Baibolo Yalikwata Amaka
1 Kemba wa malumbo Davidi aipwishe ati: “Mwe Yehova, nani engalebela mwi hema lyenu? Nani engekala mu lupili lwenu lwa mushilo?” Davidi asalile amashiwi ayanono kabili ayasuma no kwasuka ati: “Uwendo wa mpofu, uucito bulungami, uusose cine.” (Amalu. 15:1, 2) Ifi fifwaikwa tafyayalulwa. Pali lelo bonse abesa ku kupepa mu cilonganino ca Bwina Kristu bafwile ukuleka ububifi na bucakolwa. Abantu ba kwa Yehova tabafwile ukuba abomanya bambi, aba cipyu, nelyo aba bwilika ndimi. Nampo nga tuli babomfi bapya nelyo abakokole, tufwile ukuba aba cishinka pa kutwalilila ne mibele isuma iyalembwa mu Cebo ca kwa Lesa.—Gal. 5:19-21.
2 Abapya abengi balebishanya no kuteyanya kwa kwa Yehova. Abacaice kumo na bakalamba bene balyalula ukutontonkanya kwabo pa kuti imikalile bekalilamo ilingane ne fifwaya Lesa. Umulumendo wa myaka 14, umwina Kalomo, asambilile icine ku banankwe alecema nabo ing’ombe. Balupwa lwakwe bonse balimukeenye. Inshiku shimo balemutaana ne fya kulya. Ubufumacumi bwakwe pa mulandu wa fisambilisho fya mu Baibolo bwalengele abafyashi bakwe ukumutemwa. Taleiba nge fyaleiba abana bambi. Pa mulandu wa kushimikila muli iyi ncende yabamo abantu bafwaya ukusambilila, balupwa lwakwe 9 balibatishiwe no kuba Inte sha kwa Yehova. Pali aba pali na banakulu ba myaka 98, bawishi na banyina babatishiwe pe bungano lya mwaka wapwile.
3 Na ifwe bene, tufwile ukupampamina pa kuteemuna Lesa mu mibele yesu yonse, “mu kulungama no kushila kwa Cine.” (Efes. 4:24) Tufwile ‘ukufuula ubuntu bwa kale pamo ne micitile ya buko, no kufwalo buntu bupya, ubo mu kwishiba bulelengwa cipya cipya’ nga atutwalilila ukuba mu kuteyanya kwa kwa Lesa ukwaba ngo lupili.—Kol. 3:9, 10.
4 Icebo ca kwa Lesa, Calikwata Amaka ya Kwalula: Imibele ya kwa Yehova nga fintu yalondololwa mu Baibolo kuti yawamya nga nshi ukutontonkanya kwesu ne micitile. (Rom. 12:2) Icebo cakwe calikwata amaka ya kwalula imintontonkanya no kulengule mitima. (Heb. 4:12) Amalembo yapuutwamo ya tusambilisha ukuti Yehova afwaya ifwe ukuba ne mibele isuma, ukubombako sana umulimo wa kushimikila ku cintubwingi, no kukanalekelesha ukusangwa ku kulongana kwa Bwina Kristu.
5 Muli shino nshiku shayafya, ifya kutitikisha filefulilako kuti fyasonga Umwina Kristu ukutoba amafunde ya kwa Lesa. Nga ca kutila umuntu alekelesha isambililo lya pa lwakwe, isambililo lya lupwa, ukulongana kwa pa cilonganino, nelyo ukushimikila, nangu ca kuti kale ali Mwina Kristu wakosa kuti asensenunwa ukufuma ku citetekelo, nalimo ukucita ne cabipa. E mulandu wine Paulo alembele Timote ukuti: “Uimone we mwine, ne sambilisho lyobe” no kuti, “Lyonse uletontonkanya pa co ndesosa.”—1 Tim. 4:16; 2 Tim. 2:7, NW.
6 Nampo tuli bapya nelyo tuli bakokole, tufwile ukulaibukisha ifyo Lesa afwaya, ukuba abashikatala mu butumikishi, no kutwalilila ne subilo lyesu ilyakosa nga atwisapusuka. (1 Pet. 1:13-16) Cila bushiku ukuumfwila ifyo Lesa afwaya kulakabilwa sana.
7 Beni no buyo bwa kuya mu mulimo wa mwi bala muli ino nshita ya cibukisho. Pampamineni pa kwaafwa bambi ukukusha icitetekelo no kubombesha mu mulimo wa mwi bala. (Rom. 1:12) Lekeni isambililo lya pa lwenu, isambililo lya lupwa, no kusangwa ku kulongana fimulenge ukutontonkanya pa fintu ifisuma. (Fil. 4:8) Lesa akamona ukuti mulebombesha pa kufwaya ukumutemuna ilyo muleikala umwabela ukufwaya kwakwe.—Kol. 3:23, 24.