Ifyo Mwingabomba Bwino Umulimo wa Bupainiya
1, 2. Cinshi cikaafwa bapainiya ukulabomba bwino umulimo wabo uwa nshita yonse?
1 Bushe umulimo wa bupainiya e ncito mufwaya ukubomba? Nga ni mwe bapainiya, e kutila bakabilisha ba Bufumu aba nshita yonse, ninshi kuti mwafwaya ukwishiba inshila mwingabombelamo bwino uyu mulimo. Lelo ukupoose nshita ikalamba pa ncito te cilanga ukuti umuntu alishiba bwino uyo mulimo. Umuntu uwaishiba incito alafwaya ukusambilila kabili lyonse alesha ukulundulula umulimo wakwe.
2 E ico kanshi, kuti mwacita shani nga mulefwaya ukutwalilila ukubomba bupainiya pa nshita imo ine ukuya mulewamyako umulimo wenu? Kwaliba ifipusho ifingi ifyacindama ifyo mulingile ukutontonkanyapo.
3, 4. Cinshi twingasambilila ku Mfumu Davidi?
3 Bushe Bucibusa Bwandi na Lesa Bwakosa Shani?: Pa fintu ifikalamba ifingamwafwa ukubomba bwino bupainiya paba no kukwata bucibusa bwa pa mutima kabili ubwakosa na Yehova Lesa. Umo uo twingasambililako ni kemba wa malumbo Davidi. Alombele ukuti: “Nengeni ukwishiba inshila shenu, mwe Yehova; Nsambilisheni nshila shenu. Nengeni ukwenda mu cine cenu kabili nsambilisheni, pantu ni mwe Lesa we pusukilo lyandi. Muli imwe e mo natetekela akasuba konse.”—Amalu. 25:4, 5, NW.
4 Davidi ashintilile pali ‘Lesa we pusukilo lyakwe.’ Alefwaya ukuti Yehova amusambilishe no ‘kumulenga ukwishiba inshila Shakwe.’ Bushe namumona ifyo Davidi alefwaisha ukutemuna Lesa? Uku kufwaisha takwali kwa pa kashita kanono, pantu Davidi atile: “Muli imwe e mo natetekela akasuba konse.”
5. Cinshi icikalamba icingatwafwa ukutwalilila ukuba ifibusa na Lesa?
5 Lelo bushe kuti mwacita shani pa kuti muleba ifibusa fya pa mutima na Yehova lyonse? Ibukisheni ukuti amashiwi ya kwa Davidi yali lipepo apepele. Kanshi, ica ntanshi icingalenga bucibusa na Lesa ukuwama lipepo. Kabili kuti twatemwa nga nshi ukwishiba ukuti Shifwe uwaba ku muulu pa kulanda nankwe tatukabila ukupangana inshita twalalanda nankwe. Kuti twapepa inshita ili yonse. Caba fye nga filya fine Davidi alandile ati: “Kuli imwe ndililako akasuba konse.” (Amalu. 86:3) Nangu fye Mwana wine uwa kwa Lesa, uwaendele pano calo, umuntu wapwililika, alishibe ukuti uwali no kumwafwa ukubomba umulimo bwino ni Wishi epela. Yesu alandile nankwe mwi pepo akasuba konse, e kutila ku macaca, akasuba, e lyo no bushiku.—Marko 1:35; Luka 11:1; 6:12.
6, 7. Bushe painiya umo uwakokola muli uyu mulimo alandile shani pe pepo kabili bushe kuti mwasuminisha ifyo alandile?
6 Fwe Bena Kristu, tulingile ukupashanya Yesu nga tulefwaya ukutunguluka mu mulimo wesu. (Heb. 5:7) Umwanakashi umo umwina Kristu uwabomba bwino umulimo wa bupainiya pa myaka 30, alandile ifi pe pepo: “Nasanga ukuti ipepo lilafwa nga ndefwaya ukubomba bwino bupainiya. Lyalingafwa ukushintilila sana pali Yehova, pantu naishiba ukuti te kuti ncite nangu cimo ku maka yandi. Lyonse ndalomba Yehova ukungafwa ukutwalilila ukubomba uyu mulimo.”
7 Cine cine, nga mulefwaya ukuti mulebomba bwino umulimo wa bupainiya, bucibusa bwenu na Yehova bulingile ukukosa, ukushintilila sana pali ena mwi pepo. Lelo, icipusho cakonkapo na co nacicindama sana kabili kuti cawama ukuti muipushe mwe bene.
8. Mulandu nshi twingalandila ukuti bupainiya ni nshila ya kulangilamo ukutemwa?
8 Bushe Natemwa Shani Abantu?: Umulimo wa bupainiya ulatulenga ukutemwa abantu. Mulandu nshi? Pantu ukushimikila inshita yonse kusanshamo ukuipeelesha. Ilyo mulebomba uyu mulimo wa bupainiya, lyonse mulabomfya inshita yenu na maka ukwafwa bambi. Lelo nga mulefwaya ukutwalilila ukucite fi, mufwile ukutemwisha abantu bambi, ukwishiba ifyo bafwaya. Ilyo Yesu ali pe sonde, alangile ukutemwa kumo kwine ku bantu. Ku ca kumwenako, inshita imo ena na basambi bakwe baninine ubwato baleya ku ncende iyali tondolo ku “kutuushako panono.” Lelo, amabumba yalibatangilile uko baleya. “Awe, pa kufumamo, amwene ibumba likalamba, kabili abekatilwe inkumbu, pantu bali nge mpaanga ishabula kacema. Kabili atendeke ukubasambilishe fintu ifingi.”—Marko 6:30-34.
9. Mulandu nshi cacindamina ukwishiba umulandu uukalamba uo tulefwaila ukutendekela umulimo wa bupainiya?
9 Na ifwe bapainiya tulingile ukutemwa sana abantu nga filya fine Yesu abatemenwe. Ukutemwa kwa musango yu e kutulenga tulebombesha ukubashimikila imbila nsuma. Nga fintu kalemba umo inshita imo aebele Yesu ukuti: “[Ukutemwa Lesa] no mutima onse, no mucetekanya onse, na maka yonse, no kutemwa umunobe nga we mwine, kwalicindama ukucila imitulo iyaocewa yonse na malambo.” (Marko 12:33) Aya mashiwi yatulenga twaishiba bwino bwino ukuti icacindamisha te nshila tubombelamo umulimo wesu epela lelo no mulandu tu-ubombela.
10, 11. Bushe ukutemwa abantu nga filya Kristu abatemenwe kuti kwayafwa shani bapainiya ukushipikisha mu mulimo wa kubila?
10 Ilyo mubomba bupainiya, mupoosa inshita ikalamba mu mulimo wa kubila no kupanga abasambi ukucila bakasabankanya bambi. Na kabili mulakumanya abantu abengi. Bushe mubamona shani? Painiya umo atile: “Nalishiba ukuti ukutemwa cisabo ca mupashi wa kwa Lesa. E ico akubula uku kutemwa nga nshaba mu cine, kabili no mulimo wa bupainiya wine nga te kuti ngubombe bwino. Ukutemwa kulalenga ndetontonkanya pa bantu, ukwishiba ifyo bakabila, kabili ndatasha pa mulandu wa kuti abantu nabo balantemwa. Kwena, kulaba inshita ilyo ukutemwa watemwa abantu kwingeshiwa nga ca kuti tabalepoosako amano ku mbila nsuma. Iyo nshita e yo njesha ukubomfwikisha no kubatekela umutima.”
11 Bushe e fyo mutontonkanya pa bantu baba mu cifulo mushimikila? Mulingile ukutemwa abantu nga mulefwaya ukuti mulebomba bwino umulimo wa bupainiya. (1 Tes. 2:6-8) Na kabili, pa kuti mulebomba bwino umulimo wenu uwa bupainiya mufwile ukutantika bwino. E ico, ipusheni icipusho cakonkapo.
12. Cinshi painiya alingile ukucita pa kuti alebomba bwino umulimo wa mwi bala?
12 Bushe Nalitantika Bwino?: Icingafwa painiya ukulabomba bwino umulimo wa kubila inshita yonse, kutantika bwino ifintu. Painiya nga tatantike bwino programu yakwe, kuti alemona kwati uyu mulimo walikosa. Kwena, ukutantika inshita mukalapoosa mu mulimo wa mwi bala te kutila ninshi capwa iyo, kwaliba na fimbi.
13. Bupusano nshi bwaba pa kutantika no kutantika bwino?
13 Painiya alingile ukutantika bwino ifintu. Bushe mwalilemba programu wenu? Nalimo kuti cawama ukuipusha amuti: Bushe ndapoosa inshita yalinga mu kushimikila kwapusanapusana? Bushe ndabombesha ukulanda na bantu abengi mu cifulo nshimikila? Bushe ndalula ifyo natantika pa kutila ndetandalila abantu inshita ningabasanga pa ng’anda? Bushe nga ndecita ifipempu fya kubwelelamo ndesha ukutendeka amasambililo ya Baibolo? Yesu atile: “E ico kabiyeni, kalengeni aba nko shonse ukuba abasambi . . . mulebasambilisha.” (Mat. 28:19, 20) Fyonse fibili ukubila no kusambilisha fyaba e fyacindamisha mu mulimo wesu uwa kushimikila. Bushe mupelela fye pa kubashila impapulo, nelyo bushe mulabwelela kuli bonse abalefwaya ukusambilila, nampo nga balisumine impapulo nelyo iyo? Mu kwipifya, bushe mulabomfya bwino inshita yenu?
14, 15. Bushe ni muli cinshi bapainiya bafwaisha ukulamuka kabili finshi bengabomfya pa kucite fyo?
14 Bushe Ndawamyako Inshila Nsambilishishamo?: Ici cipusho na cimbi icacindama. Pali 2 Timote 4:2, Paulo alembele ati: “Shimikile cebo, cincila mu nshita iyene, na mu nshita iishiyene, . . . mu kushishimisha konse no kulamuka kwa kusambilisha.” Nga balefwaya ukulashimikila bwino icebo, mu cilonganino nangu ku nse, bapainiya ababomba bwino balabombesha ukuwamyako inshila basambilishishamo. Mulandu nshi Paulo alandile ukuti pa kusambilisha umuntu alingile ukulamuka? Pantu ukusambilisha bwino no kubelesha e kufwaikwa.
15 Bushe mukawamya shani ukusambilisha kwenu? Umutumwa Paulo ayasuka ati: “Etetula pali fi fintu; obelwa kuli fyene, ukuti ukulunduluka kobe kumoneke kuli bonse.” (1 Tim. 4:15) Ca cine, bapainiya balingile ukutantika inshita ya kuisambilisha Baibolo, ukutontonkanya pa fyo balesambilila, no kwetetulapo. Ilyo mulecite fi kuti cawama nga mulekonka ne fyebo fyaba mu mpapulo pamo nga Ukupelulula Ukufuma Mu Malembo, Ubutumikishi Bwesu Ubwa Bufumu, ne citabo citila Nonkelenimo mu Masambililo ya Isukulu lya Butumikishi Ilya Bulesa.
16. Supawileni inshila shingamwafwa ukubomba bwino umulimo wa bupainiya.
16 Kanshi nga mulefwaya mulebomba bwino umulimo wa bupainiya, mwileka ukuba bacibusa ba pa mutima na Yehova Lesa. Ici cikalenga mukatemwe abantu kabili mukalabomba imilimo iilanga ukuti mwalibatemwa. Kwena, pa kuti mulange ukuti mwalitemwa bantu, tamwakapoose fye amano ku nshita mubomba umulimo wa mwi bala, lelo mulingile ukubomfya bwino inshita ukupitila mu kushimikila bwino imbila nsuma. Mukacita shani ifyo? Ni pa kushimikila abantu abengi ubukombe bwa Bufumu. Ne ca kulekelesha, twalilileni ukulawamya imisambilishishe yenu ukupitila mu kusambilila inshila ishapusanapusana isha kulanda na bantu mu mulimo wa mwi bala. Kabili mulesambilila Baibolo lyonse pa kutila mukalesambilisha bwino.