mu cifulo ca kukwata ubuntungwa bwakulilako, nangu cibe fyo, ababembu Adamu na Efa baali no kukwata ifibindo fyatapata no busha, ukucepelako kwa buntungwa bwabo, kabili mu kupelako imfwa. Ubufyashi bwabo bwapyene uku kulufya kwa buntungwa. “Pantu bonse nababembuka, kabili bapelebela ku bukata bwa kwa Lesa.” “Icilambu ca lubembu ni mfwa.”—Abena Roma 3:23; 5:12; 6:23.
13. Mulandu nshi Satana abela na maka ya kucita abantunse abasha?
13 Pa mulandu wa kupondoka mu Edene, Adamu no bufyashi bwakwe baishile na kabili mu busha kuli Satana Ciwa. Pantu, “pano isonde ponse palaala mu maka ya Mubifi”! (1 Yohane 5:19) Ni pa mulandu wa maka yakwe ayacilapo no lupikwe e co Satana abela na maka ya kulufya no kupanga abasha ba mutundu wa muntu onse abanunuka ukufuma kuli Lesa. Ukulundapo, abantu ba kaso balicito lukambo ku bantunse banabo ku kubabifya fye. (Lukala Milandu 8:9) E ico, umutundu wa muntu mu cinkumbawile uli nomba mu busha ku lubembu ne mfwa, kuli Satana ne fibanda fyakwe, na ku micitile ya calo iya bupolitiki, iya fya bunonshi, ne ya butotelo.
Ubuntungwa bwa Cine Bwalengwa Ukucitikako
14. Isubilo lya mutundu wa muntu ku buntungwa bwa cine lyaampana mu kupalamisha na cinshi?
14 Ukunonka ubuntungwa ukufuma ku lubembu, imfwa, na Ciwa ne calo cakwe caampana mu kupalamisha no mupampamina wa kwa Lesa ku kupwisha ifikansa ukulosha ku nsambu sha bumulopwe bwakwe ubwa mu kubumbwa konse. Pa mulandu wa kuti Satana aimishe ifi fikansa, Yehova alimusuminisha ukutwalilila mu kubako, pamo fye nga fintu Asuminishe Farao ukutwalilila pa nshita imo. Ici cili pa kuti Yehova engalangilila mu kukumanina amaka yakwe no kukwata ishina lyakwe ukubilishiwa mwi sonde lyonse. (Ukufuma 9:15, 16) Lesa akayebela umwine mu kwangufyanya nga Mulopwe wa mu Kubumbwa konse no kushisha ishina lyakwe ilya mushilo pa kufumyapo umusebanya waletwa pali lyene ukupitila mu kupondoka kwa kwa Satana, Adamu, na Efa. Muli ifyo, abo abatiina Yehova bakakakulwa ukufuma ku busha ku lubembu ne mfwa kabili bakengishiwa mu calo cipya ica buntungwa bwapeelwa na Lesa.—Abena Roma 8:19-23.
15. Lubali nshi Yesu abombele mu kubwesha ubuntungwa ku mutundu wa muntu?
15 Pa kubwesesha ubuntungwa ku mutundu wa buntunse, Lesa atumine Umwana wakwe kwi sonde ngo muntu. Ku kupeela ubumi bwakwe ubwa buntunse ubwapwililila mu kuitemenwa, Umwana wa kwa Lesa, Yesu Kristu, apayenye ilambo lya cilubula, icishinte ca kulubwilapo umutundu wa muntu. (Mateo 20:28) Na kabili abilishe ubukombe bwa buntungwa. Pa kutendeka kwa butumikishi bwakwe, abomfeshe ku mwine aya mashiwi: “Umupashi wa kwa Shikulu [Mulopwe, NW] Yehova waba pali ine, pa kuti Yehova ansubila ku kubile mbila nsuma ku balanda; antuma ku kukakililako abafunaike misana, ku kubilisha kuli bankole ukulubuka, na ku bakakwa ukwiswilwa.”—Esaya 61:1; Luka 4:16-21.
16. Ni ntampulo nshi abaYuda ba mu mwanda wa myaka wa kubalilapo babuulile pa kunonka ubuntungwa bwa cine?
16 Ni shani fintu abantu baali no kunonka bulya buntungwa? Yesu atile: “Nga imwe mwaikalilila mu cebo candi, muli basambi bandi cine cine; kabili mukeshibe cine, ne cine cikamulenga abantungwa.” Muli ifyo, abakonshi ba kwa Yesu baisa ku kuipakisha ubuntungwa bwa ku mupashi. (Yohane 8:31, 32, 36) Mu kulundapo, Yesu aebele kateka wa ciRoma Ponti Pilato ukuti: “Pali ici e co nafyalilwe, kabili pali ici e co naishiile pano isonde, pa kuti nkeseshimike cine ubunte. Onse uuli uwa bucine omfwe shiwi lyandi.” (Yohane 18:37) AbaYuda abapokelele icine icashimikilwe no kulangililwa na Yesu balilapile ku membu shabo, balungike inshila yabo iyalubana, baitambike abene kuli Yehova, kabili balibatishiwe nge fyacitile Yesu. (Mateo 3:13-17; Imilimo 3:19) Muli iyi nshila baishile ku kuipakisha ubuntungwa bwapeelwa na Lesa ubwaampanako fye.
17. Mulandu nshi Yehova apeelela ababomfi bakwe ubuntungwa?
17 Yehova alapeela ababomfi bakwe aba cishinka ubuntungwa maka maka ku kwebelwa kwa bumulopwe bwakwe bwine lelo na kabili ku cisansamushi cabo cine nelyo ukumwenamo. Alubwile abena Israele ukufuma mu busha bwa cina Egupti pa kuti bengamucindika pamo ngo bufumu bwa bashimapepo, inte shakwe. (Ukufuma 19:5, 6; Esaya 43:10-12) Mu kupalako, Yehova afumishe abantu bakwe muli bunkole bwa cina Babiloni maka maka ku kukuula cipya cipya itempele lyakwe no kubweseshamo ukupepa kwa cine. (Esra 1:2-4) Lintu abaulwilwe muli bunkole baisakamike fye abene ne fya maliila ya ku mubili, Yehova atumine bakasesema bakwe Hagai na Sekaria ku kubacinkulako ulwa kukakililwako kwabo ku cinso ca kwa Lesa. Ukukwata ubuntungwa bwabo ubwapeelwa na Lesa muli ifyo ukubikwa mu kulinga kwafuminemo ukupwishishiwa kwe tempele, ku bukata bwa kwa Lesa, na kabili mu kusansamuka no busuma ku bantu bakwe.
Ukukanapusa Imifwaile ya Buntungwa Bwapeelwa na Lesa
18. Mulandu nshi cingasoselwa ukuti ababomfi ba kwa Yehova aba mu kasuba ka lelo tabapusa imifwaile ya buntungwa bwabo ubwapeelwa na Lesa?
18 Ni shani pa lwa babomfi ba kwa Lesa aba mu kasuba ka lelo? Pamo ngo kuteyanya, tabapusa imifwaile ya buntungwa bwabo ubwapeelwa na Lesa. Muli ba 1870 batendeke ukulubuka ukufuma ku filubo fya cina Babiloni no kuipakisha ubuntungwa bwa Bwina Kristu ubwaingilishiwako. Ici cali mu kumfwana na Amapinda 4:18, ayasoso kuti: “Inshila ya balungami yaba ngo lubuuto ulwabalika, ululeya no kubuuta kasuka akasuba kasaama.” Nalyo line, nga fintu abantu ba kwa Lesa aba pa kale batwelwe muli bunkole bwa cina Babiloni pa nshita imo, mu 1918 ababomfi ba kwa Yehova baingile mu busha ku cipimo cimo kuli Babiloni Mukalamba. (Ukusokolola 17:1, 2, 5) Ifilundwa fya bulya buteko bwa calo ubwa butotelo bwa bufi fyalyangile lintu ‘inte shibili’ isha mampalanya shalele ishafwa lwa ku mupashi. Lelo ku cikuuku ca pa fye ica kwa Lesa, mu 1919 ababomfi bakwe abasubwa balipuupuutwilwe, ukulubulwa lwa ku mupashi. (Ukusokolola 11:3, 7-11) Ukubomfya ubuntungwa bwabo ubwapeelwa na Lesa, babele inte shapimpa isha Wapulamo. E ico, fintu cali icalinga ukuti, mu 1931, mu buseko bapokelele ishina Inte sha kwa Yehova! (Esaya 43:10-12) Ukucilisha ukutula 1935 e lintu Inte shasubwa balundwako ne “bumba likalamba,” abasubila ukunonka ubumi bwa ciyayaya pe sonde. Na bo bene tabalepusa imifwaile ya buntungwa bwabo ubwapeelwa na Lesa.—Ukusokolola 7:9-17.
19, 20. (a) Ni nshila nshi imo iyawamina ukumonwa intu abantu ba kwa Yehova babomfeshamo bwino ubuntungwa bwabo ubwapeelwa na Lesa? (b) Ni mu nshila nshi imbi iyamonekesha Inte sha kwa Yehova babomfeshamo bwino ubuntungwa Lesa abapeela?
19 Abantu ba kwa Yehova balebomfya bwino ubuntungwa bwabo ubwapeelwa na Lesa mu nshila shibili ukucilisha ishawamina ukumonwa. Ku cintu cimo, balabubomfya ku kusupila inshila yatambalala. (1 Petro 2:16) Kabili mwandi balikwata ukushimikwa kusuma! Ku ca kumwenako, umwaume umo inshita imo aingile mu Ŋanda ya Bufumu mu Zurich, Switzerland, no kusoso kuti afwaile ukuba umo uwa Nte sha kwa Yehova. Lintu aipushiwe umulandu, alondolwele ukuti nkashi yakwe ali Nte kabili alitamfiwe pa mulandu wa bucisenene. Atile: ‘Kulya e kuteyanya ndefwaya ukuilundako—uko ukushisuminisha imyendele yabipa.’ Mu kuba no mulandu usuma New Catholic Encyclopedia yalimona ukuti Inte sha kwa Yehova balinonka ukushimikwa kusuma ukwa kuba “limo ilya mabumba yakwatisha imisango isuma mu calo.”
20 Inte sha kwa Yehova na kabili balabomfya ubuntungwa bwabo ubwapeelwa na Lesa pa kufikilisha ukutumwa kwabo ku kushimikila imbila nsuma iya Bufumu, nga fintu Yesu acitile. (Mateo 4:17) Kwi shiwi lya pa kanwa ne fyebo fyapulintwa, ponse pabili mu nshila ya lyonse ne ya mu lyashi, balebilisha Ubufumu bwa kwa Yehova. Mu kucite fyo balamwenamo abene apakalamba pa kukosha icitetekelo cabo no kubuutusha isubilo lyabo. Ukulundako, iyi mibombele ibomba ku kupususha bene na abo abalekutika kuli bene. (1 Timote 4:16) Ukulosha kuli iyi mibombele, icitabo Dynamic Religious Movements citila: “Kuti cabe cayafya ukusanga ifilundwa fye bumba ilili lyonse limbi ababombela ubutotelo bwabo mu kukosa nge ficite Nte.”
21. Bushininkisho nshi buliko ubwa kuti Yehova alepaala ubutumikishi bwa bantu bakwe?
21 Fintu Yehova aletupaala mu kufikilisha imifwaile ya buntungwa bwesu ubwapeelwa na Lesa! Ici kuti camonwa ukufuma kuli lipoti ya mulimo wa mwi bala uwa mwaka wapwile—icipimo ca pa mulu ica kucila pali bakasabankanya ba Bufumu amamilioni yane, mu kuba no kucila pa mamilioni ikumi ukusangwa ku Cibukisho ca mfwa ya kwa Yesu. Mu kufwailisha kumo, Ireland yakwete ifipimo fya pa mulu 29 ifya bakasabankanya ifya mweshi no mweshi mu kukonkana; Mexico yakwete ifipimo fya pa mulu 78 mu myeshi 80; kabili Japan yakwete ifipimo fya pa mulu 153 mu kukonkana!
Bomfya Bwino Ubuntungwa Bobe Ubwapeelwa na Lesa
22. Cishinka nshi icikalamba ica fipusho fimo ifya kubimbula itontonkanyo ifyo pambi twingaipusha fwe bene fweka?
22 Nga ca kuti uli umo uwa Nte shaipeela isha kwa Yehova, bushe ulebomfya bwino ubuntungwa ubo Lesa akupeela? Umo umo uwa ifwe kuti pambi aipusha umwine ukuti: ‘Bushe nalibo wasakamana ku kubomfya ubuntungwa bwandi ubwapeelwa na Lesa pa kusengauka ukupunwisha uuli onse ku myendele yalubana? Bushe ndeumfwila mu kusakamanishisha amafunde ya kwa Kaisare, nangu cingati kubika ifunde lya kwa Lesa pa ntanshi? Bushe ndabombela pamo mu kukumanina na baeluda ba mu cilonganino? Bushe ndebomfya ubuntungwa bwandi ubwapeelwa na Lesa mu kukumanina mu kushimikile mbila nsuma? Bushe lyonse ndakwata “ifingi ifya kucita mu mulimo wa kwa Shikulu”? Bushe ndesupila mu kuswatuka umulimo wa ku calo lintu ningalabomfya mu kuwaminako ubuntungwa bwandi ubwapeelwa na Lesa pa kutanununa ubutumikishi bwandi, ukutinamina icishingamo cakulilako mu cilonganino nelyo umulimo wa nshita yonse?’—1 Abena Korinti 15:58, NW.
23. Cinshi tulingile ukucita pa kuti tatupushile imifwaile ya buntungwa bwapeelwa na Lesa?
23 Shi ifwe bonse ‘natusonde no kumono kuti aliwama Yehova.’ (Ilumbo 34:8) Natutetekele muli wene, tukakatile ku mafunde yakwe, no kukatamika ishina lyakwe ilya mushilo pa kubilisha mu kupimpa Ubufumu bwakwe. Ibukisha ukuti abo ‘abaletanda balefusha bakaseepa na kabili ifyafula.’ (2 Abena Korinti 9:6) E ico, natubombe umulimo wa mutima onse kuli Yehova no kulango kuti tatwapusa imifwaile ya buntungwa bwesu ubwapeelwa na Lesa.
Kuti Wayasuka Shani?
◻ Musango nshi uwa buntungwa Lesa akwata?
◻ Ubuntungwa bwa buntunse bwakwata kupelebela nshi?
◻ Ni shani fintu ubuntungwa bwa cine bwalengelwe ukucitikako?
◻ Cinshi tufwile ukucita pa kusengauka ukupusa imifwaile ya buntungwa bwapeelwa na Lesa?
[Icikope pe bula 9]
Ubuntungwa bwa buntunse bwalipeleshiwa ne fyakusangwilako pamo nge funde lya maka yatinta