pantu nafiya umulu wa ntanshi ne calo ca ntanshi; . . . Kabili [Lesa] akafuute filamba fyonse ku menso yabo, ne mfwa tayakabeko kabili iyo; takwakabe kabili ukuloosha nangu kukuuta nangu kucululuka; pa kuti ifya ntanshi nafiya.”

Esa. 25:8: “Akamine mfwa ukumina kwa pe. Shikulu Yehova akafuuta ne filamba pa finso fyonse.” (Na kabili Ukusokolola 22:1, 2)

Esa. 33:24: “E lyo umwikashi wa mu calo takasose, ati, Nindwala.”

Nga Umo Asoso Kuti—

‘Bushe walisumina mu kundapa?’

Pambi kuti wayasuko kuti: “Uuli onse uushasumina ukuti Lesa alikwata amaka ya kundapa tasumina Baibolo. Lelo te kuti nsengauke ukupapa nampo nga abantu balecicita mu nshila yalungama ilelo. Lyene nakalimo lundapo kuti: (1) ‘Lekeni imubelengeleko ilembo, no kumona ngamulemonamo icibelesho icaba icapusanako sana mu kasuba kesu. (Mat. 10:7, 8) . . . Bushe mwamona na kabili pano icintu cimo cintu Yesu atile abasambi bakwe bali no kucita lelo cintu abondapa ilelo bashaba na maka ya kucita? (Te kuti bemye abafwa.)’ (2) Tatuli bakapingula ba bantu bambi, lelo cili icacindama ukumona ukuti Mateo 24:24 alumbulapo icintu cimo cintu tulekabila ukuibakako.’

Nelyo kuti wasoso kuti: ‘Cine cine nalisumina ifyo cintu Baibolo isosa pa lwa kundapa ca cine. Lelo ukundapa ukuli konse ukucitwa muli ino micitile ya fintu kuleta fye ukumwenamo kwa nshita inono, bushe te fyo? Mu kupelako bonse tulafwa. Bushe kukatala akubako inshita lintu uuli onse umumi akaipakisha ubutuntulu busuma no kukanafwa? (Ukus. 21:3, 4)’

Ukupepe Fikolwe

Ubulondoloshi: Icibelesho ca kucindika no kushinshimuna ifikolwe fyafwa (mu kusefya nelyo inshila imbi) mu kusumino kuti bali abomi mu bufumu bushimoneka kabili kuti baafwa nelyo ukuleto kucena ku ba mweo e ico na kabili bali no kutalalikwa. Te kusambilisha kwa Baibolo.

Bushe ifikolwe fyafwa baleshiba cintu aba mweo balecita kabili bushe ifi fikolwe balaba na maka ya kwaafwa aba mweo?

Luk. Mil. 9:5: “Aba mweo bantu abaishibo kuti bakafwa, lelo abafwa bantu abashaishiba kantu nangu kamo.”

Yobo 14:10, 21: “Kabili umuntunse aleko mweo, nga ali kwi? Abana bakwe abaume bacindikwa, na o taishiba.”

Amalu. 49:10, 17-19: “Amona aba mano bafwa, uwatumpa no wa bunama balobela pamo, no kusha kuli bambi ifyuma fyabo. . . . Mu kufwa kwakwe takasendepo nangu kamo, ubukata bwakwe tabwakekile pa numa yakwe. . . . Akaya ku nkulo ya bawishi, abashakamone ulubuuto pe.”

Bushe tacili ca cine ukuti ifya kulya fibikwa pa lufuba nelyo pa nshishi tafikatwako? Bushe ici tacilangilila ukuti abafwa tababa na maka ya kumwenamo?

Mona na kabili umutwe ukalamba “Ukupupe Mipashi.”

Bushe kuli umulandu wa kutiina ukuti ifikolwe fyafwa fikatucena?

Luk. Mil. 9:5, 6: “Abafwa . . . ukutemwa kwabo no kupata kwabo no kufinuka kwabo kwaliloba kale, ne cakaniko tabakwata kabili umuyayaya muli conse icicitwa mwi samba lya kasuba.”

Bushe kwaliba ulubali lwa mupashi ulwa muntu ulupusunsuka imfwa ya mubili?

Esek. 18:4: “Moneni, imyeo yonse yandi; ifyo umweo wa kwa wishi wandi e fyo no mweo wa mwana mwaume wandi; [umweo] uubembuka e ukafwa.” (Na kabili icikomo 20)

Amalu. 146:3, 4: “Mwitetekela bakankala, nangu mwana wa muntu . . . wafumo mupu wakwe, abwelela ku mushili wakwe, ubushiku bulya bwine yaloba amatontonkanyo yakwe.”

Basayantisiti na balepula tabasanga ubushinino bwa lubali lupeema, ulwa mweo ulwa bantu ulupusunsuka lintu umubili wafwa.

Mona na kabili amabula 141-143, pe samba lya mutwe “Imfwa.”

Bushe kuti wasoobolapo ukuti abana bobe na beshikulu balange umucinshi no kutemwa kuli iwe ilyo ucili uwa mweo nelyo ukuti bacite ukusefya pa nshishi yobe pa numa ube naufwa?

Efes. 6:2, 3: “Cindika wiso na noko (ili e funde lya ntanshi ilyaba ne cilayo), ukuti kuwame kuli iwe; kabili ube wa nshiku ishingi pano nse.” (Abana abakanshiwa mu fishinte fya Baibolo balanga umucinshi wa musango uyo uuleta ubuseko ku mitima ya bafyashi babo ilintu bacili aba mweo.)

Amapi. 23:22: “Umfwa kuli wiso untu akufyele, kabili wisuula noko uwakota.”

1 Tim. 5:4: “Lelo nga mukamfwilwa akwata abana atemwa beshikulu, basambilile ukuti ica kubalilapo kucita aba ŋanda yabo iine umwabela bukapepa, kabili ukubweseshapo ubufubo ku bafyashi babo; pantu ici casekelelwa ku cinso ca kwa Lesa.”

Lintu aba ngulu batunga ukuleta amashiwi ukufuma ku bafwa, ni kwi aya mu cishinka yafuma?

Esa. 8:19: “Ilyo batila kuli imwe, Ipusheni ku fipao fya bafwa ne ngulu ifilongofyanya no kumamanta, mukatile, Bushe abantu te kuli Lesa wabo e ko bengepusha? Twipushishe shani aba mweo ku bafwa?” (Bushe Lesa kuti atusoka ku cibelesho ca musango uyo nga ca kuti mu cine cine caletulengo kulundana na batemwikwa besu?)

Imil. 16:16: “Awe ilyo twaleya ukwa kupepela, alitukumenye umukashana uwali no mupashi [icibanda ca kubuka], uwamwenene bashikulu wakwe ifyuma ifingi mu kubuka.”

Mona na kabili amabula 342-344, pe samba lya “Ukupupe Mipashi.”

Ni kuli ani ukupepa kwesu kulingile ukulungikwa?

Luka 4:8: “Yesu alimwaswike, ati, Calembwa, aciti, Ulepepa [Yehova] Lesa obe, kabili wene eka e o ulepyungila.”