Twalilileni Ukwenda na Lesa

Umutumwa Paulo alondolwele ubucindami bwa kushipikisha mu kwenda na Lesa ilyo alembele ati: “Filya mwapokelele kuli ifwe ukufunda pa fyo mufwile ukwenda no kuteemuna Lesa, . . . mulecite fyo mu kufikapo.” (1 Tes. 4:1) Mwandini twali ne nsansa nga nshi ukuba pa bantu abengi abatwalilile ukwenda na Lesa umwaka wa mulimo uwapwile! Ilyo tulelolesha pa fyo twabombele nge calo, natubebete ne mibombele ya cilonganino cesu. Ukucite fyo kukatwafwa ukumona imbali umo twingalundako ukutungilila umulimo wa Bufumu nga filya fine ukulongana kwa citungu ukwa 2004 kwatukoseleshe ukucita.

Umwaka wa mulimo uwa 2004 walipwile bwino muno Zambia umwaba ifilonganino 2,136. Avareji wa bakasabankanya ni 118,068. Ici cipendo cilelango kuti kwali ukulunduluka ukwafikile ku mapesenti yatatu ukucila umwaka wapwile. Tulemutasha pa cipendo ca 203,691 ica masambililo ya Baibolo, nangu ca kutila kwali ukubwelela pa nshi mu mpendwa ya babatishiwe. Umwaka wa 2003 baali 8,930 e lyo 2004 baali 7,758. Bushe kuli imbali sha mulimo wesu isho tulekabila ukuwamyako?—Mat. 28:19, 20.

Bushe muleibukisha ifyo Enoke aendele na Lesa? Taletaluka fye ku fyabipa. Lesa aleenekela Enoke ukushimikila. (Yuda 14, 15) Ilyo Enoke alebombesha ukufika pa mitima ya bantu aleshimikila, ‘aliteemwine Lesa.’ (Heb. 11:5) Ukupalako, tukapaalwa ilyo tulebombesha ukushimikila no kusambilisha bambi.

Tuletasha amabumba ya baeluda ayengi abatungulula muli bucishinka umulimo wa kushimikila kabili abalonganika no kutuma lipoti wabo uwa cilonganino bwangu bwangu kwi ofesi lya musambo. Tulefwaya ukubombesha na mu mwaka wa mulimo uwa 2005 ilyo na bambi abengi na bo bakailunda kuli ifwe ku kwenda na Yehova no kuipakisha insansa pali nomba no mweo wa muyayaya ku ntanshi!