“Twafilwa Ukuleko Kulanda”
1 Yesu Kristu alebebeta bwino bwino umulimo wa kushimikila. (Mat. 28:20; Marko 13:10) Nangula ca kuti bakabilisha abaleshimiko bunte bafikile mupepi na mamilioni 6 mu fyalo 234, tatufwile ukutunga ukuti ukushimikilo bunte nakupwa. “[Twalifilwa] ukuleko kulande” fintu twasambilila, mpaka Lesa akabilishe ati umulimo naubombwa.—Imil. 4:20.
2 Shintilileni pa Mupashi wa kwa Lesa: Satana alatutitikisha sana ukuti atufuupule. (Ukus. 12:17) Umubili wesu uwa lubembu na o ulatuletela amafya ayengi. Ifintu fya musango yo kuti fyalenga twaleka ukupoosa amano ku mulimo wacindamisha uwa kushimikila. Nangu ni fyo, nga twacetekela Yehova, umupashi wakwe ukatwafwa ukucincintila ubwafya ubuli bonse.
3 Ilyo icilonganino ca Bena Kristu ica mu mwanda wa myaka uwa kubalilapo capakeswe, aba bwananyina bapepele kuli Lesa ukuti abafwe ukulalanda icebo cakwe no kushipa konse. Yehova alyaswike ipepo lyabo, abapeele umupashi wakwe no kubalenga ukuba abapimpa kabili abamupampamina walekabilwa pa kutwalilila ukushimikila. Ico calengele ukuti batwalilile ukubila imbila nsuma mu kushipa ukwabula ukuleka.—Imil. 4:29, 31; 5:42.
4 Mwitiina Milandile ya Kufuupula: Ifyo abantu batontonkanya, nelyo ukusabankanya kwa bukwakwa kuti fyatiinya bamo. Lelo, ibukisheni amashiwi ya kwa Petro na batumwa bambi ayashipa pa ntanshi ya Sanhedrin, ayalembwa pa Imilimo 5:29-32. Nga fintu kasambilisha wa Malango Gamaliele asumine, umulimo wa kwa Lesa te kuti uwishiwe. Taubombelwa ku maka yesu. Uyu mulimo ukalamba utungililwa na Lesa, kabili umwine e wingaupwishishisha!—Seka. 4:6.
5 Lyonse natulepaapaata Yehova ukutupa umupashi wakwe ku kutwafwa ukubila imbila nsuma mu kupimpa. Natusose nga fintu Yeremia asosele, ati imbila ya Bufumu yaba kwati mulilo uulepya mu mafupa yesu. (Yer. 20:9) Te kuti twikale tondolo!