Bambi Bashintilila Pali Imwe
1 “Ilinso talingeba iminwe, aliti, Nshilemukabila.” Nga lyasosa ifyo, cinshi cingalicingilila ku mafya? E co, umutumwa Paulo alandile pa mubili wa muntu ne filundwa fya uko ilyo alelangilila icishinka ca kuti bonse tushintilila pali bambi mu cilonganino. Alembele no kuti “ifilundwa fya mubili ifyalingwo kube fyabulwa amaka fifwile ukubapo.” Ca cine, tushintilila pali bambi, bambi na bo bashintilila pali ifwe, ababa “no kusakamanana kumo” pantu “tuli filundwa fya banensu.” (1 Kor. 12:21-27; Efes. 4:25) Tontonkanyeni pa nshila shimo isho ifyo mucita fikuma bambi.
2 Mu Lupwa: Abalume na bakashi balakoseleshanya ukupitila mu citetekelo, umupampamina, no kupimpa baba nako, ilyo bayangwa amabuyo ya ku mupashi intanshi. E fyo ne mibele ne ca kumwenako ca bafyashi fikuma ifyo abana bamona no kubomba ubutumikishi, e lyo ne fyo bamona ukusangwa ku kulongana kwa Bwina Kristu no kwasukapo.
3 Mu Butumikishi: Ukupimpa kwenu mu kushimikila imbila nsuma iya Bufumu kulakoselesha bakasabankanya banenu ukubombesha mu butumikishi. Ica kumwenako cenu calicindama sana nga fintu fye ukwafwa bambi ukuti babombeko umulimo kwacindama. (2 Tes. 3:9) Bapainiya balatasha icine cine lyonse nga mwabomba na bo mu butumikishi. Kwena, abafwaya ukusambilila abo mwalanda na bo mwi bala benekela imwe ukubwelelako no kubafwa ukusanga inshila ya ku bumi. Tamufwaya ukubalenge nsoni.
4 Mu Cilonganino: Ilyo mwasangwa ku kulongana no kwasukapo, mulakoselesha bamunyinenwe ne nkashi. Nga tamwile ku kulongana, te imwe mweka mupuswa fimo. Bambi tabakanonke ubusuma benganonka nga mwasangwako ku kulongana. Baeluda cine cine bashintilila pali imwe, nga fintu fye na imwe mushintilila pali bene. Imibele yenu iisuma no kufwaisha kwenu ukwafwa kuti kwayangusha imilimo yabo iya kucema umukuni.
5 Mu fyo tusosa no kucita, ‘natucincimushanye ku kutemwa kabili ku kubombe milimo isuma.’ (Heb. 10:24) Yehova akatupaala pa kuba abashintililwapo kabili aba bucishinka.