Umwinshi Nawisuka Kuli Imwe ku Kukuula Ing’anda ya Bufumu
1 Kale sana, ukupitila muli kasesema Esaya, Yehova aebele ukuteyanya kwakwe ukwapalo mwanakashi ukuti: “Tangula apa kwikale hema lyobe. . . . Wishako; lefye myando yobe, ikasha ne mambo shobe.” (Esa. 54:2) Icacitika pa kufikilisha ayo mashiwi calimoneka pa mulandu wa fyo ukuteyanya kulelunduluka pali nomba. Cine cine tulekabila ukutangula apa kulonganina.
2 Kasesema wa kwa Yehova Hagai na o asobele ukuti ‘fikasuka afiisa ifisuma fya nko shonse.’ (Hag. 2:7) Ukwabulo kutwishika tulemona ifyo ukusambilisha kwa bulesa kulelenga abantu abengi nga nshi ukusambilila icine no kusanguka bakapepa ba kwa Yehova. Fintu cili ica kucincimusha ukumfwa amalipoti aya bwingi bwa bantu ababatishiwe mu mwaka wa mulimo uwa 1999 mwi sonde fye lyonse! Muno Zambia mweka, bamunyina na bankashi abacilile pali 7,600 balilundilweko ku mukuni wa kwa Yehova. Pa kutwalilila ukwafwilisha aba abapya bonse, tulekabila ‘ukubika imitima yesu pa mibele yesu’ no kushininkisha ukuti tuletungilila umulimo wa kwa Lesa na maka yesu yonse.—Hag. 1:5.
3 Inshila imo iyacindama iya kutungililamo umulimo wa kwa Lesa yaba kupayanya ifikuulwa fyalinga ifya kupepelamo umubela ukukansha kwa teokrasi. Apo aba kulumbanya Yehova abapya abashaifulila baleilunda kuli ifwe, Amayanda ya Bufumu ayapya ayengi kabili ayakalamba yalekabilwa mwi sonde fye lyonse. Ibumba Litungulula lilefwaisha ukuti Amayanda ya Bufumu ayengi nga nshi yakuulwe nga cingacitika.
4 Ifyo tulekabila icine cine. Muno Zambia, pali ndakai line, tulekabila Amayanda ya Bufumu ayasuma ayengi nga nshi ayengapeelwa ku kupepelamo Lesa wa cine. Cila mwaka tukabila ukukuula Amayanda ya Bufumu 35 ukufika kuli 40 ukulingana no bwingi bwa bantu baleilunda kuli ifwe. Kabili nga twalundapo ne filonganino ifishaifulila ifibomfya ifipaka, ifisonkela fye umwa kulonganina, ne filonganina mu fikuulwa ifishapwishishiwa bwino bwino, cinshi twalasondwelela? Ca kuti tulekabila bwangu bwangu fye ififulo fya kupepelamo no kusambililamo na fimbi ifingakuulwa mu kwangufyanya. Ipusheni amuti: Nga tatucitilepo icili conse nomba line, ni shani fintu ifwe bonse, ukusanshako na bapya, twinganonkelamo mu kusambilisha ilyo tulelongana mu cilonganino icafulishamo abantu?
5 Pa numa ya kulanshanya uyu mulandu na beminishi abatuminwe kuno Zambia kwi Bumba Litungulula, twasondwelele ukuti, Amayanda ya Bufumu ayapya yalekabilwa ukukuulwa muno Zambia mu myaka isano iyalakonkapo. Tulekabila ukupwisha ukukuula na yatendekwa kale. Nga cili kufwaya kwa kwa Yehova, twimike ubuyo bwa kulakuula nelyo ukupwisha ukukuula Amayanda ya Bufumu 180 cila mwaka mu myaka isano iyalakonkapo. Uyu mulimo kuti wabombwa shani?
6 Bonse tulesuminisha ukuti ubupiina muno Zambia bwalenga ifilonganino ifingi ukukanakuula Amayanda ya Bufumu ayasuma pa lwabo abene. Ifilonganino ifingi te kuti fikumanishe ukushita ifisolobelo fyonse ifikabilwa pa kukuula no kupwisha Ing’anda yabo iya Bufumu pa muku fye umo. Ne ci calenga ukuti ubukuule bulesenda imyaka iingi, bamo palipita ne myaka 20, nalyo line bacili tabalapwisha bwino bwino. Ku numa uku ifilonganino fimo fyalefilwa ukubwesha loni ku Sosaite.
7 Nga fintu cabilishiwe pa Mabungano ya Citungu aya “Icebo ca Kusesema Ica kwa Lesa,” Ibumba Litungulula lyalisuminisha imitantikile ya kuti ifilonganino ifilekabila Ing’anda ya Bufumu fingapeelwa indalama sha kukuulila. Ifisolobelo filepayanishiwa ku milimo iyalekanalekana, iilesanshamo ukukuula Amayanda ya Bufumu. E ico, ukupitila mu kubomfya bwino ifipe fya kwa Shikulu, amashiwi ya mutumwa Paulo ayo alembeele abena Korinti kuti yabomba pali lelo mwi sonde fye lyonse. Paulo atile, “Nshiletila, bambi baangukilwe ukucila, na imwe mufinininwe; lelo ca mu kulingana; ukukwata kwenu ukwingi mu nshita ya nomba kwingile mu kubulwa kwa balya. . . . E fyo kube ukulingana.” (2 Kor. 8:13, 14) Ca cine, indalama sha kukuulilamo Amayanda ya Bufumu shilefuma mu misangulo iyo bamunyinefwe mu fyalo fimbi basangula mu kuitemenwa pa mulandu wa kutemwa.
8 Mitantikile nshi iipya iiliko? Amaloni yakulapeelwa ukulingana no kukabila. Indalama sha loni shili no kulalipilwa ukulingana na pantu icilonganino cikwatile. Ici kuti calenga ne filonganino ifipiina nga nshi ukukuula nga cakabilwa. Ifilonganino fimo fyakulabwesha bwangu indalama ukucila fimbi. Ukulomba kwa filonganino kwakulabombwapo pale pale.
9 Lelo tufwile ukulalolesha na pa filekabilwa ukucitwa mwi sonde fye lyonse. Apo Amayanda ya Bufumu ayengi nga nshi yalekabilwa ukukuulwa, tufwile ukutulukusha apapelele amaka yesu. (1) Tufwile ukucefyako ifipooswa ukupitila mu kukonka plani wa makuule uwa Sosaite. (2) Amayanda ya Bufumu mu ncende shafulamo abantu yalingile ukubomfiwa ne filonganino fitatu nelyo fine. (3) Ifilonganino filingile ukutulukusha ukulipila indalama bwangu bwangu ilyo bashisanga. Pa kucite ci, Amayanda ya Bufumu na yambi kuti yakuulwa mwi sonde lyonse ukubomfya indalama ishilipo. Muli iyi nshila, ifilonganino fyesu kuti fyakwata ififulo fya kupepelamo ifisuma.
10 Finshi filefwaikwa, kabili icilonganino cenu kuti cayafwilishako shani? Incende yonse iyabomfiwa ukukuulapo Ing’anda ya Bufumu ifwile ukulembeshiwa mwi funde. Ubu e bwafya ubukalamba sana tukwete. Ing’anda ya Bufumu taifwile ukukuulwa pa ncende iishapeelwa ku cilonganino mwi funde. Ku ca kumwenako, nga ca kuti Imfumu e yamupeele mpanga, mulingile ukupoka kalata ku Mfumu iilelondolola ukuti yalipa icilonganino impanga. Awe ninshi impanga yaba yenu ukulingana ne funde. Ica kumwenako cimbi ni ci: Nga ca kuti Bakaunselo e bapeela icilonganino cenu impanga, mufwile ukuyapoka kalata iyo mwapeelelwapo iyo mpanga ukufuma ku Cipani Cilolekesha pa Mpanga (Ministry of Lands). Pa kubomba bwino na mafunde, impanga ifwile ukulembeshiwa mwi shina lya kuti “Zambia Association of Jehovah’s Witnesses Registered Trustees,” e kuti icipani ca mwi funde icapangwa muno Zambia ukutila e co cilepoka impanga. Pa numa ya ico, nomba kuti mwaipusha Icipani Cilolekesha pa Mpanga ukumupeela Ifipepala fya Bwine ifya Title Deed. Awe ninshi ne mpanga yaba yenu. IFILONGANINO FYONSE fifwile ukubombelapo bwangu bwangu ku kushininkisha ukuti impanga balebomfya yabo ukulingana ne funde.
11 Nga ca kuti mwalikwata impanga iyenu nge cilonganino ukulingana ne funde, kuti mwayafwiwa mu fya ndalama no kutuminwa bakabomba pa kuti mwingakuula Ing’anda ya Bufumu. Twamukoselesha ukulembela Kingdom Hall Construction Desk iya ku Sosaite pa kutila bengamulondolwela ifyalundwapo. Mukalombwa ukusumina ukukonka Imikuulile ya Mayanda ya Bufumu iya Sosaite no kulawamya Ing’anda yenu iya Bufumu no lubansa. Kabili mufwile no kusumina ukulatuma indalama sha loni cila mweshi ukulingana na po mukwatile. Baeluda mwakoseleshiwa ukucite ci bwangu bwangu pa kuti na imwe mwingamwenamo muli iyi mitantikile iipya.
12 Amabumba ya bakakuula. Pa kuti Amayanda ya Bufumu yengakuulwa, Ibumba Litungulula lyalisuminisha ukupangako Amabumba ya Bakakuula wa Mayanda ya Bufumu. Muli aya mabumba mukaba ababomfi ukufuma ku fyalo fimbi, ababomfi ba bukuule aba muno Zambia, na baleitemenwa fye abene muno mwine mu Zambia, bonse bakulasontwa na Komiti wa Musambo. Ibumba limo na limo lyakulakwata kangalila wa bukuule na kaafwa wakwe. Aya mabumba yali no kwafwa ifilonganino mu makuule yabo. E yakulateyanya umulimo no kubombela pamo ne cilonganino mpaka Ing’anda ya Bufumu yapwa ica kuti no kupeelwa kuti yapeelwa. Ibumba limo pali aya mabumba e ko lyaba kale kale ku Bethel. Limbi lilepangwa ku Copperbelt. Muli uyu mwaka uleisa, amabumba yambi yali no kupangwa ku fitungu fya Luapula pamo pene na ku Eastern na Northern. Aya mabumba ya bakakuula yakulabombela pamo na Bakomiti ba Makuule ya mu Citungu babili ababako kale nelyo mu ncende umo Bakomiti ba Makuule ya mu Citungu bashingafika. Bakashintilila pa kwafwa kwa bakabomba ba kuitemenwa; ilingi line aba bakulafuma mu ncende uko Ing’anda ya Bufumu iilekuulwa ibelele.
13 Bakakuula ba kuitemenwa bakaba ba pa kashita akepi, e kutila ukubomba ne bumba lya bakakuula ba Mayanda ya Bufumu pa bukuule bwa Ng’anda ya Bufumu iishili yabo ukufuma pa milungu ibili ukufika ku myeshi itatu. Sosaite e yakulateyanya umwa kusendama ne fya kulya ukupitila mu Cilonganino icilekuula. Ubwingi bwa bakuulileko Ing’anda ya Bufumu bali no kulaalikwa ukuba Bakakuula ba Kuitemenwa. Bushe kuti mwaipeelesha ukwafwilishako muli uyu lulu wa kukuula Amayanda ya Bufumu? Nga ni fyo, tulemukoselesha ukwisushisha formu wa “Application for Kingdom Hall Construction Volunteer Program.” Aya maformu yali no kutumwa ku filonganino nomba line.
14 Ababomfi ba kukuula Amayanda ya Bufumu. Ababombele nga Bakakuula ba Kuitemenwa pa myeshi ibili no kucilapo nabafikapo ukulomba ukuba Ababomfi ba Kukuula Amayanda ya Bufumu. Formu alingile ukutumwa ku Sosaite ukupitila muli Komiti wa Mulimo uwa Cilonganino. Abasontwa ukubomba uyu mulimo waibela uupya bali no kupayanishiwilwa fimo fimo, ukusanshako ukwafwa ukupalile ku kwafwa uko aba mu lupwa lwa Bethel bapayanishiwilwa. Sosaite e yakulapekanya umwa kusendama ne fya kulya.
15 Ilyo twalolesha mwi bala lya mwi sonde lyonse, imitima yesu ilasansamuka ukumona ukwingilishiwako kushaikulila ukuli mu kuteyanya kwa kwa Yehova. Cilatusansamusha pa kutila Amayanda ya Bufumu na yambi yalekabilwa. Bamunyina na bankashi abengi balitungilila ukuteyanya kwa kwa Yehova mu kupimpa nga nshi ukupitila mu kuitemenwa ukupeela inshita yabo ne fikwatwa ku bukuule bwa Ng’anda ya Bufumu.
16 Imitantikile yonse iya kukuula Amayanda ya Bufumu ibombwa ukupitila mu mupashi wa Bwina Kristu uwa kuipeelesha mu kuitemenwa. Fintu ici capusana nga nshi no mupashi wa ku calo uwaseeka pali lelo uwa bukaitemwe kabili umo abantu bafwaya fye ukupeelwa lelo bena ukupeela iyo! Mwandi cintu cishaiwamina ukumona abantu ba kwa Lesa baletwalilila ukulanga ukuti balitemwana, te mulandu no kupusana umushobo ne fyalo bafumako. (Mat. 24:12) Pa kupashanya Shifwe wa ku muulu na pa mulandu wa kumutemwa, mu nshila shalekanalekana, shi natutungilile uyu programu wa makuule ya Mayanda ya Bufumu. Ukucite ci kukalenga Yehova ukutupaala nga nshi no kutusenamina. (Mal. 3:10) Tulesekelela pa kumona Amayanda ya Bufumu ayafulilako uko yalekuulwa mwi sonde fye lyonse, ukusanshako na muno mwine mu Zambia, kabili ici cileta ilumbo kuli Yehova.—Hag. 1:7, 8.